ដោយវុត្ថា
ភ្នំពេញៈ លោក Christian Berger ឯកអគ្គរដ្ឋទូតអាល្លឺម៉ង់ ទើបតែងតាំងថ្មី បានសន្យាជួយជំរុញឲ្យពាណិជ្ជករ និងវិនិយោគិនអាល្លឺម៉ង់ ងាកមកចាប់អារម្មណ៍លើសក្តានុពលពាណិជ្ជកម្មរបស់កម្ពុជា។
លោក Christian Berger ឯកអគ្គរដ្ឋទូតអាល្លឺម៉ង់ទើបតែងតាំងថ្មីរូបនេះបានបង្ហាញការប្តេជ្ញាបែបនេះ នៅក្នុងជំនួបពិភាក្សាការងារជាមួយលោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅថ្ងៃទី២១ ខែមករាម្សិលមិញនេះ ក្នុងគោលបំណងពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក៏បានបង្ហាញពីការស្វាគមន៍ការវិនិយោគពីប្រទេសអាល្លឺម៉ង់ និងការត្រៀមខ្លួនរួចជាស្រេច ក្នុងការសម្របសម្រួលដល់កិច្ចសហការជូនដល់អ្នកវិនិយោគិនអាល្លឺម៉ង់ ដែលមានបំណងមកវិនិយោគនៅក្នុងប្រទេសកម្ពុជា។
លោករដ្ឋមន្ត្រីថា “រាជរដ្ឋាភិបាលកម្ពុជាខិតខំប្រឹងប្រែង ក្នុងការសម្របសម្រួលពាណិជ្ជកម្ម និងការវិនិយោគជូនដល់ពាណិជ្ជករ និងវិនិយោគិន តាមរយៈកំណែទម្រង់ច្បាប់ និងបទប្បញ្ញត្តិ ស្ថាប័ន និងការកាត់បន្ថយថ្លៃចំណាយផ្សេងៗជាដើម។លោកបន្តថា “រាជរដ្ឋាភិបាលកម្ពុជា កំពុងផ្តោតទៅលើការធ្វើពិពិធកម្មទីផ្សារ ដើម្បីធ្វើសមារណកម្មចូលទៅក្នុងទីផ្សារអន្តរជាតិ។
កម្ពុជានិងអាល្លឺម៉ង់ មានកិច្ចសហប្រតិបត្តិការទ្វេភាគី ដោយបានផ្តល់ជំនួយអភិវឌ្ឍន៍មកកម្ពុជា លើវិស័យផ្សេងៗរួមមានវិស័យសុខាភិបាល អប់រំ និងវិស័យមួយចំនួនទៀត ពីឆ្នាំ២០១៣ ដល់ឆ្នាំ២០១៥ មានទឹកប្រាក់ប្រមាណជា៦៥លានដុល្លារ ហើយសម្រាប់វិស័យដោះមីននៅកម្ពុជា រដ្ឋាភិបាលអាល្លឺម៉ង់បានផ្ដល់ជំនួយ គិតជាទឹកប្រាក់ជាង២៦លានដុល្លារគិតពីឆ្នាំ១៩៩៤ ដល់ឆ្នាំ២០១៩។
ដោយឡែកទំហំពាណិជ្ជកម្មរវាងកម្ពុជា និងអាល្លឺម៉ង់នៅឆ្នាំ២០១៨កន្លងមក មានទឹកប្រាក់ប្រមាណ១២០០លាន ដុល្លារសហរដ្ឋអាមេរិក។ កម្ពុជានាំទំនិញទៅកាន់ទីផ្សារអាល្លឺម៉ង់ប្រមាណជាង១០០០លានដុល្លារ និងនាំចូលពីមកកម្ពុជាប្រមាណជាង១០៦លានដុល្លារ។ ក្នុងរយៈពេល៦ខែដើមឆ្នាំ២០១៩កន្លងមកនេះ ការធ្វើពាណិជ្ជកម្មទ្វេភាគីមានទំហំទឹកប្រាក់ប្រមាណ៥៥០លានដុល្លារអាមេរិក។
នៅក្នុងចំណោមប្រទេស២៨ នៅសហភាពអឺរ៉ុប អាល្លឺម៉ង់មានទំហំពាណិជ្ជកម្មជាមួយកម្ពុជាធំជាងគេ បន្ទាប់មកចក្រភពអង់គ្លេស និងប្រទេសបារាំង។ រីឯវិស័យទេសចរណ៍ទេសចរណ៍របស់មកកម្ពុជា ប្រមាណ១០ម៉ឺននាក់ក្នុង១ឆ្នាំ។សាធារណរដ្ឋសហព័ន្ធអាល្លឺម៉ង់ មានទំនាក់ទំនងកទូតជាមួយកម្ពុជាចាប់តាំងពីឆ្នាំ១៩៦៧៕
