ដោយ Donald Lee
ភ្នំពេញ៖ ធនាគារពាណិជ្ជកម្មនៅក្នុងរដ្ឋធានីភ្នំពេញបានផ្តល់ទុវិនិយោគលើការរីកចម្រើននៃអចលនទ្រព្យជាមួយនឹងប្រាក់កម្ចីអចលនទ្រព្យ និងសំណង់មានចំនួនជាងមួយភាគបីនៃផលប័ត្ររបស់ពួកគេ។ នេះបើយោងតាមរបាយការណ៍ចេញផ្សាយដោយធនាគារពិភពលោកនៅថ្ងៃ ពុធនេះ។
ភាគរយនៃប្រាក់កម្ចីទាក់ទងនឹងអចលនទ្រព្យគឺជាការកើនឡើងយ៉ាងខ្លាំងពីឆ្នាំមុន និងស្របពេលជាមួយនឹងលំហូរចូលយ៉ាងច្រើននៃការវិនិយោគផ្ទាល់ពីបរទេសដែលភាគច្រើនមកពីប្រទេសចិន។ ទន្ទឹមនឹងការព្យាករណ៍កំណើនសេដ្ឋកិច្ចក្នុងតំបន់របស់ធនាគារពិភពលោក វិស័យអចលនទ្រព្យនៅកម្ពុជាត្រូវបានរំពឹងថានឹងបន្តពង្រីកជាមួយនឹងការវិនិយោគផ្ទាល់ក្នុងស្រុក និងបរទេស។
ខណៈការនាំចេញពាណិជ្ជកម្មត្រូវបានព្យាករថាមានភាពយឺតយ៉ាវ វិស័យអចលនទ្រព្យនៅតែបន្តជំរុញឧស្សាហកម្មសេវាកម្មហិរញ្ញវត្ថុរបស់កម្ពុជាដោយក្លាយជាអតិថិជនធំបំផុតនៃផលិតផលប្រាក់កម្ចីរបស់ពួកគេ។ ប្រាក់កម្ចីទាក់ទងនឹងអចលនទ្រព្យកាន់កាប់កន្លែងធំបំផុតនៅក្នុងផលប័ត្ររបស់ធនាគារពាណិជ្ជកម្មនៅកម្ពុជា។
របាយការណ៍ធនាគារពិភពលោក បានបញ្ជាក់ថា “នៅក្នុងខែ មិថុនា ឆ្នាំ ២០១៩ ឥណទានធនាគារនឹងរួមបញ្ចូលគ្នានូវវិស័យសំណង់អចលនទ្រព្យ និងបញ្ចាំបានកាន់កាប់ចំណែកធំជាងគេគឺ ២៩,៥ ភាគរយនៃឥណទានធនាគារសរុបចំនួន ២១,៩ ពាន់លានដុល្លារដែលបានផ្តល់ដល់វិស័យមិនមែនហិរញ្ញវត្ថុរបស់កម្ពុជា”។
មុនពេលមានវិបត្តិហិរញ្ញវត្ថុសកលកាលពី ១០ ឆ្នាំមុន ឥណទានរបស់វិស័យសំណង់នៅកម្ពុជាបានឈានដល់ត្រឹម ២៣ ភាគរយប៉ុណ្ណោះ។របាយការណ៍របស់ធនាគារពិភពលោក បានបញ្ជាក់ថា គិតត្រឹមឆមាសទី ១ នៃឆ្នាំ ២០១៩ ធនាគារពាណិជ្ជកម្មនានាក្នុងរាជធានីភ្នំពេញបានផ្តល់ប្រាក់កម្ចីដែលមានទំហំទឹកប្រាក់ចំនួន ៦,៤ ពាន់លានដុល្លារដែលមិនគួរឱ្យជឿសម្រាប់អាជីវកម្មដែលទាក់ទងនឹងអចលនទ្រព្យដែលធ្វើឱ្យអត្រាឥណទានរបស់ធនាគារកើនឡើង ៤០ ភាគរយ។
ស្ថាប័នហិរញ្ញត្ថុ Moody’s Investors Service Inc បានកត់សំគាល់នៅក្នុងរបាយការណ៍ឥណទានប្រចាំឆ្នាំរបស់ខ្លួននៅដើមឆ្នាំនេះថា សេដ្ឋកិច្ចកម្ពុជាកំពុងឈានទៅរកកំណើនថេរ ដោយសារការវិនិយោគផ្ទាល់ពីបរទេសពីចិនចូលក្នុងវិស័យអចលនទ្រព្យ។
ទោះយ៉ាងណា របាយការណ៍នេះក៏បានព្រមានផងដែរថា ការពឹងផ្អែករបស់វិស័យធនាគារលើវិស័យអចលនទ្រព្យអាចនឹងធ្វើឱ្យឧស្សាហកម្មហិរញ្ញវត្ថុប្រឈមនឹងគ្រោះថ្នាក់ ប្រសិនបើការវិនិយោគបរទេសចូលមកកម្ពុជាំមានការបាត់បង់ ដោយ សារការប្រែប្រួលសេដ្ឋកិច្ចពិភពលោកជាពិសេសសង្គ្រាមពាណិជ្ជកម្មរវាងអាមេរិក និងចិន និងវិនិយោគិនបារម្ភអំពីសកលលោកដែលជិតនឹងជួបវិបត្តិសេដ្ឋកិច្ច។
របាយការណ៍បច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោកចេញផ្សាយនៅថ្ងៃពុធនេះ បានបញ្ជាក់ថា សេដ្ឋកិច្ចតំបន់អាស៊ីនឹងថមថយ ដោយសារសង្គ្រាមពាណិជ្ជកម្មចិន និងអាមេរិក និងការរំខានដល់សង្វាក់តម្លៃពិភពលោកដែលមាននៅក្នុងសេដ្ឋកិច្ចអាស៊ីដែលពឹងផ្អែកលើពាណិជ្ជកម្ម។
របាយការណ៍បានបញ្ជាក់ថា សេដ្ឋកិច្ចកម្ពុជាត្រូវបានរំពឹងថានឹងមានយឺតយ៉ាវនៅឆ្នាំក្រោយ ប៉ុន្តែនៅតែជាប្រទេសមួយក្នុងចំណោមប្រទេសដែលមានការរីកចម្រើនលឿនបំផុតនៅអាស៊ី។ របាយការណ៍នេះ ឱ្យដឹងថា “សេដ្ឋកិច្ចកម្ពុជារំពឹងនឹងធ្លាក់ចុះយឺតៗក្នុងរយៈពេលខ្លី និងមធ្យម”។ របាយការណ៍បានបន្ថែមទៀតថា “កំណើនសេដ្ឋកិច្ចកម្ពុជាត្រូវបានព្យាករណ៍ថានឹងទទួលបាន ៧ ភាគរយក្នុងឆ្នាំ ២០១៩ បើប្រៀបធៀបទៅនឹង ៧,៥ ភាគរយនៅក្នុងឆ្នាំ ២០១៨”៕
