ដោយ ៖ រ៉ាណេត
ក្រុងយានតាយ-សានស៊ី ប្រទេសចិន ៖ រដ្ឋាភិបាល តាមរយៈក្រសួងពាណិជ្ជកម្មកម្ពុជា បានស្នើសុំរដ្ឋាភិបាលចិន បង្កើតមជ្ឈមណ្ឌលពាណិជ្ជកម្មប្រចាំនៅក្នុងទីក្រុង យានតាយ ខេត្តសានស៊ី ដើម្បីពង្រឹង និងពង្រីកសក្ដានុពលនៃការវិនិយោគទ្វេភាគីឱ្យកាន់តែទូលំទូលាយ ជាពិសេសធ្វើពិពិធកម្មពាណិជ្ជកម្មលើផ្នែកកសិផលឱ្យកាន់តែល្អប្រសើរ។
ក្រោមកិច្ចសហប្រតិបត្តិការយ៉ាងជិតស្និទ្ធទាំងវិស័យការទូត និងវិស័យពាណិជ្ជកម្ម កាលពីពេលកន្លងទៅនេះប្រទេសទាំង២បានសម្រេចនូវទំហំពាណិជ្ជកម្មប្រមាណជាង៦ពាន់លានដុល្លារ ដែលជាកម្រិតមួយស្ថិតនៅក្នុងការកំណត់របស់រដ្ឋាភិបាលនៃប្រទេសទាំង២។
-->
បន្ថែមពីនេះ ក្នុងគោលបំណងជំរុញកំណើនការវិនិយោគ ក៏ដូចជាការធ្វើពាណិជ្ជកម្មឱ្យកាន់តែទូលំទូលាយ រដ្ឋាភិបាលកម្ពុជា តាមរយៈក្រសួងពាណិជ្ជកម្មបានស្នើដល់រដ្ឋាភិបាលចិន បង្កើតមជ្ឈមណ្ឌលពាណិជ្ជកម្មកម្ពុជាប្រចាំនៅក្នុងទីក្រុងយានតាយ នៃខេត្តសានស៊ី ដើម្បីងាយស្រួលដល់កិច្ចទំនាក់ទំនង។
នៅក្នុងដំណើរទស្សនកិច្ច និងចូលរួមនៅក្នុងពិធីពិព័រណ៍ពាណិជ្ជកម្មអន្តរជាតិលើកទី៤ ឆ្នាំ២០១៩ កាលពីថ្ងៃទី២៣ ខែតុលា កន្លងទៅនេះ រដ្ឋលេខាធិការក្រសួងពាណិជ្ជកម្ម លោក សំ សិរីរតន៍ ដែលបានដឹកនាំគណប្រតិភូពាណិជ្ជករកម្ពុជាចូលរួមនៅក្នុងពិធីខាងលើនេះ បានបង្ហាញពីការចាប់អារម្មណ៍ចំពោះការរីកចម្រើនលើគ្រប់វិស័យរបស់រដ្ឋបាលប្រជាជនខេត្តសានស៊ី ដែលជាតំបន់មានការអភិវឌ្ឍ និងរីកចម្រើនគួរឱ្យកត់សម្គាល់។
លោក សំ សិរីរតន៍ បានមានប្រសាសន៍ថា “កិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងភាពជាដៃគូយុទ្ធសាស្រ្តគ្រប់ជ្រុងជ្រោយរវាងកម្ពុជា-ចិន រហូតសម្រេចបាននូវទំហំពាណិជ្ជកម្មជាង ៦ពាន់លានដុល្លារ ដល់កម្រិតដែលប្រមុខរដ្ឋនៃប្រទេសទាំងពីរចង់បាន ប៉ុន្តែបើចំពោះការធ្វើពាណិជ្ជកម្មផ្ទាល់រវាងខេត្តសានស៊ី និងកម្ពុជា ហាក់នៅមានកម្រិតនៅឡើយ ដែលទាមទាឱ្យថ្នាក់ដឹកនាំនៃភាគីទាំង២ព្យាយាមជំរុញបន្ថែមទៀត”។
នៅក្នុងឱកាសនោះ លោករដ្ឋលេខាធិការ ក៏បានស្នើរដ្ឋបាលខេត្តសានស៊ី ពិនិត្យ និងគាំទ្រលើចំណុចមួយចំនួន ដូចជា ១).ជំរុញការធ្វើពាណិជ្ជកម្មលើផលិតផលកសិកម្មទៅវិញទៅមក, ២). ការបើកមជ្ឈមណ្ឌលពាណិជ្ជកម្មកម្ពុជា ប្រចាំទីក្រុង យាន តាយ ខេត្តសានស៊ី, ៣). ផ្លាស់ប្តូរបេសកកម្មពាណិជ្ជកម្ម និងជំរុញវិស័យឯកជនចូលរួមពិព័រណ៍ទៅវិញទៅមក, ៤). ជំរុញអ្នកវិនិយោគទុនខេត្តសានស៊ី ធ្វើការវិនិយោគលើការកែច្នៃកសិផលនៅកម្ពុជា និងជំរុញធ្វើការផ្លាស់ប្តូរវិស័យទេសចរណ៍ផងដែរ។
ជាកិច្ចឆ្លើយតបតាមសំណើររបស់ប្រតិភូកម្ពុជា លោក វ៉ាន យី ស៊ីន អភិបាលរងខេត្តសានស៊ី បានសម្តែងនូវការកោតសរសើរចំពោះកំណើននៃទំហំពាណិជ្ជកម្មទ្វេភាគីកម្ពុជា-ចិន។ ជាមួយគ្នានេះ លោកក៏បានឯកភាព និងបង្ហាញនូវការគាំទ្រចំពោះចំណុចទាំងឡាយដែលលើកឡើងដោយភាគីកម្ពុជា។
ចំពោះការជំរុញវិស័យទេសចរណ៍ លោក វ៉ាន យី ស៊ីន បានស្នើដល់មន្ទីរទេសចរណ៍ខេត្តសានស៊ី ធ្វើការជាមួយភ្នាក់ងារទេចរណ៍នៃប្រទេសទាំងពីរ ប្រសិនបើមានភ្ញៀវទេចរច្រើន នោះរដ្ឋបាលខេត្តសានស៊ី និងពិនិត្យលទ្ធភាពរៀបចំជើងហោះហើរពិសេស (Charter Flight) ហោះហើរពីទីក្រុង យានតាយ ខេត្តសានស៊ី មកកាន់កម្ពុជា ដើម្បីជួយសម្រួលដល់ភ្ញៀវទេចរនៃប្រទេសទាំងពីរ៕
