ដោយ Donald Lee
ភ្នំពេញៈ វិស័យសេវាកម្ម ក្នុងការវិនិយោគផ្ទាល់ពីបរទេស (FDI) នៅកម្ពុជាបានហក់ឡើងយ៉ាងខ្លាំងបំផុតកាលពីឆ្នាំមុន។ នេះបើយោងតាមរបាយការណ៍វិនិយោគថ្មី ASEN ឆ្នាំ ២០១៩។
ការវិនិយោគផ្ទាល់ពីបរទេសនៅកម្ពុជា បានកើនដល់ទឹកប្រាក់៣ពាន់លានដុល្លារ កើនឡើង១៥ភាគរយដែលភាគច្រើន បានមកពីការវិនិយោគពីវិស័យសេវាកម្ម ដែលមានចំនួន៧៩ភាគរយ នៃលំហូរចូលការវិនិយោគផ្ទាល់ពីបរទេសទាំងអស់។
របាយការណ៍បានបញ្ចាក់ថា “វិស័យសេវាកម្មមានចំនួន៧៩ភាគរយ នៃការវិនិយោគផ្ទាល់ពីបរទេសទាំងអស់នៅកម្ពុជា ខណៈវិស័យផលិតកម្មមានចំនួន១២ភាគរយ”។
វិនិយោគិនកំពូលៗនៅកម្ពុជា សុទ្ធសឹងតែមានប្រភពមកពីបណ្តាប្រទេសអាស៊ី ដូចជា ចិន អាស៊ាន ហុងកុង កូរ៉េខាងត្បូង និងជប៉ុន។
របាយការណ៍បានបញ្ជាក់ថា វិស័យសេវាកម្ម ដែលនាំមុខក្នុងការវិនិយោគផ្ទាល់ពីបរទេស ត្រូវបានជំរុញដោយវិស័យធនាគារ និងធានារ៉ាប់រង។
នៅក្នុងវិស័យធនាគារ ធនាគារពាណិជ្ជកម្ម បរទេសមួយចំនួន បានពង្រីកប្រតិបត្តិការរបស់ខ្លួន។
ធនាគារABA(កាណាដា) បានបើកសាខាថ្មីនៅកម្ពុជា ហើយគ្រោងនឹងបើកបន្ថែមទៀតនៅឆ្នាំ ២០១៩។ ធនាគារស៊ីនហាន (សាធារណរដ្ឋកូរ៉េ) បានពង្រីកប្រតិបត្តិការធនាគារសហករណ៍តៃវ៉ាន់ (ខេត្តតៃវ៉ាន់នៃប្រទេសចិន) និងធនាគារឧស្សាហកម្មកូរ៉េ (សាធារណរដ្ឋកូរ៉េ) ដែលបានបើកដំណើរការ ការិយាល័យតំណាងនិងមានផែនការបើកសាខានៅឆ្នាំ ២០២០។
វិស័យធានារ៉ាប់រង ដែលទើបតែចាប់ផ្តើមនៅកម្ពុជា ក៏ទទួលបានការជំរុញការវិនិយោគក្នុងឆ្នាំ២០១៨ផងដែរ។
របាយការណ៍បានបន្តថា “ឧទាហរណ៍ ក្រុមហ៊ុនធានារ៉ាប់រងអាយុជីវិត Manulife (កាណាដា) បានពង្រីកធនាគារ South Pacific (ប៉ាពួញូហ្គីណេ) បានបំពេញការបណ្តាក់ទុនរួមគ្នាជាមួយដៃគូក្នុងស្រុក ហើយក្រុមហ៊ុន Dai-ichi Life Holdings (ប្រទេសជប៉ុន) បានបង្កើតក្រុមហ៊ុនបុត្រសម្ព័ន្ធ ដែលជាកម្មសិទ្ធិទាំងស្រុង ដោយមានគម្រោងវិនិយោគចំនួន ៣៧,៧លានដុល្លារ ក្នុងការពង្រីកបន្ថែមទៀតនៅក្នុងប្រទេស។
ក្រុមហ៊ុនដឹកជញ្ជូនបរទេសឥឡូវនេះ កំពុងប្រកួតប្រជែងគ្នាសម្រាប់ទីផ្សារវិនិយោគនៅកម្ពុជា។
របាយការណ៍បានបន្តថា “កំណើនសកម្មភាពពាណិជ្ជកម្មអន្តរជាតិ នៅក្នុងប្រទេសនេះ បានធ្វើឱ្យក្រុមហ៊ុនដឹកជញ្ជូន និងភ័ស្តុភារកាន់តែច្រើនវិនិយោគ និងពង្រីកនៅកម្ពុជា។ នៅឆ្នាំ ២០១៩ ក្រុមហ៊ុនសាជីវកម្ម Evergreen Marine Corporation (តៃវ៉ាន់) បានបង្កើតក្រុមហ៊ុនបុត្រសម្ព័ន្ធ ក្រុមហ៊ុនដឹកទំនិញ Nippon Express (ជប៉ុន) បានចាប់ផ្តើមសាងសង់ក្រុមហ៊ុនឃ្លាំង និងក្រុមហ៊ុនវេចខ្ចប់ Oji group (ជប៉ុន) បានពង្រីកបន្ថែមទៀត”៕
