ដោយ ៖ រ៉ាណេត
ភ្នំពេញ ៖ គិតមកត្រឹមចុងខែតុលា ឆ្នាំ២០១៩កន្លងទៅនេះ វិស័យសំណង់នៅកម្ពុជាមានការកើនឡើងនៅទូទាំងប្រទេស ដោយបានបង្កើនទំហំទឹកប្រាក់វិនិយោគរហូតដល់ជាង ៧០០០លានដុល្លារសហរដ្ឋអាមេរិក នៅលើគម្រោងជិត ៤០០០ ដែលគ្រោងសាងសង់នៅលើផ្ទៃក្រឡាដីជាង ១៥លានម៉ែត្រការ៉េ។
នាយកដ្ឋានស្ថិតិ និងវិភាគសេដ្ឋកិច្ច នៃក្រសួងសេដ្ឋកិច្ច និងហិរញ្ញវត្ថុ បានបង្ហាញឱ្យដឹងថា ពាក់ព័ន្ធទៅនឹងគម្រោងវិនិយោគលើវិស័យសំណង់ គិតត្រឹមខែតុលា ឆ្នាំ២០១៩ កន្លងទៅនេះ ក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតលើសំណើសុំសាងសង់សំណង់នៅស្ទើរទូទាំងប្រទេសរហូតដល់ ៣៦២៥ គម្រោង ជាមួយនឹងតម្លៃនៃទំហំទុនវិនិយោគសរុប ៧ ៥៦៤ លានដុល្លារអាមេរិក គ្រោងសាងសង់នៅលើផ្ទៃក្រឡាប្រមាណជាង ១៥លានម៉ែត្រការ៉េ។
ដោយឡែកគ្រាន់តែនៅក្នុងខែតុលា ឆ្នាំ២០១៩ កន្លងទៅនេះ គម្រោងសាងសង់សំណង់គ្រប់ប្រភេទចំនួន ៥៣៤ ត្រូវបានក្រសួងរៀបចំដែនដី នគរូបនីយកម្ម និងសំណង់ អនុញ្ញាត ដោយគ្រោងសាងសង់លើផ្ទៃដីជាង ២ លានម៉ែត្រការ៉េ ក្នុងទំហំវិនិយោគជាទឹកប្រាក់ប្រមាណជាង ១០០០លានដុល្លារសហរដ្ឋអាមេរិក។
ការអភិវឌ្ឍន៍វិស័យសំណង់នេះ ចំពោះសំណើរសុំសាងសង់តាមប្រភេទនីមួយៗរួមមាន ៖ សំណង់សាធារណៈមានប្រមាណ ៧២ គម្រោង ប្រើប្រាស់ថវិកាជាតិមានចំនួន ២៩ គម្រោង និងថវិកាវិស័យឯកជនមានចំនួន ៤៣ គម្រោង, ការសាងសង់លំនៅឋាន និងភូមិគ្រឹះមានជាង ៣០០០ គម្រោង, សំណង់ឧស្សាហកម្ម មាន ១៦៧ គម្រោង, សំណង់ពាណិជ្ជកម្មមាន ២៥៥ គម្រោង, សំណង់ទេសចរណ៍មាន ១០៩ គម្រោង និងសំណង់ផ្សេងៗទៀតមានចំនួន ២២ គម្រោងផងដែរ ដោយក្នុងនោះ ពាក់ព័ន្ធផ្ទៃក្រឡា ដែលផ្តល់ការអនុម័តឱ្យសាងសង់ដោយមន្ទីរ មានចំនួនជាង ២ លាន ៣ សែនម៉ែត្រការ៉េ និងការផ្តល់ដោយក្រសួងរៀបចំដែនដី នគរូបនីយកម្ម និងសំណង់ មានចំនួនជាង ១២ លានម៉ែត្រការ៉េ។
យោងតាមរបាយការណ៍ដែលចេញដោយក្រុមហ៊ុនអចលនទ្រព្យអន្តរជាតិ CBRE Cambodia កាលពីពេលកន្លងទៅនេះបានបង្ហាញថា វិស័យខុនដូរដែលជាផ្នែកមួយនៅក្នុងវិស័យសំណង់នៅកម្ពុជាមានការកើនឡើង ដោយគិតត្រឹមត្រីមាសទី៣នៃឆ្នាំ២០១៩ មានការដាក់បញ្ចូលនៅលើទីផ្សារបន្ថែមចំនួន ៩ អគារ ស្មើនឹង ៥១៤០យូនីត។
នាយិកាក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានមានប្រសាសន៍បង្ហាញពីភាពសុទិដ្ឋិនិយមជាមួយនឹងរបាយការណ៍ខាងលើនេះ ។ លោកស្រីបានមានប្រសាសន៍តាមទូរស័ព្ទកាលពីរសៀលថ្ងៃទី២៧ ខែវិច្ឆិកា ឆ្នាំ២០១៩ នេះថា “កំណើននៃគម្រោងអភិវឌ្ឍលើវិស័យសំណង់នេះ គឺកើតឡើងក្រោមទំនុកចិត្តរបស់អ្នកវិនិយោគទាំងនៅក្នុងស្រុក និងមកពីក្រៅស្រុក”។
លោកស្រីបានបន្តទៀតថា “ជាក់ស្ដែងដូចជាវិស័យខុនដូរដែលធ្លាប់តែមានភាពស្ងប់ស្ងាត់ ពេលនេះបានបង្ហាញបង្ហាញពីភាពពុះកញ្ច្រោលរបស់ខ្លួន និងមានតម្រូវការខ្ពស់លើផ្នែកខុនដូរតម្លៃមធ្យម ដែលភាគច្រើនអតិថិជនគឺជាជនជាតិខ្មែរ មិនមែនបរទេសនោះទេ ដូច្នេះប្រសិនបើអ្នកបញ្ជាទិញជាជនជាតិខ្មែរ មានន័យថា ទីផ្សារវិស័យនេះមិនមានអ្វីដែលត្រូវព្រួយបារម្ភនោះទេ”។
លោកស្រីបានបញ្ជាក់ទៀតថា “មិនថាចំពោះចុងឆ្នាំនេះ ឬនៅឆ្នាំក្រោយក្រោយនោះទេ លំហូរនៃការវិនិយោគនៅតែមានជាធម្មតា ឬអាចល្អប្រសើរជាងឆ្នាំចាស់ ដោយសារតែបច្ចុប្បន្ននេះ មានគម្រោងជាច្រើន បាន និងកំពុងត្រៀមខ្លួនប្រកាសប្រតិបត្តិការនៅក្នុងទីផ្សារកម្ពុជា ដែលក្នុងនោះក្រៅពីក្រុមហ៊ុនចិន នៅមានក្រុមហ៊ុនជប៉ុន តៃវ៉ាន់ សិង្ហបុរី និងកូរ៉េ ផងដែរ” ៕
