ដោយវុត្ថា
កោះកុង៖ ដូចការគ្រោងទុក ផ្លូវជាតិលេខ៤៨ ប្រវែង១៥០គីឡូម៉ែត្រ ពីផ្លូវបំបែកស្រែអំបិល ទៅទីរួមខេត្តកោះកុងដែលគ្រោងចំណាយទឹកប្រាក់ប្រមាណជាង៦៧ លានដុល្លាអាមេរិក នឹងត្រូវបើការដ្ឋានសាងសងនៅខែមេសាខាងមុខនេះ ដោយលើកកម្រិតពីផ្លូវកៅស៊ូពីរស្រទាប់ ទៅជាផ្លូវបេតុងកៅស៊ូ AC និងពង្រីកទទឹងផ្លូវពី១០ម៉ែត្រ មក១១ម៉ែត្រ។
លោកសុខ សុទ្ធី អភិបាលរងខេត្តកោះកុង នៅក្នុងពិធីដឹកនាំកិច្ចប្រជុំពិភាក្សា វាយតម្លៃហេតុប៉ះពាល់បរិស្ថាន និងសង្គម សម្រាប់ គម្រោងធ្វើអោយប្រសើរឡើងនូវផ្លូវជាតិលេខ៤៨ នៅព្រឹកថ្ងៃទី០៨ ខែមករា ឆ្នាំ២០២០នេះ ឱ្យដឹងថា ដោយប្រទេសជាតិមានសន្តិភាពពេញលេញ យើងមានឱកាសអភិវឌ្ឍន៍លើគ្រប់វិស័យ ដើម្បីទ្រទ្រង់កំណើនសេដ្ឋកិច្ចដ៍រឹងមាំទៅថ្ងៃអនាគត់ក្នុងការនាំប្រទេសកម្ពុជាទៅកាន់ប្រទេសដែលមានចំណូលមធ្យមកម្រិតខ្ពស់នៅក្នុងឆ្នាំ២០៣០ និងចំណូលខ្ពស់នៅឆ្នាំ២០៥០។
លោកបន្តថា រាជរដ្ឋាភិបាលបានកំណត់យ៉ាងច្បាស់ក្នុង យុទ្ធសាស្ត្រចតុកោណមានវិស័យអទិភាពទាំងបួនគឺ ធនធានមនុស្ស ផ្លូវ ទឹក ភ្លើង។ ការអភិវឌ្ឍផ្លូវគមនាគមន៍ដែលជាសសៃឈាមទ្រទ្រង់ដល់ការអភិវឌ្ឍ និងវិស័យដទៃទៀត រួមមាន ពាណិជ្ជកម្ម ឧស្សាហកម្ម និងទេសចរណ៍ ដែលជាកត្តាចំបងនៃខឿនសេដ្ឋកិច្ចជាតិ។
តាមការបង្ហាញរបស់ទីប្រឹក្សាក្រុមហ៊ុនឃី ខនសាល់ធេន(ខេមបូឌា)(KCC)បានអោយដឹងថា គម្រោងកែលំអរផ្លូវជាតិលេខ៤៨ មានប្រវែង១៥០គីឡូម៉ែត្រពីផ្លូវបំបែកស្រែអំបិល មកដល់ក្រុមខេមរភូមិន្ទ ដោយពង្រីកផ្លូវ៤គន្លង ចំនួន៤កន្លែង សរុបប្រវែង២៥,១គីឡូម៉ែត្រ ក្រៅពីនេះជាផ្លូវ២គន្លង ដោយធ្វើការកែសម្រួលនូវចំណុចមួយចំនួនដែលមិនត្រឹមត្រូវតាមស្តង់ដា ។
តាមការបង្ហាញក្នុងកិច្ចប្រជុំបានអោយដឹងថា ផ្លូវនេះនឹងចាប់ផ្តើមសាងសង់នៅខែមេសាខាងមុខនេះដោយចំណាយរយៈពេល៣២ខែ គ្រោងចំណាយថវិកាចំនួនជាង៦៧ លានដុល្លាសហរដ្ឋអាមេរិក ដែលជាប្រាក់កម្ចីពីរដ្ឋាភិបាលកូរ៉េ ផ្លូវនេះជាផ្នែកមួយនៃផ្លូវអាស៊ានAH123ផងដែរ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន បានធ្លាប់បានឱ្យដឹងថា តាមផែនការ ការស្ថាបនាផ្លូវជាតិលេខ៤៨នេះ នឹងត្រូវចំណាយទឹកប្រាក់ ៧៥លានដុល្លារ ដែលជាកម្ចីពីរដ្ឋាភិបាលកូរ៉េ ៦៧លានដុល្លារ និងថវិកាបដិភាគរបស់រដ្ឋាភិបាលកម្ពុជាចំនួន ៨លានដុល្លារ ។
ផ្លូវជាតិលេខ៤៨ បច្ចុប្បន្ននេះ ត្រូវបានកែលម្អជាបណ្ដោះអាសន្នរួចរាល់ហើយសម្រាប់ទទួលការធ្វើដំណើររបស់ប្រជាពលរដ្ឋ ក្នុងឱកាសបុណ្យសមុទ្រនៅខេត្តកោះកុងនាខែធ្នូ ឆ្នាំ ២០១៨ កន្លងមកនេះ៕
