ដោយៈ រ៉ាណេត
ភ្នំពេញៈ ក្រុមហ៊ុនលំដាប់អន្តរជាតិដ៏ធំប្រចាំនៅក្នុងប្រទេសជប៉ុន ដែលមានកេរ្តិ៍ឈ្មោះល្បី លើការវិនិយោគក្នុងវិស័យអចលនទ្រព្យ និងវិស័យកសិកម្មនោះបានបង្ហាញពីចំណាប់អារម្មណ៍ចង់បណ្តាក់ទុននៅកម្ពុជា ដើម្បីបង្កើតរោងចក្រកែច្នៃគ្រាប់ស្វាយចន្ទី សម្រាប់នាំចេញទៅកាន់ទីផ្សារពិភពលោក។
នៅក្នុងដំណើរទស្សនកិច្ច សិក្សាពីសក្ដានុពល និងឱកាសវិនិយោគនៅកម្ពុជានាយកក្រុមហ៊ុន Top Planning Japan Co., Ltd លោក Murayama Tsetuo បានបង្ហាញពីចំណាប់អារម្មណ៍ចង់វិនិយោគនៅកម្ពុជា ដោយការបង្កើតរោងចក្រកែច្នៃគ្រាប់ស្វាយចន្ទីលំដាប់អន្តរជាតិសម្រាប់ការនាំចេញ ខណៈដែលអ្នកជំនាញជនជាតិជប៉ុន សុទ្ធតែបានទទួលស្គាល់ថា គុណភាព និងរសជាតិគ្រាប់ស្វាយចន្ទីរបស់កម្ពុជា មានភាពល្អប្រសើរជាងគ្រាប់ស្វាយចន្ទីរបស់ប្រទេសវៀតណាម និងប្រទេសឥណ្ឌា។
នៅក្នុងឱកាសចូលជួបសម្ដែងការគួរសម ជាមួយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន នៅទីស្ដីការក្រសួងកាលពីថ្ងៃទី២៤ ខែតុលាឆ្នាំ២០១៩នេះ លោក Murayama Tsetuo បានមានប្រសាសន៍ថា កន្លងពីពេលមកនេះ ដោយទទួលបានការជួយឧបត្ថម្ភគាំទ្រពីអង្គការ JICA ក្រុមហ៊ុនបានធ្វើការសិក្សាស្រាវជ្រាវអំពីសក្តានុពលដំណាំស្វាយចន្ទីកម្ពុជា ហើយលទ្ធផលនៃការសិក្សាគឺបានធ្វើតេស្តសាកល្បងរស់ជាតិគ្រាប់ស្វាយចន្ទីផលិតនៅកម្ពុជា ដោយប្រជាជនជប៉ុនបង្ហាញថា គ្រាប់ស្វាយចន្ទីកម្ពុជាមានរស់ជាតិឆ្ងាញ់ ជាងគ្រាប់ស្វាយចន្ទីរបស់វៀតណាម ឥណ្ឌា និងអាហ្វិក។
លោកបានបញ្ជាក់ទៀតថា “ទាំងគុណភាពអនាម័យ បរិមាណផលិត ការប្រើប្រាស់បច្ចេកវិទ្យាដាំដុះ និងការកែច្នៃផលិតផលគ្រាប់ស្វាយចន្ទី នៅកម្ពុជានៅមានកម្រិត ហើយកត្តាអវិជ្ជមានទាំងនេះ ធ្វើឱ្យក្រុមហ៊ុនមានឆន្ទ:ចង់បង្កើតរោងចក្រ កែច្នៃគ្រាប់ស្វាយចន្ទីកម្ពុជាកម្រិតស្តង់ដារអន្តរជាតិ ធ្វើយ៉ាងណាកាត់បន្ថយ និងឈានទៅលុបបំបាត់ចំណុចអវិជ្ជមានទាំងនេះ ដើម្បីទទួលបានចំណាត់ថ្នាក់ពិភពលោកនាពេលអនាគត”។
រដ្ឋមន្ត្រីក្រសួងកសិកម្ម លោក វេង សាខុន បានមានប្រសាសន៍ រដ្ឋាភិបាលកម្ពុជាគាំទ្រជានិច្ច នូវរាល់គម្រោងវិនិយោគនានានៅកម្ពុជា ហើយគម្រោងនៃការបង្កើតរោងចក្រនេះ គឺស្របនឹងគោលនយោបាយរបស់ក្រសួង ដែលបាន និងកំពុងខិតខំជំរុញផលិតភាពផលិតកម្មឱ្យមានលក្ខណ:ល្អប្រសើរ។
លោកបានបន្តទៀតថា “បច្ចុប្បន្ននេះ ក្រសួងបានព្យាយាមបង្កើនគុណភាពទាំងបរិមាណ និងអនាម័យ តាមរយ:វិស័យឯកជន ដៃគូអភិវឌ្ឍ និងសហគមន៍កសិកម្មដោយអនុវត្តតាមអភិក្រម “រដ្ឋ ឯកជន ដៃគូអភិវឌ្ឍ និងសហគមន៍កសិកម្ម” ដោយប្រើប្រាស់ប ច្ចេកវិទ្យាដាំដុះ កែច្នៃ វេចខ្ចប់ទាន់សម័យ សំដៅលើកកម្ពស់តម្លៃបន្ថែម កាត់បន្ថយការនាំចេញវត្ថុធាតុដើម”។
លោកបានបន្តទៀតថា តាមរយ:បទពិសោធន៍ដែលក្រុមហ៊ុនមានស្រាប់ ក្រសួងសង្ឃឹមថាគម្រោងនេះ នឹងដំណើរការទៅដោយរលូន ហើយក្រសួងក៏ដូចជាអង្គភាពពាក់ព័ន្ធនឹងរង់ចាំផ្តល់កិច្ចសហការពេញលេញ ដើម្បីឱ្យការវិនិយោគនេះសម្រេចទទួលបានជោគជ័យតាមការគ្រោងទុក។ ព្រមជាមួយគ្នានេះ ក្រុមហ៊ុនគួរតែរៀបចំផែនការដាំដុះ ឯកសារផ្លូវច្បាប់ បច្ចេកទេស ចងក្រងសហគមន៍ផលិត ហើយគួរអនុវត្តផលិតកម្មកសិកម្មតាមកិច្ចសន្យា ដើម្បីជាប្រយោជន៍សម្រាប់ប្រជាកសិករកម្ពុជា ក្រុមហ៊ុន និងជាពិសេសសេដ្ឋកិច្ចជាតិ៕
