ដោយ ប៊ី
ភ្នំពេញៈ បណ្តារដ្ឋមន្រ្តីហិរញ្ញវត្ថុពិភពលោក និងមន្រ្តីធនាគារកណ្តាលបានបញ្ចប់កិច្ចប្រជុំធ្លាក់ចុះកាលពីថ្ងៃសៅរ៍ ដោយសន្យាថានឹងប្រើវិធីសមស្របទាំងអស់ ដើម្បីប្រយុទ្ធប្រឆាំងនឹងកំណើនសេដ្ឋកិច្ចពិភពលោក ដែលចុះខ្សោយបំផុតក្នុងរយៈពេលមួយទសវត្សរ៍ ប៉ុន្តែមានការបង្ហាញផ្លូវតិចតួច ក្នុងការកាត់បន្ថយភាពតានតឹងលើគោលនយោបាយពាណិជ្ជកម្មអន្តរជាតិ ជាប្រភពដ៏សំខាន់នៃការធ្លាក់ចុះ។
គណៈកម្មាធិការរៀបចំគោលនយោបាយ សម្រាប់មូលនិធិរូបិយវត្ថុអន្តរជាតិមកពី១៨៩ប្រទេស បាននិយាយនៅក្នុងសេចក្តីថ្លែងការណ៍បិទថា កំណើនសេដ្ឋកិច្ចគួរតែកើនឡើងនៅឆ្នាំក្រោយ។
-->
ក្រុមមន្រ្តីបានទទួលស្គាល់ថា កត្តាមួយចំនួនអាចធ្វើឱ្យខូចការព្យាករណ៍នោះ រួមមានការបន្តជម្លោះ លើគោលនយោបាយពាណិជ្ជកម្មអន្តរជាតិ និងការកើនឡើងហានិភ័យភូមិសាស្ត្រនយោបាយ។
សេចក្តីថ្លែងការណ៍នេះបានឱ្យដឹងថា “យើងទទួលស្គាល់ពីតម្រូវការ ក្នុងការដោះស្រាយភាពតានតឹងផ្នែកពាណិជ្ជកម្ម និងគាំទ្រដល់ការធ្វើកំណែទម្រង់ចាំបាច់របស់អង្គការពាណិជ្ជកម្មពិភពលោក។ ប៉ុន្តែវាមិនបានរៀបរាប់លម្អិត អំពីវិធីដើម្បីសម្រេចបាននោះទេ”។
វាក៏មិនមានសញ្ញាណាមួយដែលថា ការពិភាក្សានៅខាងក្រៅកិច្ចប្រជុំបានបង្កើតនូវរបកគំហើញណាមួយ នៅក្នុងជម្លោះពាណិជ្ជកម្ម ដែលផ្តួចផ្តើមដោយប្រធានាធិបតី Donald Trump ដែលជាផ្នែកមួយនៃវិធីសាស្រ្ត ដ៏តឹងរឹងរបស់លោក ក្នុងការពង្រឹងការអនុវត្តច្បាប់ពាណិជ្ជកម្មអាមេរិក ដើម្បីកាត់បន្ថយឱនភាពពាណិជ្ជកម្មដ៏ធំរបស់អាមេរិក។
រដ្ឋមន្រ្តីក្រសួងរតនាគារអាមេរិកលោក Steven Mnuchin នៅក្នុងសុន្ទរកថាទៅកាន់គណៈកម្មាធិការ IMF បាននិយាយថា គោលបំណងរបស់រដ្ឋបាល គឺដើម្បីរៀបចំមូលដ្ឋានគ្រឹះ សម្រាប់ការរីកចម្រើននាពេលអនាគត តាមរយៈកិច្ចព្រមព្រៀងពាណិជ្ជកម្ម ដែលត្រឹមត្រូវ។
លោក Steven បាននិយាយថា ការចរចាកាលពីសប្តាហ៍មុនរវាងមេរិក និងចិនដែលជាប្រទេសមានសេដ្ឋកិច្ចធំជាងគេទាំងពីរ បានទទួលបានវឌ្ឍនភាពគួរឱ្យកត់សម្គាល់លើដំណាក់កាលទី១ នៃកិច្ចព្រមព្រៀងពាណិជ្ជកម្ម ដើម្បីដោះស្រាយអាមេរិកដែលអះអាងថាចិនកំពុងលួចកម្មសិទ្ធិបញ្ញា។
ខណៈលោក Trump បានផ្អាកការដំឡើងពន្ធ លើផលិតផលចិនចំនួន២៥០ពាន់លានដុល្លារ ដែលត្រូវបានគ្រោងនឹងចូលជាធរមាននៅសប្តាហ៍មុននេះ មានព័ត៌មានជាក់លាក់មួយចំនួន អំពីកិច្ចព្រមព្រៀងនោះត្រូវបានផ្សព្វផ្សាយ។ ក្រុមមន្ត្រីសហរដ្ឋអាមេរិកបាននិយាយថា ការចរចាដើម្បីបញ្ចប់ព័ត៌មានលម្អិតទាំងនោះ កំពុងដំណើរការហើយ។
នាយកមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva មានប្រសាសន៍ថា #ការគំរាមកំហែងពីសង្គ្រាមពាណិជ្ជកម្ម គឺជាចំណុចសំខាន់នៃការពិភាក្សាសម្រាប់មន្រ្តីហិរញ្ញវត្ថុ។
លោកស្រីបាននិយាយថា IMF បានប៉ាន់ប្រមាណថា ពន្ធគយដែលបានដាក់រួចហើយ ឬគំរាមកំហែងអាចនឹងកាត់បន្ថយកំណើន សេដ្ឋកិច្ចពិភពលោក 0,៨ភាគរយនៅចុងឆ្នាំក្រោយ។ ភាគច្រើននៃកត្តាទាំងនោះគឺមកពីទំនុកចិត្តអាជីវកម្ម។
លោកស្រីបាននិយាយថា “នៅក្នុងសង្គ្រាមពាណិជ្ជកម្ម មនុស្សគ្រប់គ្នាចាញ់។ អ្នកបង្កើតគោលនយោបាយ គួរតែយកចិត្តទុកដាក់ខ្ពស់ ចំពោះកាតព្វកិច្ចរបស់ខ្លួន ចំពោះកិច្ចសហប្រតិបត្តិការអន្តរជាតិក្នុងពាណិជ្ជកម្ម”។
ចំណែកលោក David Malpass ប្រធានធនាគារពិភពលោកបានមានប្រសាសន៍ថា ការពិភាក្សាផ្នែកហិរញ្ញវត្ថុនៅសប្តាហ៍នេះ បានផ្តោតលើវិធីដោះស្រាយបញ្ហាប្រឈមជាច្រើន។
លោកបានមានប្រសាសន៍ថា “កំណើនសេដ្ឋកិច្ចកំពុងធ្លាក់ចុះ ការវិនិយោគមានសភាពយឺត សកម្មភាពផលិតកម្មមានសភាពទន់ខ្សោយ ហើយពាណិជ្ជកម្មកំពុងចុះខ្សោយ”។ លោកបន្តថា “ការប្រែប្រួលអាកាសធាតុ និងភាពផុយស្រួយកំពុងធ្វើឱ្យប្រទេសក្រីក្រងាយរងគ្រោះ”។
លោកបានមានប្រសាសន៍ថា ធនាគារពិភពលោក ប្តេជ្ញាជួយដោះស្រាយបញ្ហាប្រឈមទាំងនេះ ដោយផ្តល់នូវជីវភាពប្រសើរ សម្រាប់ប្រជាជន ៧០០លាននាក់ នៅក្នុងពិភពលោកដែលកំពុងរស់នៅក្នុងភាពក្រីក្រខ្លាំង។
តាមទស្សនវិស័យសេដ្ឋកិច្ច ដែលបានធ្វើបច្ចុប្បន្នភាព IMF បានព្យាករថា សេដ្ឋកិច្ចពិភពលោកនឹងកើនឡើង៣ភាគរយនៅឆ្នាំនេះ ដែលជាកំនើនទាបបំផុត ក្នុងរយៈពេលមួយទសវត្សរ៍។ IMF បាននិយាយថា ៩០ភាគរយនៃសេដ្ឋកិច្ចពិភពលោក កំពុងជួបប្រទះនូវការធ្លាក់ចុះនៃកំណើន។
ប៉ុន្តែ IMF ព្យាករណ៍ថា កំណើនសេដ្ឋកិច្ច នឹងកើនឡើងបន្តិចដល់៣,៤ភាគរយក្នុងឆ្នាំ២០២០ ប៉ុន្តែតួលេខនេះ នៅតែទាបជាងអត្រា៣,៦ភាគរយក្នុងឆ្នាំ ២០១៨ ។
អង្គការ Jubilee USA ដែលជាអង្គការសាសនា ប្រយុទ្ធប្រឆាំងនឹងភាពក្រីក្រជាសកលបានឱ្យដឹងនៅក្នុងសេចក្តីថ្លែងការណ៍មួយថា ខណៈពេលដែល IMF បានគូសបញ្ជាក់ ពីការគំរាមកំហែងធ្ងន់ធ្ងរមួយចំនួន អនុសាសន៍សម្រាប់ដោះស្រាយជាមួយពួកគេមានតិចតូច។
លោក Eric LeCompte នាយកប្រតិបត្តិរបស់អង្គការខាងលើនេះ បានមានប្រសាសន៍ថា “ការវិនិយោគដែលមានហានិភ័យ ភាពតានតឹងពាណិជ្ជកម្ម និងប្រទេសកំពុងខ្ចីប្រាក់ច្រើនពីបណ្តាប្រទេសនានា គឺជាក្តីកង្វល់យ៉ាងខ្លាំងចំពោះស្ថិរភាពហិរញ្ញវត្ថុ”។
ខណៈគោលនយោបាយពាណិជ្ជកម្មរបស់លោក Trump គឺជាប្រធានបទដ៏សំខាន់នៃការពិភាក្សានៅឯកិច្ចប្រជុំ មន្ត្រីហិរញ្ញវត្ថុភាគច្រើន បានជៀសវាងការរិះគន់ផ្ទាល់ដល់ ប្រធានាធិបតីអាមេរិក។
លោកស្រី Christine Lagarde ដែលបានដោះស្រាយជាមួយរដ្ឋបាលលោក Trump ក្នុងអំឡុងពេល៣ឆ្នាំចុងក្រោយ ក្នុងនាមជាប្រធាន IMF បាននិយាយត្រង់ៗនៅក្នុងបទសម្ភាសន៍មួយ ដែលត្រូវចាក់ផ្សាយថ្ងៃអាទិត្យ របស់ទូរទស្សន៍ CBS។
នៅពេលសួរអំពីសង្គ្រាមពាណិជ្ជកម្មរបស់លោក Trump ជាមួយចិន លោកស្រីបាននិយាយថា “វានឹងផ្តល់ឱ្យសេដ្ឋកិច្ចពិភពលោកនូវ “ការកាត់សក់ដ៏ធំមួយ” (ការធ្លាក់ចុះខ្លាំង) ហើយគួរតែត្រូវបានដោះស្រាយ ដោយឱ្យភាគីទាំងអស់អង្គុយចុះ ហើយដាក់អ្វីៗនៅលើតុ និងព្យាយាមដោះស្រាយគ្នាបន្តិចម្តងៗ ដើម្បីឱ្យយើងមានភាពប្រាកដប្រជា”។
ការវាយប្រហារតាម Twitter ជាញឹកញាប់របស់ Trump ទៅលើប្រធានធនាគារ Federal Reserve លោក Jerome Powell លោកស្រី Lagarde បាននិយាយថា ធនាគារកណ្តាល ចាំបាច់ត្រូវមានឯករាជ្យ ដើម្បីធ្វើការងាររបស់ពួកគេបានល្អ។
លោកស្រីបានថ្លែងថា “ស្ថេរភាពទីផ្សារ មិនគួរជាប្រធានបទលើបណ្តាញសង្គមនៅទីនេះ ឬនៅទីនោះទេ។ វាតម្រូវឱ្យមានការពិចារណា គិតដោយស្ងប់ស្ងាត់ និងវាស់វែង និងសមហេតុផល”។
លោកស្រី Lagarde គ្រោងនឹងចូលកាន់តំណែង នៅថ្ងៃទី១ ខែ វិច្ឆិកា ក្នុងនាមជាប្រធានធនាគារកណ្តាលអឺរ៉ុប ដែលគ្រប់គ្រងគោលនយោបាយរូបិយវត្ថុ សម្រាប់ប្រទេសចំនួន១៩ ដែលប្រើប្រាស់រូបិយប័ណ្ណអឺរ៉ូ៕
