ដោយ ហ្សូលី
ប្រទេសចិនៈ គម្រោងអភិវឌ្ឍហេដ្ឋារចនាសម្ព័ន្ធមួយចំនួន នៅតំបន់អាស៊ី ដែលប្រទេសចិនជាអ្នកផ្តល់ជំនួយនោះ ត្រូវជាប់គាំងមួយរយៈដោយសារការវាយលុក និងរីករាលដាលនៃវីរុសកូរ៉ូណា។
កោះសិប្បនិម្មិតនៅប្រទេសស្រីលង្កា ទៅកាន់ស្ពាននៅបង់ក្លាដេស និងគម្រោងវារីអគ្គិសនីនៅនេប៉ាល់និងឥណ្ឌូនេស៊ី ដែលចិនត្រូវផ្តល់ជំនួយរាប់ពាន់លាន់ និងទ្រីលានដុល្លារ សម្រាប់គម្រោងខ្សែក្រវ៉ាត់មួយផ្លូវមួយត្រូវរងផលប៉ះពាល់នៃការជាប់គាំង។
ទីក្រុងកំពង់ផែនៅកូឡុំប៉ូដែលចិនត្រូវស្ថាបនា ជាប់គាំងតាំងពីពេលពិធីចូលឆ្នាំចិន នៅពេលដែលកម្មករចិនត្រឡប់ទៅផ្ទះ។ លើសពីនេះអគារផ្នែកទំនាក់ទំនងខ្ពស់ជាងគេនៅតំបន់អាស៊ីអាគ្នេយ៍ ដែលជាជំនួយរបស់រដ្ឋាភិបាលចិន ត្រូវបានពន្យាពេលសម្ពោធដល់ទៅរយៈពេល២ខែទៀត។
គម្រោងវារីអគ្កិសនីជាង១៣០០មេហ្កាវ៉ាត់ តម្លៃជាង២ពាន់លានដុល្លារនៅបង់ក្លាដេស ត្រូវផ្អាកការសាង់សង់ និងផ្អាកការផ្គត់ផ្គង់ថាមពលអគ្គិសនី។ រីឯស្ពានពហុបំណងដែលមានទុនវិនិយោគជាង៣ពាន់លានដុល្លារ ក៏មិនទាន់មានកម្មករចិនណាត្រឡប់មកធ្វើការវិញដែរ។
យោងតាមរដ្ឋមន្ត្រី នៃក្រសួងវិនិយោគឥណ្ឌូនេស៊ីបានឱ្យដឹងថា ការស្ថាបនាគម្រោងផ្លូវដែកល្បឿនលឿននៅចាកាតា តម្លៃ៦ពាន់លានដុល្លារត្រូវពន្យាពេលដូចគ្នា។
ទន្ទឹមនេះគម្រោងខ្សែក្រវ៉ាត់មួយ ផ្លូវមូយ នៅប្រទេសមួយចំនួនដូចជា ម៉ាឡេស៊ី ឥណ្ឌូនេស៊ី ស្រីលង្កា ត្រូវចរចាពីកុងត្រាសារជាថ្មី និងត្រួតពិនិត្យពីតម្លៃនិងផលប៉ះពាល់ពីបរិស្ថានឡើងវិញ។
បច្ចុប្បន្នប្រទេសចិន កំពុងជួបប្រទះនឹងវិបត្តិសេដ្ឋកិច្ច ដែលបណ្តាលឱ្យរាំងស្ទះនូវវត្ថុធាតុដើម និងឧបករណ៍ ធ្វើឱ្យមានភាពរអាក់រអួលក្នុងការដឹកជញ្ជូន និងធ្វើឱ្យហេដ្ឋារចនាសម្ព័ន្ធភាគច្រើន មិនអាចដំណើរការបាន។ លើសពី១៣៣ប្រទេស បានរឹតបន្តឹងការធ្វើដំណើរចេញ-ចូល របស់ប្រជាជនចិននិងអ្នកដែលធ្វើដំណើរទៅចិន សូម្បីតែប្រទេសមួយចំនួន ដែលចិនផ្តល់ជំនួយក៏បានបិទជើងហោះហើរបណ្តោះអាសន្នដែរ ជាក់ស្តែងដូចជា ប្រទេសស្រីលង្កាជាដើម៕ (AFP)
