ដោយ វុត្ថា
ភ្នំពេញៈ ក្រសួងរៀបចំដែនដីនគរូបនីយកម្ម និងសំណង់បានប្រមូលចំណូលចូលថវិកាជាតិសរុបមានចំនួន ៤៥៦,៦១៧,៦៨៦,០៧៧រៀល ស្មើនឹងជាង ១០០លានដុល្លារអាមររិក គិតទាំងពន្ធប្រថាប់ត្រា លើការផ្ទេរអចលនទ្រព្យ។ នេះបើតាមរបាយការណ៍បូកសរុបលទ្ធផលនៃការអនុវត្តការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងរៀបចំដែនដី នគរូបនីយកម្ម និងសំណង់ ក្នុងសន្និបាតនៅថ្ងៃនេះ។
តាមរបាយការណ៍របស់ក្រសួងរៀបចំដែនដី ដែលភ្នាក់ងារសារព័ត៌មាន Fresh News ទទួលបាននៅព្រឹកថ្ងៃទី២៥ ខែធ្នូ ឆ្នាំ២០១៩នេះបានឱ្យដឹងទៀតថា ចំណូលដែលក្រសួងរៀបចំដែនដី បានប្រមូលបាននេះរួមមាន ទី១ ចំណូលរបស់រដ្ឋបាលកណ្តាលចំនួន ២៩, ១០៧, ៧៣៦, ៣៧៤រៀល ក្នុងនោះមាន សេវាសំណង់ទូទៅចំនួន ១៤, ៤០៩, ៤៨៩, ៧៥៨រៀល សេវាសំណង់លើសសន្ទស្សន៍ចំនួន ១៤, ៤១៧, ៧៨០, ០០០រៀល ការជួលអចលនទ្រព្យចំនួន២៨០, ៤៦៦, ៦១៦រៀល។
ទី២ ចំណូលរបស់មន្ទីរ ដ.ន.ស.ស.រាជធានីខេត្តចំនួន៨០, ២៣៤, ៨០៣, ២២៧រៀល ក្នុងនោះមានសេវាសុរិយោដីចំនួន៥០, ០២៥, ៧៨២, ៥១៤រៀល, លក្ខណៈជាប្រព័ន្ធចំនួន ១១, ៧៧១, ៥០៨, ៣០០រៀល, លក្ខណៈដាច់ដោយដុំចំនួន ៣៨, ២៥៤, ២៧៤, ២១៤រៀល, សេវាសំណង់ទូទៅចំនួន ៣០, ២០៩, ០២០, ៧១៣រៀល។
ទី៣ ពន្ធប្រថាប់ត្រា (អគ្គនាយកដ្ឋានពន្ធដារ) ចំនួន ៣៤៧, ២៧៥, ១៤៦, ៤៧៦រៀល។
របាយការណ៍ដដែលបានឱ្យដឹងទៀតថា គម្រោងលទ្ធកម្មសរុបសម្រាប់ឆ្នាំ២០១៩ មានចំនួន៣២គម្រោង ក្នុងនោះមានបានអនុវត្តនីតិវិធីទូទាត់ចំនួន២៩គម្រោង ស្មើនឹង ៩០.៦២%បន្តអនុវត្តចំនួន១គម្រោងស្មើនឹង៣.១% និងគម្រោងដែលមិនអាចអនុវត្តបានចំនួន២គម្រោងស្មើនឹង ៦.២៥ %៕
