ដោយវុត្ថា
ភ្នំពេញ៖ ភ្លាមៗ ក្រោយពីគណៈកម្មការអឺរ៉ុបចេញសេចក្តីសម្រេចដ៏អយុត្តិធម៌របស់កាលពីព្រលប់ថ្ងៃទី ១២ ខែកុម្ភៈ ឆ្នាំ ២០២០ នេះ ពាក់ព័ន្ធនឹងការដកជាបណ្តោះអាសន្ននូវផ្នែកខ្លះនៃប្រព័ន្ធអនុគ្រោះពន្ធ “គ្រប់មុទំនិញលលើកលែងសព្វាវុធ” (EBA)ចេញពីប្រទេសកម្ពុជា លោក បណ្ឌិត គីម ហ៊ាង ប្រធានក្រុមហ៊ុន KW Cambodia បានបញ្ចេញទស្សនផ្ទាល់ខ្លួនថា អត់ EBA គឺប្រទេស និងប្រជាជនកម្ពុជាត្រូវខាតច្រើន ត្រូវខាតបង់ច្រើន តែវាក៏អាចល្អចំពោះកម្ពុជា។
លោកបានបណ្ឌិត សរសេរនៅក្នុងទំព័រហ្វេសបុកផ្លូវការរបស់លោកថា អត់ EBA គឺប្រទេស និងប្រជាជនកម្ពុជាត្រូវខាតច្រើន ទាំងលុយកាក និងកិត្តិយសជាមួយប្រទេសនៅសហគមន៌អឺរ៉ុប និងពិភពលោក តែវាក៏អាចល្អចំពោះកម្ពុជា បើសិនជា ៖
១) ប្រជាជនកម្ពុជាត្រូវតែឈប់ ឬកាត់បន្ថយទម្លាប់ស្តីបន្ទោសគ្នា គិតអវិជ្ជមាន កាច់ត្រួយដាក់ជី ចូលចិត្តខ្លាំងតែជាមួយគ្នាឯង ដោយងាកទៅខំប្រឹងរួមគ្នា ដើម្បីប្រកួតប្រជែងជាមួយប្រទេសក្នុងអាស៊ាន និងពិភពលោក!
២) មន្រ្តីរាជការខ្មែរ ដែលបើកប្រាក់ខែពីរដ្ឋ តាមការបង់ពន្ធរបស់រាស្រ្ត ត្រូវធ្វើការបំរើរាស្រ្តពិតៗ! បើជាចៅហ្វាយខេត្ត គឺត្រូវធ្វើការងារគ្រប់យ៉ាងដើម្បីធានាសុវត្តិភាព និងសន្តិសុខដល់ប្រជាជនក្នុងខេត្ត ព្រមទាំងធ្វើការងារជាច្រើនទៀតដើម្បីអោយប្រជាជនរបស់ខ្លួនរស់នៅ ធ្វើការ រកស៊ីមានបាន និងមានជីវភាពធូធារទាំងអស់គ្នា!
បើជារដ្ឋមន្រ្តី ក្រសួងកសិកម្ម គឺត្រូវធ្វើរឿងគ្រប់យ៉ាងដើម្បីធានាថា កសិករមានទឹកគ្រប់គ្រាន់ដើម្បីធ្វើកសិកម្ម មានពូជ ជី និងបច្ចេកទេសគ្រប់គ្រាន់ដើម្បីផ្តល់ និងបង្រៀនដល់កសិករ ពិសេសត្រូវចេះរកទីផ្សារនៅបរទេស ដើម្បីអោយកសិករលក់កសិផលបានតម្លៃសមរម្យ!
៣) រាជរដ្ឋាភិបាលគួរតែផ្តល់ឱកាសអោយទូលំទូលាយជាងនេះ ដើម្បីអោយបញ្ញាវន្ត័វ័យក្មេងកម្ពុជា ដែលមានសមត្ថភាព សុឆន្ទះ និងគំនិតជាតិនិយមបានកាន់តួនាទីសំខាន់ៗ ដើម្បីអោយពួកគាត់ទៅប្រកួតប្រជែងជាមួយអាស៊ាន និងពិភពលោក ដើម្បីនាំផលប្រយោជន៌ជួនសង្គម និងប្រទេសជាតិ បើទោះបីជាពួកគាត់មាន ឬគ្មានប្រវត្តិចេញពីក្រុមគ្រួសារ នៃអ្នកតស៊ូ ឬដឹកនាំក៏ដោយ!អ្វីៗដើម្បីការរីកចំរើនប្រកបដោយនិរន្តភាពនៃកម្ពុជា!
គណៈកម្មការអឺរ៉ុបបានសម្រេចដកផ្នែកមួយចំនួននៃការអនុគ្រោះពន្ធដែលបានផ្តល់ឱ្យកម្ពុជាក្រោមគម្រោងប្រពន័ន្ធអនុគ្រោះពន្ធពាណិជ្ជកម្ម អ្វីគ្រប់យ៉ាងលើកលែងតែអាវុធ (EBA) ។
បើតាមសេចក្តីសម្រេចនេះ ឱ្យដឹងថា ការដកការអនុគ្រោះពន្ធនេះនឹងប៉ះពាល់ដល់ផលិតផលសម្លៀកបំពាក់ និងស្បែកជើង និងទំនេញផ្សេងទៀតដូចជាស្ករជាដើមរបស់កម្ពុជា ។ ការដកនេះមានទឹកប្រាក់ចំនួនប្រមាណមួយភាគប្រាំ ឬ ១ ពាន់លានអឺរ៉ូនៃការនាំចេញប្រចាំឆ្នាំរបស់កម្ពុជាទៅកាន់សហភាពអឺរ៉ុប៕
