ដោយវុត្ថា
ភ្នំពេញៈ រដ្ឋាភិបាលតាមរយៈអន្តរក្រសួង/ស្ថាប័ន បាននិងកំពុងចាប់ផ្តើមពិភាក្សាលើសេចក្តីព្រាងកិច្ចព្រមព្រៀងត្រីភាគីស្តីពី ការដឹកជញ្ជូនតាមតំបន់ឆ្នេរសមុទ្រ ដើម្បីឱ្យនាវាដឹកទំនិញកាន់តែមានភាពងាយស្រួលបន្ថែមទៀត។
យោងតាមកិច្ចប្រជុំអន្តរក្រសួង ដែលបានធ្វើឡើងនៅថ្ងៃទី១៦ខែមករា ឆ្នាំ២០២០នេះ គឺដើម្បីពិនិត្យ ពិភាក្សា លើសេចក្តីព្រាងកិច្ចព្រមព្រៀងត្រីភាគីស្តីពី ការដឹកជញ្ជូនតាមតំបន់ឆ្នេរសមុទ្ររវាងព្រះរាជាណាចក្រកម្ពុជា ព្រះរាជាណាចក្រថៃឡង់ដ៏ និងសាធារណរដ្ឋសង្គមនិយមវៀតណាម ដែលមានបញ្ហាត្រូវរួមគ្នាដោះស្រាយ លើខ្លឹមសារសេចក្តីព្រាងកិច្ចព្រមព្រៀងទាក់ទងនឹងកាតព្វកិច្ចពន្ធគយ នីតិវិធីដោះស្រាយជម្លោះកើតចេញពីការអនុវត្តកិច្ចព្រមព្រៀង នីតិវិធីក្នុងការសង្គ្រោះនាវារបស់រដ្ឋភាគី ពេលជួបគ្រោះអាសន្ននៅក្នុងដែនទឹកព្រះរាជាណាចក្រកម្ពុជា និងការបង្កើតក្រុមការងារត្រីភាគី ចូលរួមកិច្ចប្រជុំជាទៀងទាត់ ក្នុងក្របខណ្ឌជារដ្ឋភាគីកិច្ចព្រមព្រៀង សំដៅឱ្យការធ្វើចរាចរណ៍ទំនិញតាមនាវាឆ្លងកាត់ព្រំដែនទឹកប្រព្រឹត្តទៅដោយរលូន។
លោករស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន ឱ្យដឹងថា ធាតុចូល ដែលទទួលបានពីកិច្ចប្រជុំអន្តរក្រសួងនេះ គឺជាជំនួយស្មារតីក្នុងការផ្តល់ទឡ្ហីករណ៍សមស្របដល់ក្រសួងសាធារណការនិងដឹកជញ្ជូន ដើម្បីជួបប្រជុំចរចាជាបន្តជាមួយភាគីថៃឡង់ដ៏ និងភាគីវៀតណាម ដែលគ្រោងនឹងរៀបចំកិច្ចប្រជុំលើកទី៥ នៅប្រទេសវៀតណាមនាត្រីមាសទី១ ឆ្នាំ២០២០៕
