ដោយនៅ ស៊ីវុត្ថា
ភ្នំពេញៈ រដ្ឋមន្រ្តីក្រសួងព៌តមាន លោកខៀវ កាញារីទ្ឋបានអនុញ្ញាត្តឲ្យថ្នាក់ដឹកនាំគេហទំព័រPropertyarea.asia ដែលជាគេហទំព័រផ្តល់ព័ត៌មានឈានមុខ លើវិស័យអចលនទ្រព្យ និងសេដ្ឋកិច្ចនៅក្នុងប្រទេសកម្ពុជា បានចូលជួបសម្តែងការគួរសម និងគោរពជូនពរក្នុងឳកាសឆ្នាំថ្មី ឆ្នាំសាកល២០២០។
ស្ថាបនិក និងជាអគ្គនាយកគេហទំព័រPropertyarea.asia លោកយិន លាងគង់ នៅក្នុងជំនួបសម្តែងការគួរសម និងជូនពរ លោកខៀវ កាញារីទ្ធ រដ្ឋមន្ត្រីក្រសួងព័ត៌មាននាព្រឹកថ្ងៃទី៣ ខែមករា ឆ្នាំ ២០២០ នេះ បានជូនពរ និងជំរាបជូនលោកខៀវ កាញារីទ្ធអំពីវឌ្ឍនភាព និងការរីកចំរើននៃគេហទំព័រ Propertyarea.area ដែលបានបើកដំណើរការអស់រយៈពេលជាង២ឆ្នាំកន្លងមកនេះ។
ក្នុងឱកាសនោះ លោក យិន លាងគង់បានជំរាបជូនលោករដ្ឋមន្រ្តីក្រសួងព៌តមានថា គេហទំព័រProertyarea.asia បានទទួលការគាំទ្រច្រើនពីអ្នកអានទំាងក្នុងស្រុក និងក្រៅស្រុក ជាពិសេសអ្នកវិនិយោគ និងរកស៊ីក្នុងវិស័យអចលនទ្រព្យ ដោយពេលខ្លះមានអ្នកចូលអានគេហទំព័រ ប្រមាណជិត៣ម៉ឺននាក់ក្នុងមួយថ្ងៃ ហើយបើគិតជាមធ្យមមានអ្នកចូលអានប្រមាណជាង១៥,០០០នាក់ក្នុងមួយថ្ងៃ។
លោកបន្តថា “នេះគឺជាជោគជ័យរបស់គេហទំព័រ ដែលទើបតែដំណើរការបានប្រមាណតែជាង២ឆ្នាំ ដោយសារគេហទំព័រនេះ មានក្រុមការងារប្រកបដោយវិជ្ជាជីវៈ និងមានបទពិសោធន៍លើវិស័យសារព៌ត័មានជាច្រើនឆ្នាំ”។ លោកបន្តថា “ទិសដៅសម្រាប់ឆ្នាំនេះ និងឆ្នាំបន្តបន្ទាប់ទៀត ក្រុមការងារគេហទំព័រនឹងបន្តផ្សព្វផ្សាយ តាមរយៈការបង្កើតជាវីដេអូទាក់ទងចំណេះដឹង និងបច្ចុប្បន្នភាពព៌ត័មាន ដើម្បីផ្សព្វផ្សាយតាមរយៈបណ្តាញសង្គមនានា ក្នុងគោលដៅផ្តល់ជូនអ្នកអានកាន់តែសម្បូរបែប ដោយឈរលើមូលដ្ឋានវិជ្ជាជីវៈ និងក្រមសីលធម៌ ដើម្បីរួមចំណែកក្នុងការលើកស្ទួយវិស័យព័ត៌មាន នៅក្នុងប្រទេសកម្ពុជា”។
លោកអគ្គនាយករូបនេះជំរាបជូន លោកខៀវ កាញារីទ្ធបន្ថែមទៀតថា គេហទំព័រ Propertyearea.asia ផ្សព្វផ្សាយព័ត៌មានឈរលើវិជ្ជាជីវៈ ផុ្តល់ព័ត៌មានពិត ឥតលម្អៀង និង ប្រកបដោយស្មារតីទទួលខុសត្រូវ ។ មិនត្រឹមតែប៉ុណ្ណោះ គេហទំព័រនេះ ទទួលបានការគាំទ្រយ៉ាងខ្ពង់ខ្ពស់ ពីលោកឧបនាយករដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងការផ្សព្វផ្សាយ ពីការរីកចំរើនលើវិស័យអចលនទ្រព្យ សំណង់ ច្បាប់ បទដ្ឋានគតិយុត្តិ និង ឯកសារពាក់ព័ន្ធនិងវិស័យសំណង់ និងដីធ្លីជាដើម។
លោកបន្តថា គេហទំព័រPropertyearea.asia ដែលអាចដំណើរការទៅបានរហូតមកដល់បច្ចុប្បន្ននេះ ដោយសារមានការគាំទ្រពីអ្នកអាន ដៃគូសហការឧបត្ថម្ភពីក្រុមហ៊ុននានា និងដៃគូវិយោគ ដែលបានគាំទ្រយ៉ាងពេញទំហឹង ក្នុងការចូលរួមផ្សព្វផ្សាយពីវិស័យអចលនទ្រព្យនៅក្នុងប្រទេសកម្ពុជា។
លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានសំដែងការសាទរ និងគាំទ្រដល់ក្រុមងារ និងថ្នាក់ដឹកនាំគេហទំព័រPropertyarea.asia ក្នុងការចូលរួមផ្សព្វផ្សាយព័ត៌មានពីការរីកចំរើនលើវិស័យអចលនទ្រព្យ និងសេដ្ឋកិច្ចរបស់ប្រទេសកម្ពុជា ឱ្យប្រជាពលរដ្ឋបានជ្រួតជ្រាប។
លោករដ្ឋមន្រ្តីបន្ថែមទៀតថា “ខ្ញុំបានចូលអានគេហទំព័រនេះ ជាប្រចាំផងដែរ ដោយសារការផ្សព្វផ្សាយព៌តមានល្អ និងឈរលើមូលដ្ឋានវិជ្ជាជីវៈ”។ លោកបន្តថា “ការផ្សព្វផ្សាយព័ត៌មាននាពេលបច្ចុប្បន្ន មានការរីកចំរើនខ្លាំង ហើយបានជំរុញឱ្យក្រុមការងារ និងថ្នាក់ដឹកនាំគេហទំព័រPropertyarea.asia ផ្សព្វផ្សាយតាមរយៈបណ្តាញសង្គមនានារួមមាន ហ្វេសបុក និងយូធូបជាដើម ព្រោះបណ្តាញសង្គមមានឥទ្ធិពលខ្លាំង ហើយអាចផ្តល់ព៌ត័មានបានរហ័សដល់អ្នកអាន៕
