ដោយ Donald Lee
ភ្នំពេញ៖ ក្រសួងហិរញ្ញវត្ថុជប៉ុនបានចេញផ្សាយរបាយការណ៍បង្ហាញថា ការនាំចេញរបស់ខ្លួនបានធ្លាក់ចុះម្តងទៀតនៅក្នុងខែ វិច្ឆិកា ដែលអាចនាំឱ្យមានធ្លាក់ចុះនៃការព្យាករណ៍ផលិតផលសុរបក្នុងស្រុក (GDP) របស់ខ្លូននៅត្រីមាសទីបួន។
ក្រសួងហិរញ្ញវត្ថុជប៉ុន បានឱ្យដឹងថា ការនាំចេញបានធ្លាក់ចុះ ៨ ភាគរយក្នុងខែ វិច្ឆិកា បើធៀបនឹងរយៈពេលដូចគ្នាកាលពីឆ្នាំមុន។ ការធ្លាក់ចុះនេះបង្ហាញពីនិន្នាការធ្លាក់ចុះមួយឆ្នាំនៃការធ្លាក់ចុះនៃការនាំចេញដែលគួរឱ្យព្រួយបារម្ភចាប់តាំងពីឆ្នាំ ២០១៦ មក។
ផលប៉ះពាល់នៃសង្គ្រាមពាណិជ្ជកម្មអាមេរិក និងចិនបានជះឥទ្ធិពលយ៉ាងខ្លាំងដល់សេដ្ឋកិច្ចជប៉ុនក្នុងឆ្នាំ ២០១៩ ដោយសារតែការពឹងផ្អែកលើពាណិជ្ជកម្ម។របាយការណ៍របស់មូលនិធិរូបិយវត្ថុអន្តរជាតិ (IMF) បានបញ្ជាក់ថា ភាពតានតឹងពាណិជ្ជកម្មពិភពលោកនឹងចាប់ផ្តើមជះឥទ្ធិពលដល់វិស័យហិរញ្ញវត្ថុរបស់ខ្លួន។
IMF បានឱ្យដឹងថា “ភាពតានតឹងពាណិជ្ជកម្មសកលដែលកំពុងបន្ត និងការកើតឡើងបន្ថែមទៀតអាចកាត់បន្ថយការ នាំចេញ ការវិនិយោគ និងកំណើនសុទ្ធរបស់ជប៉ុន រួមទាំងផលប៉ះពាល់ដោយផ្ទាល់ និងប្រយោលតាមរយៈខ្សែសង្វាក់តម្លៃពិភពលោក និងការជះឥទ្ធិពលមិនល្អដល់វិស័យហិរញ្ញវត្ថុរបស់ជប៉ុន”។
ជាសំណាងល្អ អាមេរិក និងចិនបានយល់ព្រមបញ្ឈប់សង្គ្រាមពាណិជ្ជកម្មរយៈពេល ១៧ ខែរបស់ពួកគេកាលពីសប្តាហ៍មុន។ កិច្ចព្រមព្រៀងពាណិជ្ជកម្មដំណាក់កាលទី ១ រវាងអាមេរិក និងចិនបានបញ្ឈប់សង្គ្រាមពាណិជ្ជកម្មដ៏ថ្លៃបំផុតមួយក្នុងប្រវត្តិសាស្រ្ត ហើយបាននាំមកនូវសញ្ញាដំបូងនៃការថយចុះនៃសង្រ្គាមពាណិជ្ជកម្មរយៈពេល ១៧ ខែរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។
ក្រុមអ្នកវិភាគបានណែនាំឱ្យរដ្ឋាភិបាលជប៉ុនកាត់បន្ថយអត្រាការប្រាក់ដើម្បីរក្សាសេដ្ឋកិច្ចឱ្យរីកចម្រើន ខណៈខ្សែសង្វាក់តម្លៃពិភពលោកនៅអាស៊ីចាប់ផ្តើមធូរស្រាល និងធ្វើឱ្យប្រសើរឡើងវិញ។ មូលនិធិរូបិយវត្ថុអន្ដរជាតិក៏បានណែនាំដល់ធនាគារជប៉ុនឱ្យធ្វើការកែសម្រួលអត្រាការប្រាក់ឱ្យសមស្របទៅនឹងធនាគារកណ្តាលអាស៊ីផ្សេងទៀតដែលកំពុងមានប្រតិកម្មទៅនឹងការធ្លាក់ចុះនៃសេដ្ឋកិច្ចពិភពលោក និងផលប៉ះពាល់នៃសង្គ្រាមពាណិជ្ជកម្មរវាងអាមេរិក និងចិនដែលធ្វើឱ្យប៉ះពាល់ដល់តំបន់អាស៊ី។
របាយការណ៍របស់ IMF បានឱ្យដឹងថា “ជំហរគោលនយោបាយរូបិយវត្ថុមិនមានការផ្លាស់ប្តូរច្រើនទេចាប់តាំងពីឆ្នាំ ២០១៦ ប៉ុន្តែសម្ពាធកំពុងកើនឡើងដើម្បីផ្តល់នូវសកម្មភាពជំរុញបន្ថែមទៀតស្របតាមធនាគារកណ្តាលធំៗដទៃទៀត”។
នាយកគ្រប់គ្រង IMF លោក Kristalina Georgieva បានថ្លែងនៅក្នុងសន្និសីទកាសែតមួយនៅទីក្រុងតូក្យូកាលពីខែមុនថា “គោលនយោបាយសារពើពន្ធគួរតែគាំទ្រដើម្បីការពារកំណើនសេដ្ឋកិច្ចក្នុងរយៈពេលខ្លី និងជំរុញសន្ទុះអតិផរណា”។
បច្ចុប្បន្នធនាគារជប៉ុនកំពុងពិភាក្សាអំពីការកាត់បន្ថយអត្រាការប្រាក់នៅក្នុងកិច្ចប្រជុំគោលនយោបាយនៅសប្តាហ៍នេះ ប៉ុន្តែអ្នកសេដ្ឋកិច្ចភាគច្រើនជឿជាក់ថា ក្រុមប្រឹក្សាភិបាលនឹងប្រកាន់ខ្ជាប់នូវគោលការណ៍សំខាន់នៃគោលនយោបាយរូបិយវត្ថុរបស់ពួកគេ។
យោងតាមទិន្នន័យរបស់រដ្ឋាភិបាលជប៉ុន ប្រទេសដែលមានសេដ្ឋកិច្ចដ៏ធំបំផុតទីបីនៅលើពិភពលោកបានចាប់ផ្តើមធ្លាក់ចុះនៅក្នុងត្រីមាសទី ៣ ដោយមានអត្រាកំណើនផលិតផលក្នុងស្រុកសរុប ០,២ ភាគរយ។លើសពីនេះទៀត សង្គ្រាមពាណិជ្ជកម្មជាមួយកូរ៉េខាងត្បូងមានប្រជាជនកូរ៉េភាគច្រើនធ្វើពហិការមិនធ្វើអាជីវកម្ម និងប្រើសេវាកម្មរបស់ជប៉ុនទាំងអស់។
ទំនាក់ទំនងសេដ្ឋកិច្ចនយោបាយនិងវប្បធម៌រវាងប្រទេសយក្សសេដ្ឋកិច្ចអាស៊ីទាំងពីរបានឈានដល់កម្រិតទាបជាប្រវត្តិសាស្ត្រ។ប្រជាជនកូរ៉េខាងត្បូងបានធ្វើពហិការរាល់អ្វីៗទាំងអស់ដែលផលិតនៅជប៉ុនចាប់ ដោសារជប៉ុនបានដាក់កម្រិតលើការនាំចេញវត្ថុធាតុដើមដែលចាំបាច់នៅក្នុងខ្សែសង្វាក់ផ្គត់ផ្គង់ផលិតកម្មបច្ចេកវិទ្យារបស់កូរ៉េខាងត្បូង៕
