ដោយ Donald Lee
ភ្នំពេញៈ ទីផ្សារអាស៊ីបានដាំក្បាលចុះ ហើយតម្លៃប្រេងបានហក់ឡើងយ៉ាងខ្លាំងនៅជុំវិញពិភពលោក នាពេលរសៀលនេះ ដោយសារព័ត៌មាននៃការវាយប្រហារដោយយន្តហោះគ្មានមនុស្សបើករបស់អាមេរិក ដែលបានសម្លាប់មន្ត្រីអ៊ីរ៉ង់ជាន់ខ្ពស់ម្នាក់នៅក្នុងប្រទេសអ៊ីរ៉ាក់ត្រូវបានចេញផ្សាយ និងគំរាមធ្វើឱ្យតំបន់មជ្ឈិមបូព៌ាទាំងមូល ធ្លាក់ចូលភាពវឹកវរ។
ទីផ្សារហ៊ុនចិនដីគោកនៅសៀងហៃ និងហ្សិនជិនបានធ្លាក់ចុះប្រហែល០,៣ភាគរយនៅរសៀលនេះ បន្ទាប់ពីមានព័ត៌មានអំពីការធ្វើឃាតរបស់ មេបញ្ជាការយោធាអ៊ីរ៉ង់លោកQasem Soleimaniនៅព្រឹកនេះ ដោយការវាយប្រហារដោយយន្តហោះគ្មានមនុស្សបើករបស់អាមេរិក។ ក្រុមហ៊ុនHang Seng ហុងហុងក៏នឹងធ្លាក់ចុះ០,១៧ ភាគរយផងដែរ។
លោកSoleimani គឺជាបុរសម្នាក់ដែលមានឥទ្ធិពលបំផុត នៅក្នុងប្រទេសអ៊ីរ៉ង់ ហើយអ្នកវិភាគជឿជាក់ថា “ការសម្លាប់លោកនឹងនាំឱ្យមានអ៊ីរ៉ង់ធ្វើការសងសឹក ដែលអាចនាំឱ្យមានជម្លោះប្រដាប់អាវុធជាមួយអាមេរិក”។
ការប្រកាសរបស់អាមេរិកបានឱ្យដឹងកាលពីថ្ងៃសុក្រថា “តាមការចង្អុលបង្ហាញរបស់ប្រធានាធិបតីយោធាអាមេរិក បានចាត់វិធានការណ៍ ដើម្បីការពារបុគ្គលិកអាមេរិកនៅក្រៅប្រទេស ដោយសម្លាប់លោក Qasem Soleimani ប្រធានអង្គភាពឆ្មាំបដិវត្តអ៊ីស្លាម ដែលជាអង្គការភេរវកម្មបរទេសដែលកំណត់ដោយអាមេរិក”។
តម្លៃប្រេងបានឡើងថ្លៃយ៉ាងខ្លាំង បន្ទាប់ពីមានព័ត៌មានអំពីការធ្វើឃាតនេះ។ ប្រេងឆៅប្រភេទបានកើនឡើងជិត៣ភាគរយ ដល់ជាង៦៨ដុល្លារក្នុងមួយបារ៉ែល។
ការឡើងថ្លៃប្រេង គឺស្រដៀងនឹងបញ្ហាមួយ ដែលបានកើតឡើងកាលពីខែកញ្ញា បន្ទាប់ពីយន្តហោះគ្មានមនុស្សបើកគាំទ្រដោយអ៊ីរ៉ង់ បានវាយប្រហាររោងចក្រកែច្នៃមួយនៅតំបន់Abqaiq ប្រទេសអារ៉ាប់ប៊ីសាអូឌីត ដែលបង្កើតការរំខានដល់ការផ្គត់ផ្គង់ប្រេងដ៏ធំបំផុតមួយនៅក្នុងប្រវត្តិសាស្ត្រថ្មីៗនេះ ដោយរំខានដល់ការផលិតប្រេងជិត៦លានបារ៉ែលពីទីផ្សារ ស្មើនឹងជិតពាក់កណ្តាលនៃផលិតកម្មប្រេងរបស់អារ៉ាប៊ីសាអូឌីត៕
