ដោយ ម៉ាណេត
ភ្នំពេញ៖ វាគួរឱ្យភ្ញាក់ផ្អើលដែលដឹងថា សេដ្ឋកិច្ចកម្ពុជាមានអត្រាកំណើនខ្ពស់បំផុតនៅតំបន់អាស៊ីអាគ្នេយ៍ ហើយតំបន់នេះត្រូវបានមើលឃើញថាជាក្បាលម៉ាស៊ីននៃសេដ្ឋកិច្ចពិភពលោក។
មនុស្សជាច្រើនអាចពិចារណាថា វៀតណាមកំពុងរីកចម្រើនខ្លាំងជាងសមាជិកដទៃទៀតនៃសមាគមប្រជាជាតិអាស៊ីអាគ្នេយ៍ ដោយប្រទេសនេះទទួលបានការយកចិត្តទុកដាក់យ៉ាងខ្លាំងថាជាទិសដៅសម្រាប់ប្រតិបត្តិការផលិតកម្មចិន នៅពេលមានសង្គ្រាមពាណិជ្ជកម្មរវាងអាមេរិកនិងចិន។ប៉ុន្តែក្នុងនាមជាប្រទេសដែលមានការអភិវឌ្ឍតិចតូច កម្ពុជាមានសក្តានុពលខ្លាំងសម្រាប់រក្សាកំណើនសេដ្ឋកិច្ច។
ការព្យាករណ៍របស់មូលនិធិរូបិយវត្ថុអន្ដរជាតិ (IMF) នៅក្នុងចក្ខុវិស័យសេដ្ឋកិច្ចក្នុងតំបន់របស់ខ្លួនដែលបានចេញផ្សាយនៅពាក់កណ្តាលខែតុលាថា ផលិតផលក្នុងស្រុកសរុបរបស់កម្ពុជានឹងកើនឡើង ៧ ភាគរយនៅឆ្នាំ ២០១៩ ដែលមានកំណើនច្រើនជាងវៀតណាមដែលមានកំណើនត្រឹម ៦,៥ ភាគរយ។
កម្ពុជាបានរក្សាជំហរជាប្រទេសដែលមានកំណើនសេដ្ឋកិច្ចលឿនបំផុតនៅក្នុងតំបន់ចាប់តាំងពីឆ្នាំ ២០១៧។ ក្រៅពី IMF ធនាគារពិភពលោក និងធនាគារអភិវឌ្ឍន៍អាស៊ីក៏បានព្យាករណ៍ថា កម្ពុជានឹងរក្សាបាននូវកំណើនសេដ្ឋកិច្ចខ្ពស់ប្រហែល ៧ ភាគរយ ក្នុងឆ្នាំ ២០១៩ ។
នៅពេលដែលប្រទេសមានសេដ្ឋកិច្ចធំៗ នៅអាស៊ី ដូចជា ចិន ឥណ្ឌា ឥណ្ឌូនេស៊ី និងថៃកំពុងពុះពារនឹងការធ្លាក់ចុះសេដ្ឋកិច្ច សេដ្ឋកិច្ចកម្ពុជានៅតែរឹងមាំ ដោយសារមូលហេតុ ៣ យ៉ាងដូចបានឃើញក្នុងការព្យាករណ៍របស់ IMF ។ទីមួយគឺការនាំចេញសម្លៀកបំពាក់ និងផលិតផលផ្សេងទៀតត្រូវបានព្យាករណ៍ថានឹងកើនឡើង ១២ ភាគរយនៅឆ្នាំ ២០១៩។
ទោះបីការនាំចូលត្រូវបានព្យាករណ៍ថានឹងកើនឡើង ១៦ ភាគរយ និងបង្កើនឱនភាពគណនីចរន្តដល់ ១៣ ភាគរយនៃផលិតផលសរុបក្នុងស្រុកក៏ដោយ ឱនភាពនោះនឹងមានច្រើនជាងការទូទាត់ដោយការវិនិយោគផ្ទាល់ពីបរទេសឈានដល់ ២៤ ភាគរយនៃផលិតផលសុរបក្នុងស្រុកដែលជាកត្តារួមចំណែកទី ២ ក្នុងការធ្វើឱ្យសេដ្ឋកិច្ចកម្ពុជាឆាប់រហ័ស។
មូលហេតុទី ៣ គឺអត្រាអតិផរណាមធ្យម ២,២ ភាគរយ ទោះបីមានការឡើងថ្លៃប្រេងឆៅដែលប្រជាជនកម្ពុជាពឹងផ្អែកទាំងស្រុងលើការនាំចូលក៏ដោយ៕
