ដោយ ៖ រ៉ាណេត
ភ្នំពេញ ៖ ក្រសួងរ៉ែ និងថាមពល ដែលជាសេនាធិការរបស់រាជរដ្ឋាភិបាល បាន នឹងកំពុងកសាង និងដាក់ចេញនូវលិខិតបទដ្ឋានគតិយុត្ត និងបទដ្ឋានបច្ចេកទេសមួយចំនួនដើម្បីធានាសុវត្ថិភាព និងគ្រប់គ្រងវិស័យប្រេងកាតឱ្យមានប្រសិទ្ធភាព។
ការដាក់ចេញនូវយុទ្ធនាការនៃការអនុវត្តច្បាប់ស្ដីពីការគ្រប់គ្រងប្រេងកាត និងផលិតផលប្រេងកាតរួមមានបទប្បញ្ញត្តិដែលពាក់ព័ន្ធនឹងការងារនេះមួួយចំនួនដូចជាច្បាប់ស្តីពីការគ្រប់គ្រងប្រេងកាត និងផលិតផលប្រេងកាត សារាចរស្តីពីសុវត្ថិភាព សម្រាប់រៀបចំស្ថានីយប្រេង និងឧស្ម័នឥន្ធនៈ ប្រកាសស្តីពីនីតិវិធីនៃការគ្រប់គ្រងបច្ចេកទេស សុវត្ថិភាព បង្កើតស្ថានីយប្រេង និងឧស្ម័នឥន្ធនៈ។
ការសម្រេចកំណត់ឱ្យអនុវត្តនេះ ដើម្បីជាមូលដ្ឋានគតិយុត្តក្នុងការគ្រប់គ្រង និងជាមូលដ្ឋានបច្ចេកទេសសុវត្ថិភាពសម្រាប់ការបង្កើតស្ថានីយថ្មី និងការកែសម្រួលសំណង់ស្ថានីយចាស់ឱ្យមានសុវត្ថិភាព ក្នុងគោលដៅកាត់បន្ថយឧបទ្ទវហេតុ គ្រោះអគ្គីភ័យដែលអាចកើតមានឡើងជាយថាហេតុ។
ក្រសួងរ៉ែ និងថាមពលបានពិនិត្យឃើញថា មានម្ចាស់ស្ថានីយប្រេង និងឧស្ម័នឥន្ធនៈមួយចំនួននៅតាមបណ្តារាជធានី / ខេត្ត កំពុងធ្វើការសាងសង់ និងដំណើរការស្ថានីយប្រេង និងឧស្ម័នឥន្ធនៈរបស់ខ្លួន ដោយខុសបទដ្ឋានបច្ចេកទេស និងពុំបានស្នើសុំការអនុញ្ញាតពីក្រសួងរ៉ែ និងថាមពលនៅឡើយ។
ក្រសួងរ៉ែ និងថាមពល បានធ្វើការណែនាំដល់ម្ចាស់ស្ថានីយទាំងនោះពីបទដ្ឋានសុវត្ថិភាពនីតិវិធីច្បាប់រួចហើយ។ ជាលទ្ធផល ក្រសួងរ៉ែ និងថាមពលសង្កេតឃើញថា មានម្ចាស់ស្ថានីយប្រេង និងឧស្ម័នឥន្ធនៈជាច្រើន ចាប់ផ្តើមមកដាក់ពាក្យស្នើសុំការអនុញ្ញាតជាបន្តបន្ទាប់ នៅតាមបណ្តាមន្ទីររ៉ែ និងថាមពលរាជធានី / ខេត្ត និងនៅក្រសួងរ៉ែ និងថាមពល។
ជំហានបន្ត ក្រសួងរ៉ែនិងថាមពល តាមរយៈក្រុមការងារចុះត្រួតពិនិត្យ និងអធិការកិច្ចសកម្មភាពក្នុងវិស័យប្រេងកាត នឹងចុះត្រួតពិនិត្យអនុលោមភាពតាមច្បាប់ លិខិតបទដ្ឋានគតិយុត្ត និងបទប្បញ្ញត្តិបច្ចេកទេសពាក់ព័ន្ធនានាជាធរមាន។
វិធានការច្បាប់ ទប់ស្កាត់សកម្មភាពខុសច្បាប់ និងបទល្មើសនានាក្នុងវិស័យប្រេងកាត និងត្រូវអនុវត្តយ៉ាងម៉ឺងម៉ាត់ ដោយមន្ត្រីអធិការកិច្ចដែលមាននីតិសម្បទាជានគរបាលយុត្តិធម៌។
ក្រសួងរ៉ែ និងថាមពល សូមអំពាវនាវដល់ម្ចាស់ស្ថានីយ និងអាជីវករប្រេង និងឧស្ម័នឥន្ធនៈទាំងអស់ សហការអនុវត្តបទដ្ឋានបច្ចេកទេសសុវត្ថិភាព និងគោរពច្បាប់ទាំងអស់គ្នា សំដៅរក្សាបាននូវនិរន្តភាពនៃអាជីវកម្មរបស់បងប្អូនអាជីវករ និងរក្សាបាននូវនិរន្តភាពនៃបែបផែនបច្ចេកទេសសុវត្ថិភាពទាំងអស់គ្នា ដើម្បីឱ្យមានសុខដុមនីយកម្មក្នុងមុខរបរផង និងសង្គតិភាពនៃការអនុវត្តច្បាប់ ប្រកបដោយសុវត្ថិភាពទាំងអស់គ្នា៕
