ដោយ Donald Lee
ភ្នំពេញៈ អ្នកវិនិយោគអចលនទ្រព្យ និងគម្រោងវិនិយោគបរទេស បានបញ្ចូលទឹកប្រាក់ចំនួន៧០០លានដុល្លារ ទៅក្នុងទីក្រុងឆ្នេរសមុទ្រកណ្តាល ដាណាង (Da Nang) របស់ប្រទេសវៀតណាមនៅឆ្នាំ ២០១៩។ នេះបើយោងតាមមន្ទីរផែនការ និងវិនិយោគទីក្រុងរបស់វៀតណាម។
យោងតាមប្រព័ន្ធផ្សព្វផ្សាយរដ្ឋ ការកើនឡើងនៃអចលនទ្រព្យដ៏ធំនេះ រួមមានការវិនិយោគផ្ទាល់ពីបរទេសចំនួន៤៤០លានដុល្លារ នៅក្នុងគម្រោងអចលនទ្រព្យថ្មីចំនួន ១៣២ និង១២០លានដុល្លារនៅក្នុង១៦គម្រោង ដែលបាននិងកំពុងដំណើរការ។
យោងតាមរបាយការណ៍ពីប្រព័ន្ធផ្សព្វផ្សាយរដ្ឋ លោក Tran Phuoc Son នាយកនាយកដ្ឋានវិនិយោគបាននិយាយថា “តួលេខវិជ្ជមាន គឺមកពីកិច្ចខិតខំប្រឹងប្រែងដ៏អស្ចារ្យរបស់អាជ្ញាធរមូលដ្ឋាន ក្នុងការពន្លឿនកំណែទម្រង់រដ្ឋបាល ដើម្បីសម្រួលដល់វិនិយោគិនក្នុងស្រុក និងបរទេស”។
ក្រុមហ៊ុនអាកាសចរណ៍ថ្មីពីភ្នំពេញ ទៅដាណាងបានចាប់ផ្តើមដំណើរការ នៅថ្ងៃទី ២៧ ខែតុលា។ ក្រុមហ៊ុនអាកាសចរណ៍ខេមបូឌាអង្គរអ៊ែរឡាញ គឺជាក្រុមហ៊ុនអាកាសចរណ៍សម្រាប់ផ្លូវហោះហើរនេះ។
សម្ដេចតេជោនាយករដ្ឋមន្រ្តីហ៊ុន សែន បាននិងកំពុងធ្វើការយ៉ាងសកម្មជាមួយអាជ្ញាធរវៀតណាម ក្នុងការលើកកម្ពស់វិស័យទេសចរណ៍ ឆ្លងកាត់ព្រំដែនរវាងសម្ព័ន្ធមិត្តទាំងពីរ។
សម្តេចតេជោហ៊ុន សែន ថ្លែងនៅក្នុងវេទិកាមួយ នៅប្រទេសវៀតណាមកាលពីខែ តុលាថា “ប្រទេសវៀតណាមបន្តក្លាយជាទីផ្សារទេសចរណ៍ធំជាងគេទី២ សម្រាប់ប្រទេសកម្ពុជា ហើយយើងរំពឹងថា នឹងមានភ្ញៀវទេសចរវៀតណាមកាន់តែច្រើនឡើងៗ ជ្រើសរើសប្រទេសកម្ពុជា ជាគោលដៅវិស្សមកាលរបស់ពួកគេ”។ (Unofficial Translation)
លោកថោង ខុន រដ្ឋមន្រ្តីក្រសួងទេសចរណ៍បានធ្វើផែនការសាធារណៈ ដើម្បីទាក់ទាញជនជាតិវៀតណាមយ៉ាងហោចណាស់មួយលាននាក់ជារៀងរាល់ឆ្នាំមកកម្ពុជា៕