ដោយៈ រ៉ាណេត
ភ្នំពេញៈ នៅក្នុងរយៈពេល ២៦ឆ្នាំ គិតចាប់ពីឆ្នាំ ១៩៩៣ ដល់ខែ ធ្នូ ឆ្នាំ២០១៩កន្លងទៅនេះ រដ្ឋាភិបាលបារាំងបានផ្ដល់ហិរញ្ញប្បទាន សហប្រតិបត្តិការចំនួនប្រមាណ ៨០២លានអឺរ៉ូ ស្មើនឹងប្រមាណជិត៩០០លានដុល្លារ ក្នុងនោះមានហិរញ្ញប្បទានឥតសំណងចំនួន២០១លានអឺរ៉ូ ឥណទានសម្បទានចំនួន៤៣៤លានអឺរ៉ូ និងឥណទានគ្មានការធានាពីរដ្ឋចំនួន១៦៧លានអឺរ៉ូ។
លោកឧបនាយករដ្ឋមន្ដ្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន បានចុះហត្ថលេខា ជាមួយលោកស្រី Ophélie BOURHIS នាយកទីភ្នាក់ងារបារាំងសម្រាប់អភិវឌ្ឍន៍ (AFD) ប្រចាំកម្ពុជាកាលពីចុងខែធ្នូ កន្លងទៅ លើកិច្ចព្រមព្រៀងឥណទានសម្បទានសម្រាប់គម្រោងចំនួន២បន្ថែមទៀត ដែលមានទឹកប្រាក់ឥណទានសម្បទានសរុបចំនួន ១១៨លានអឺរ៉ូ (ប្រមាណជា១២១,៣២ លានដុល្លារអាមេរិក) សម្រាប់អនុវត្តលើគំរោងមួយចំនួនដូចជា ទី១. ឥណទានសម្បទានចំនួន ១០០ លានអឺរ៉ូ (ប្រមាណជា ១០១,៤ លានដុល្លារអាមេរិក) សម្រាប់គម្រោងសាងសង់រោងចក្រប្រព្រឹត្តិកម្មទឹកស្អាតបាក់ខែង ដំណាល់កាលទី២។
តាមរយៈកិច្ចព្រមព្រៀងនេះ ទីភ្នាក់ងារបារាំងសំរាប់អភិវឌ្ឍន៍ (AFD) នឹងផ្តល់ឥណទានសម្បទានបន្ថែមចំនួន១០០លានអឺរ៉ូ សម្រាប់អនុវត្តគម្រោងនេះបន្តពីគម្រោងជំហានទី១។ គម្រោងនេះ មានទិសដៅ ទី១. សាងសង់ស្ថានីយ៍បូមទឹក ដែលមានសមត្ថភាពផលិតទឹកស្អាតបាន ១៩៥ ០០០ ម៣/ថ្ងៃ ទី២ បំពាក់បំពង់មេនាំទឹកស្អាត បំពង់ចែកចាយ និងសម្ភារៈតភ្ជាប់បំពង់ និងទី៣ ត្រួតពិនិត្យការងារសាងសង់ និងគាំទ្រដល់ការពង្រឹងសមត្ថភាពមន្រ្តីរបស់រដ្ឋាករទឹកស្វយ័តក្រុងភ្នំពេញ លើការងារលទ្ធកម្ម និងតម្លើងបណ្តាញចែកចាយទឹក ។
២.ឥណទានសម្បទានចំនួន១៨លានអឺរ៉ូ (ប្រមាណជា ១៩,៩២លានដុល្លារអាមេរិក) សម្រាប់គម្រោងអភិវឌ្ឍន៍ជំនាញសម្រាប់ការប្រកួតប្រជែង តាមរយៈកិច្ចព្រមព្រៀងនេះ ទីភ្នាក់ងារបារាំងសំរាប់អភិវឌ្ឍន៍ (AFD) នឹងផ្តល់ឥណទានចំនួន១៨លានអឺរ៉ូ សម្រាប់ធ្វើសហហិរញ្ញប្បទាន ជាមួយធនាគារអភិវឌ្ឍន៍អាស៊ី (ADB) ជូនរាជរដ្ឋាភិបាលកម្ពុជា សម្រាប់អនុវត្តគម្រោងអភិវឌ្ឍន៍ជំនាញ សម្រាប់ការប្រកួតប្រជែង ដែលមានក្រសួងការងារ និងបណ្តុះបណ្តាលវិជ្ជាជីវៈ ជាភ្នាក់ងារប្រតិបត្តិគម្រោង ហើយក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុជាភ្នាក់ងារអនុវត្តគម្រោង។
គម្រោងនេះ មានទិសដៅចំនួនបីរួមមាន ទី១កែលម្អ និងលើកកម្ពស់គុណភាពនៃការអប់រំបណ្តុះបណ្តាលបច្ចេកទេស និងវិជ្ជាជីវៈកម្រិតក្រោយមធ្យមសិក្សា ទី២ លើកកម្ពស់ការសិក្សាផង និងធ្វើការផង តាមបណ្តាឧស្សាហកម្មនានា និង៣ពង្រឹងយន្តការគ្រប់គ្រងហិរញ្ញវត្ថុរបស់គ្រឹះស្ថាន អប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ឲ្យប្រកបដោយនវានុវត្តន៍៕
