ដោយ វុត្ថា
វ៉ាស៊ីនតោនៈ គណៈកម្មាធិការរូបិយ និងហិរញ្ញវត្ថុអន្តរជាតិ (IMFC) ដែលជាស្ថាប័ន រៀបចំគោលនយោបាយរបស់មូលនិធិរូបិយវត្ថុអន្តរជាតិ (IMF) កាលពីថ្ងៃសៅរ៍បានអំពាវនាវដល់ប្រទេសនានា ឱ្យដោះស្រាយនូវភាពតានតឹងពាណិជ្ជកម្ម និងគាំទ្រដល់ការធ្វើកំណែទម្រង់ចាំបាច់ របស់អង្គការពាណិជ្ជកម្មពិភពលោកមួយនេះ។
នៅក្នុងសេចក្តីថ្លែងការណ៍ បន្ទាប់ពីកិច្ចប្រជុំលើកទី៤០ របស់គណៈកម្មាធិការ IMFC បានឱ្យដឹងថា ទស្សនវិស័យកំណើនសេដ្ឋកិច្ច ត្រូវបានគេមើលពីភាពមិនប្រាកដប្រជា និងត្រូវប្រឈមនឹងហានិភ័យធ្លាក់ចុះកាន់តែខ្លាំង រួមទាំងភាពតានតឹងពាណិជ្ជកម្ម ភាពមិនប្រាកដប្រជានៃគោលនយោបាយ និងហានិភ័យភូមិសាស្ត្រនយោបាយប្រឆាំងនឹងគោលនយោបាយមានកំរិតខ្ពស់ និងការកើនឡើងនូវកម្រិតបំណុល និងភាពងាយរងគ្រោះផ្នែកហិរញ្ញវត្ថុកាន់តែខ្ពស់។
-->
IMFC បានសរសេរនៅក្នុងសេចក្តីថ្លែងការណ៍ថា “ពាណិជ្ជកម្ម និងសេវាកម្មដោយសេរី និងយុត្តិធម៌ ដែលផ្តល់អត្ថប្រយោជន៍ទៅវិញទៅមក គឺជាក្បាលម៉ាស៊ីនសំខាន់សម្រាប់កំណើនសេដ្ឋកិច្ច និងការបង្កើតការងារ។ ប្រព័ន្ធពាណិជ្ជកម្មអន្តរជាតិដ៏រឹងមាំជាមួយនឹងច្បាប់ ដែលត្រូវបានអនុវត្តយ៉ាងល្អ គឺយន្តការនៃដោះស្រាយបញ្ហាប្រឈមនាពេលបច្ចុប្បន្ន និងអនាគតដើម្បីគាំទ្រដល់កំណើនសេដ្ឋកិច្ចសកល។
សេចក្តីថ្លែងការណ៍ដដែលបន្ថែមថា “យើងទទួលស្គាល់ពីតម្រូវការ ដើម្បីដោះស្រាយភាពតានតឹងផ្នែកពាណិជ្ជកម្ម និងគាំទ្រដល់ការធ្វើកំណែទម្រង់ចាំបាច់ របស់អង្គការពាណិជ្ជកម្មពិភពលោក ដើម្បីកែលម្អមុខងាររបស់ខ្លួន”។
លោក Lesetja Kganyago ប្រធាន IMFC និងជាអភិបាលធនាគារបម្រុងនៃប្រទេសអាហ្វ្រិកខាងត្បូង បាននិយាយនៅក្នុងសន្និសីទកាសែតមួយ កាលពីថ្ងៃសៅរ៍ថា ភាពតានតឹងពាណិជ្ជកម្ម បានជះឥទ្ធិពលយ៉ាងធ្ងន់ធ្ងរ ដល់ពាណិជ្ជកម្ម និងសេដ្ឋកិច្ចពិភពលោក។
លោកបន្តថា “មិនមានអ្នកឈ្នះនៅក្នុងសង្គ្រាមពាណិជ្ជកម្មទេ។ នៅទីបញ្ចប់អ្នកចាញ់ដ៏ធំបំផុតគឺជាសេដ្ឋកិច្ចពិភពលោក”។
នាយកគ្រប់គ្រងមូលនិធិរូបិយវត្ថុអន្តរជាតិ លោកស្រី Kristalina Georgieva បានឱ្យដឹងដែរថា អ្វីដែលកិច្ចប្រជុំ IMFC ធ្វើឡើងដើម្បីកសាងផលចំណេញយ៉ាងពិតប្រាកដពីភាពតានតឹងពាណិជ្ជកម្ម រហូតដល់ភាពមិនប្រាកដ។ ការធ្លាក់ចុះនៃការវិនិយោគ ការកាត់បន្ថយការលូតលាស់ដល់ឳកាសការងារ និងដើម្បីលុបបំបាត់ទំនុកចិត្តអតិថិជន។
លោកស្រីថា “ខ្ញុំជឿជាក់ថាមានសំលេងខ្លាំង ចំពោះការយោគយល់លើអ្នកធ្វើគោលនយោបាយ ដោយមិនគិតពីផលប្រយោជន៍ផ្ទាល់ខ្លួន គួរតែយកចិត្តទុកដាក់ខ្លាំងចំពោះកាតព្វកិច្ចរបស់ពួកគេ ចំពោះកិច្ចសហប្រតិបត្តិការអន្តរជាតិក្នុងពាណិជ្ជកម្ម”។
IMFC បាននិយាយនៅក្នុងសេចក្តីថ្លែងការណ៍នោះថា “យើងនឹងសហការដើម្បីកាត់បន្ថយ អតុល្យភាពសកលហួស ប្រមាណ តាមរយៈគោលនយោបាយម៉ាក្រូសេដ្ឋកិច្ច និងរចនាសម្ព័ន្ធ ដែលគាំទ្រដល់កំណើនសេដ្ឋកិច្ច ពិភពលោកប្រកបដោយចីរភាព”។
លើសពីនេះទៀត IMFC បានកត់សំគាល់ថា បណ្តាប្រទេសកំពុងធ្វើការឆ្ពោះទៅរកប្រព័ន្ធពន្ធអន្តរជាតិ ដែលមានលក្ខណៈទំនើប និងយុត្តិធម៌ជាសកល ជាពិសេសការយកពន្ធទាក់ទងនឹងឌីជីថល ហើយនឹងដោះស្រាយការប្រកួតប្រជែងពន្ធ ដែលមានគ្រោះថ្នាក់ ការផ្លាស់ប្តូរប្រាក់ចំណេញសិប្បនិម្មិត និងបញ្ហាពន្ធផ្សេងទៀត៕
