ដោយ Donald Lee
ភ្នំពេញៈ អត្រាកំណើនផលិតផល ក្នុងស្រុកសរុបរបស់ចិន បានធ្លាក់ចុះមកត្រឹម៦ ភាគរយនៅក្នុងត្រីមាសទី៣នេះ។ នេះបើយោងតាមរបាយការណ៍ការិយាល័យស្ថិតិជាតិ (NBS) ចេញផ្សាយកាលពីថ្ងៃសុក្រ។
ត្រីមាសទី៣ នៃឆ្នាំ ២០១៩ គឺជារយៈពេលដំណើរការអាក្រក់បំផុត ក្នុងរយៈពេលជិត៣០ឆ្នាំ និងជាសញ្ញាបង្ហាញពីការធ្លាក់ចុះសេដ្ឋកិច្ច ដែលធ្លាក់ចុះពីកំណើន ៦,២ភាគរយនៅក្នុងត្រីមាសទី២ មកត្រឹម៦ភាគរយនៅត្រីមាសទី៣នេះ។
ក្រុមអ្នកវិភាគអះអាងថា សង្គ្រាមពាណិជ្ជកម្មរវាងអាមេរិក និងចិនកំពុងធ្វើឱ្យសេដ្ឋកិច្ចពិភពលោកធ្លាក់ចូលក្នុងវិបត្តិសេដ្ឋកិច្ច។
របាយការណ៍របស់ IMF កាលពីសប្តាហ៍មុន បានលើកឡើងថា “សេដ្ឋកិច្ចពិភពលោក កំពុងធ្លាក់ចុះស្របគ្នា ជាមួយនឹងកំណើនសម្រាប់ឆ្នាំ២០១៩ បានធ្លាក់ចុះម្តងទៀតដល់៣ភាគរយ ដែលជាល្បឿនទាបបំផុតចាប់តាំងពីវិបត្តិហិរញ្ញវត្ថុសកល”។
សង្រ្គាមពន្ធគយពិភពលោក នឹងធ្វើឱ្យសេដ្ឋកិច្ចពិភពលោក ខាតបង់ចំណូលជិត ៧០០ពាន់លានដុល្លារនៅឆ្នាំ២០២០ខាង មុខនេះ។
លោក Mao Shengyong អ្នកនាំពាក្យរបស់ NBS បាននិយាយកាលពីថ្ងៃសុក្រថា “សេដ្ឋកិច្ចកំពុងជួបប្រទះបរិយាកាសខាងក្រៅ ដែលស្មុគស្មាញ និងធ្ងន់ធ្ងរ”៕
