ដោយ វុត្ថា
ភ្នំពេញៈ នាយកប្រតិបត្តិក្រុមហ៊ុនស្រ្តងហូលត្រាសធី ឯ.ក ដែលជាអ្នកកវិនិយោគបរទេសបានឱ្យដឹងថា ប្រទេសកម្ពុជានាពេលបច្ចុប្បន្ននេះ មានសក្តានុពលខ្ពស់លើការវិនិយោគលើវិស័យអចលនទ្រព្យ និងវិស័យផ្សេងទៀត ខណៈវិស័យនេះបាននឹងកំពុងមានការរីកចំរើន។
លោក KEVIN Chang នាយកប្រតិបត្តិក្រុមហ៊ុនស្រ្តងហូលត្រាសធី ឯ.ក ក្នុងជំនួបពិភាក្សា ជាមួយលោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភានៅព្រឹក ថ្ងៃទី១៧ ខែធ្នូ ឆ្នាំ២០១៩កន្លងមក ដោយផ្តោតក្នុងគោលបំណងមកសិក្សាស្វែងយល់ពីច្បាប់វិនិយោគ និងសក្តានុពលសេដ្ឋកិច្ចនៅកម្ពុជា ដើម្បីធ្វើការវិនិយោគនៅកម្ពុជា។
លោក KEVIN Chang បន្តថា “ក្រោយពីបានសិក្សាស្វែងយល់ពីសក្តានុពលសេដ្ឋកិច្ចនៅកម្ពុជារួចមក ខ្ញុំយល់ឃើញ ថាប្រទេសកម្ពុជាមានសុខសន្តិភាព និងស្ថិរភាពល្អ និងមានសក្តានុពលយ៉ាងខ្លាំងក្នុងការវិនិយោគ លើវិស័យអចលនទ្រព្យ កសិកម្ម និងវិស័យផ្សេងៗជាច្រើនទៀត”។
លោកបន្តថា ក្រុមហ៊ុនរបស់លោកមកបណ្តាក់ទុននៅកម្ពុជា ដើម្បីរួមចំណែកជួយស្រូបយក កម្លាំងពលកម្មរបស់ប្រជាពលរដ្ឋកម្ពុជា និងរួមចំណែកកសាងប្រទេសកម្ពុជា ឱ្យមានការអភិវឌ្ឍរីកចម្រើនឡើង។
លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បានស្វាគមន៍ចំពោះក្រុមហ៊ុនស្រ្តងហូលត្រាសធី ឯ.ក ដែលបានមកបណ្តាក់ទុនរកស៊ីនៅកម្ពុជា។ លោកបន្តថា កម្ពុជា បានឆ្លងកាត់សង្រ្គាមរំារៃជា ច្រើនទស្សវត្សមកហើយ។ នៅក្នុងរបបប៉ុលពត ហេដ្ឋារចនាសម្ព័ននានាត្រូវបានបំផ្លាញរលាយខ្ទេចខ្ទីស្ទើគ្មានសល់។ របបនោះបាន សំលាប់ប្រជាពលរដ្ឋខ្មែរស្លូតត្រង់អស់ជិតបីលាននាក់។
លោកបន្ថែមថា កម្ពុជាបានបង្កើតច្បាប់ជាច្រើន ក្នុងនោះមានច្បាប់វិនិយោគដែលបានបើកទូលាយអោយអ្នកវិនិយោគទាំងក្នុងស្រុក និងមកពីក្រៅប្រទេសអាចរកស៊ីបណ្តាក់ទុននៅកម្ពុជាបាន ប្រកបដោយទំនុកចិត្តខ្ពស់។
លោក KEVIN Chang បានបន្តថា លោកនឹងជួយផ្សព្វផ្សាយពីសក្ដានុពលរបស់កម្ពុជាដល់វិនិយោគិនផ្សេងៗទៀត អោយមកបណ្តាក់ទុនរកស៊ីនៅកម្ពុជា ឲ្យបានកាន់តែច្រើនទៀត៕
