ដោយហ្សូលី
អាមេរិកៈ ជញ្ជាំងព្រំដែនរបស់សហរដ្ឋអាមេរិក នឹងត្រូវសាងសង់រួចរាល់ជាសា្ថពរនៅដើមឆ្នាំ ២០២១។ នេះបើតាមការថ្លែងសន្ទរកថារបស់ប្រធានាធិបតីអាមេរិកលោកDonald J. Trump ។ នេះបើតាមការផ្សាយរបស់សារព័ត៌មាន Washington Post នៅរសៀលថ្ងៃទី៥ កុម្ភៈ ឆ្នាំ ២០២០កន្លងមកនេះ។
ជញ្ជាំងព្រំដែននេះ ស្ថិតនៅចន្លោះរវាងសហរដ្ឋអាមេរិក និងប្រទេសម៉ិចស៊ិចកូ ដែលមានប្រវែងប្រមាណ៨០០គីឡូម៉ែត្រ។ លោកត្រាំបានមានប្រសាសន៍ថា ព្រំដែនភាគខាងត្បូងរបស់សហរដ្ឋអាមេរិក នឹងកាន់តែមានភាពរឹងមាំ កាន់តែខ្លាំងបន្ថែមទៀត នៅពេលដែលជញ្ជាំងដែលមានប្រវែងវែង និងមានកម្ពស់ខ្ពស់មួយនេះកំពុងស្ថិតក្នុងដំណើរការសាងសង់។
លោកTrump បន្តថា លោកនឹងសាងសង់“ ជញ្ជាំង” គឺត្រូវចំណាយថវិកាសរុប៤ ពាន់លានដុល្លារ”។លោកបន្តថា“ជញ្ជាំងនេះនឹងមិនអាចសម្រចបាននៅខែធ្នូ ឆ្នាំ ២០២០ បានឡើយ ហើយឥឡូវនេះ បានចំណាយថវិកាអស់១៨ពាន់លានដុល្លាររួចទៅហើយ”។
ទោះបីជាមិនបានបំពេញតាមគោលដៅរបស់លោកក៏ដោយ ក៏លោកTrump បានសាទរ ចំពោះរដ្ឋបាលរបស់លោកសម្រាប់ការកសាងជញ្ជាំងព្រំដែនបន្ថែមទៀត។
គិតមកទល់ពេលនេះ ការសាងសង់ជញ្ជាំងព្រំដែន សម្រេចបានប្រមាណ១៦០ គីឡូម៉ែត្រហើយ ដែលគ្រោងនឹងសាងសង់រួចជាស្ថាពរនៅដើមឆ្នាំក្រោយ ឆ្នាំ ២០២១។
ការសាង់សង់ជញ្ជាំងព្រំដែន ក្នុងគោលបំណងដើម្បីទប់ស្កាត់ការហូរចូលជនអន្តោប្រវេសន៍រវាងព្រំប្រទល់អាមេរិក-ម៉ិចស៊ិចកូ គឺជាការសន្យាមួយរបស់លោក ដូណាល់ ត្រាំ តាំងពីពេលឃោសនាបោះឆ្នោតក្លាយជាប្រធានាធិបតី ក្នុងឆ្នាំ ២០១៦។
ចំណែកឯយុទ្ធនាការឆ្នាំ២០២០ របស់លោកTrumpវិញ គឺលោកបានបង្ហាញនូវពាក្យស្លោកដែលមានចំណងជើងថា“ បញ្ចប់ជញ្ជាំង” នៅឯការជួបជុំលើកដំបូងរបស់គាត់នៅឆ្នាំ ២០១៩ នៅទីក្រុង El Paso រដ្ឋ Texas ៕
