ដោយ ម៉ាណេត
ភ្នំពេញៈ ក្រុមហ៊ុនជំនាញខាងសេវាកម្មអាហារធ្វើដំណើរ ដែលមានមូលដ្ឋាននៅបារាំង Newrest នឹងពង្រីកអាជីវកម្មរបស់ខ្លួនមកកាន់កម្ពុជា និងមីយ៉ាន់ម៉ានាពេលខាងមុខនេះ ។
ក្រុមហ៊ុន EM Food Services Pte Ltd គ្រប់គ្រងដោយអាជីវកម្មបែបគ្រួសារ Alain Dupuis និងមានការិយាល័យកណ្តាលនៅសឹង្ហបូរី។ ក្រុមអាជីវកម្មជំនាញខាងម្ហូបអាហារ និងភេសជ្ជៈឥឡូវនេះ រកចំណូលបាន២០លានផោនក្នុងមួយឆ្នាំ។
ជាមួយនឹងការទិញនេះ ក្រុមហ៊ុន Newrest បានឱ្យដឹងថា ខ្លួនរំពឹងថានឹងពន្លឿនការអភិវឌ្ឍអាជីវកម្មរបស់ខ្លួន នៅក្នុងទីផ្សារសេវាកម្មម្ហូបអាហារ តាមកិច្ចសន្យានៅអាស៊ី និងមានសកម្មភាពលក់រាយ (គ្រប់គ្រងបារ និងភោជនីយដ្ឋាន) ក្រោមការផ្តល់សម្បទាននៅក្នុងព្រលានយន្តហោះក្នុងតំបន់។
ម្ចាស់ភាគហ៊ុន EM Food Services ដែលជាម្ចាស់ភាគហ៊ុនល្បីឈ្មោះមួយរូបលោក Lars Crone នៅក្នុងវិស័យម្ហូបអាហារ និងភេសជ្ជៈនឹងចាកចេញពីអាជីវកម្មនេះ។
លោក Crone បានមានប្រសាសន៍ថា “ក្រុមគ្រួសារ Dupuis និងដៃគូរបស់ខ្លួនមានការរំភើបចំពោះគំនិត នៃការស្វាគមន៍ក្រុម Newrest Group មកកាន់កម្ពុជា និងមីយ៉ាន់ម៉ា”។ លោកបន្តថា “ជំនាញក្នុងសេវាកម្មម្ហូបអាហារក្រៅផ្ទះរបស់ក្រុម ដូចជា Newres ដែលបានបង្កើតប្រតិបត្ដិការអន្ដរជាតិ យ៉ាងទូលំទូលាយរួចជាស្រេច រួមផ្សំនឹងសមត្ថភាពរបស់ខ្លួន ក្នុងការទិញយកភាគហ៊ុន ដោយការពារគំរូអាជីវកម្មក្រុមហ៊ុននីមួយៗ នឹងធានាបាននូវការរីកចម្រើន និងទទួលបានជោគជ័យបន្ថែមទៀតសម្រាប់ក្រុមហ៊ុន និងបុគ្គលិករបស់យើង។
ក្រុមហ៊ុន EM Food Services គ្រប់គ្រង និងប្រតិបត្តិការសម្បទានអាហារនៅអាកាសយានដ្ឋានជាមួយ EMCAT ដោយផ្តល់សេវាកម្មកិច្ចសន្យា ក្រោមការគ្រប់គ្រងក្រុមហ៊ុន Hagar Catering និងកន្លែងផលិតចំណីអាហារ ជាមួយសេវាកម្មនៅតាមតំបន់មេគង្គនៅជាង ៦០កន្លែង ដោយមានបុគ្គលិក១០០០នាក់ បម្រើអាហារច្រើនជាង១៤ លានអាហារ ឬផលិតផលអាហារក្នុងមួយឆ្នាំ។
ក្រុមហ៊ុន Newrest មានសកម្មភាពនៅក្នុងការផ្តល់សេវាម្ហូបអាហារ និងផ្នែកបដិសណ្ឋារកិច្ច ដែលពាក់ព័ន្ធទាំងអស់ រួមទាំងការផ្តល់សេវាកម្មយន្តហោះ និងការទិញទំនិញផេ្សង។
ក្រុមហ៊ុន Newrest មានប្រាក់ចំណូលជិត១,៩ពាន់លានអឺរ៉ូ ក្នុងឆ្នាំ ២០១៧/១៨ និងមាននិយោជិក៣២,០០០ នាក់ក្នុង៤៩ប្រទេសនៅទូទាំងពិភពលោក៕
