ដោយៈ រ៉ាណេត
ភ្នំពេញៈ ក្រសួងបរិស្ថានគ្រោង ចំណាយទឹកប្រាក់២៤២លានដុល្លារអាមេរិក នៅក្នុងផែនការអភិវឌ្ឍបីឆ្នាំរំកិល និងផែនការនៃការប្រើប្រាស់ថវិកាតាមឆ្នាំនីមួយៗ លើគម្រោងចំនួន៧០ ខណៈដែលបច្ចុប្បន្នបានបញ្ចប់ចំនួន២៥គម្រោង ស្មើនឹងប្រមាណ២៥លានដុល្លារ។
រដ្ឋលេខាធិការក្រសួងបរិស្ថាន លោក សៅ សុភាព បានមានប្រសាសន៍នៅក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅអនុវត្តសម្រាប់ឆ្នាំ២០២០ កាលពីថ្ងៃទី៥ ខែវិច្ឆិកា ឆ្នាំ២០១៩ ថា កិច្ចសហប្រតិបតិ្តការ ផែនការ និងថវិកា ពិតជាមានសារសំខាន់ណាស់សម្រាប់វិស័យបរិស្ថាន។
លោកបានបញ្ជាក់ថា ក្រសួងបានបញ្ចប់ការកសាងផែនការ យុទ្ធសាស្រ្តថវិកា៣ឆ្នាំរំកិល និងផែនការថវិកាតាមឆ្នាំនីមួយៗរបស់ក្រសួង និងមន្ទីរបរិស្ថាន រាជធានី-ខេត្ត ដោយឈរលើមូលដ្ឋាន នៃផែនការយុទ្ធសាស្រ្តអភិវឌ្ឍន៍ជាតិ និងយុទ្ធសាស្រ្តចតុកោណរបស់រាជរដ្ឋាភិបាល គួបផ្សំនឹងគោលនយោបាយ ម៉ាក្រូសេដ្ឋកិច្ច និងហិរញ្ញវត្ថុសាធារណៈឆ្នាំនីមួយៗ ដើម្បីសម្រេចឱ្យបាននូវគោលបំណងគោលនយោបាយរបស់ក្រសួង។
ក្រសួងបរិស្ថាន បានសម្របសម្រួលជាមួយអង្គភាពពាក់ព័ន្ធ ចំណុះក្រសួងបរិស្ថាន និងអគ្គលេខាធិការដ្ឋាន ក្រុមប្រឹក្សាជាតិអភិវឌ្ឍន៍ដោយចីរភាព ធ្វើបច្ចុប្បន្នភាពបញ្ជីគម្រោងសហការជាមួយដៃគូ អភិវឌ្ឍន៍ អង្គការមិនមែនរដ្ឋាភិបាល ដែលបានបញ្ចប់ គម្រោងដែលកំពុងដំណើរការ និងគម្រោងដែលកំពុងរៀបចំសរុប៧០សរុបជាទឹកប្រាក់ចំនួន ២៤២លានដុល្លារ។
គម្រោងដែលបានបញ្ចប់មានចំនួន២៥ បានចំណាយថិកាសរុបអស់ចំនួន២៥ លានដុល្លា គម្រោងកំពុងដំណើរការចំនួន៣២ គ្រោងចំណាយថវិកាសរុប១២៧លានដុល្លា និងគម្រោងដែលកំពុងរៀបចំមានចំនួន១៣ ដែលមានថវិកាជាង៩០លានដុល្លា៕
