ដោយ ប៊ី
ភ្នំពេញៈ ក្រុមហ៊ុនឥដ្ឋការ៉ូ និងឥដ្ឋមួយចំនួនមកពីប្រទេសចិន គ្រោងនឹងវិនិយោគនៅកម្ពុជា ដើម្បីទាញយកប្រយោជន៍ពីវិស័យសំណង់ និងអចលនទ្រព្យដែលកំពុងរីកចម្រើននាពេលបច្ចុប្បន្ន។
ការលើកឡើងពីគម្រោងវិនិយោគនេះត្រូវបានធ្វើឡើងក្នុងជំនួបប្រជុំរវាង លោកទេសរដ្ឋមន្ត្រីចម ប្រសិទ្ធ និងសមាគមវិស័យឥដ្ឋការ៉ូ និងឥដ្ឋសំណង់ចិនកាលពីសប្តាស៍មុន។
ប្រតិភូសមាគមវិស័យឥដ្ឋការ៉ូ និងឥដ្ឋចិន មួយក្រុមដឹកនាំដោយ លោកស្រី Xu Yanming ជាប្រធាន ដើម្បីពិភាក្សាការងារទាក់ទង និងការចង់សិក្សាស្វែងយល់ពីឱកាសវិនិយោគលើវិស័យឧស្សាហកម្មផលិតឥដ្ឋការ៉ូ និងឥដ្ឋសំណង់នៅកម្ពុជា។ ក្នុងនោះក៏ចង់ដឹងពីគោលនយោបាយលើកទឹកចិត្ត ក្នុងច្បាប់វិនិយោគរបស់កម្ពុជាផងដែរ។
លោកទេសរដ្ឋមន្ត្រីចម ប្រសិទ្ធ បានសម្តែងការស្វាគមន៌ និងបានជម្រាបសក្តានុពល និងភាពអំណោយផល ចំពោះការវិនិយោគលើវិស័យផលិតគ្រឿងសំណង់នៅកម្ពុជា ស្របពេលដែលកម្ពុជាកំពុងមានការរីកចម្រើនខ្លាំងលើវិស័យនេះ។
លោកបានបញ្ជាក់ថា បច្ចុប្បន្នទោះបីមានក្រុមហ៊ុន រោងចក្រ និងសិប្បកម្មមួយចំនួនកំពុងផលិត វិស័យឥដ្ឋការ៉ូ ឥដ្ឋសំណង់ រឺក្បឿងនៅកម្ពុជាក៏ដោយ ក៏ប៉ុន្តែកម្ពុជានៅតែនាំចូលគ្រឿងសំណង់ទាំងនេះពីក្រៅប្រទេសផងដែរ។
ដូច្នេះកម្មវត្ថុវិនិយោគខាងលើនេះ លោកទេសរដ្ឋមន្ត្រី សូមស្វាគមន៍ និងស្នើឲ្យដាក់ពាក្យវិនិយោគនៅក្រុមប្រឹក្សាអភិវឌ្ឍន៍កម្ពុជា ដើម្បីពិនិត្យ វាយតម្លៃនិងសម្រេចថា អ្វីដែលត្រូវលើកទឹកចិត្តខ្លះ។
លោកបានបញ្ជាក់ថា “បើសិនជាផលិតផលរបស់ក្រុមហ៊ុនក្នុងសមាគមផលិតឥដ្ឋការ៉ូរឺឥដ្ឋសំណង់ទៅមានគុណភាពខ្ពស់តាមស្តង់ដារ ពិតជាមានទីផ្សារល្អនៅកម្ពុជា ព្រោះជួយកាត់បន្ថយការនាំចូលពីក្រៅ ហើយក៏អាចមានលទ្ធភាពធ្វើការនាំចេញទៅក្រៅតាមប្រពន្ធអនុគ្រោះពាណិជ្ជកម្មរបស់កម្ពុជាផងដែរ”។
លោកស្រីXu Yanming ជាប្រធានប្រតិភូបានបង្ហាញ នូវការចាប់អារម្មណ៌ចំពោះការវិនិយោគក្នុងទីផ្សារកម្ពុជា និងបញ្ជាក់ថា សមាគមឥដ្ឋការ៉ូ និងឥដ្ឋសំណង់ចិន គឺជាបណ្តុំរោងចក្រ ដែលផលិតមានលក្ខណៈល្បីល្បាញនៅប្រទេសចិន និងនាំចេញទៅលក់នៅក្រៅប្រទេសជាច្រើន ហើយសង្ឃឹមថានឹងមានទីផ្សារល្អនៅកម្ពុជា នោះពេលដែលសម្រេចចិត្តបង្កើតរោងចក្រនៅកម្ពុជា៕
