ដោយវុត្ថា
ភ្នំពេញ៖ រដ្ឋបាលខេត្តសៀមរាបសហការជាមួយភ្នាក់ងារសហប្រតិបត្តិការអន្តរជាតិជប៉ុន (JICA)សិក្សាលើគម្រោងទីក្រុងវៃឆ្លាត ( Smart City in Siem Reap ) ដែលជាគោលដៅអភិវឌ្ឍន៍ក្រុងសៀមរាប ឱ្យក្លាយជាទីក្រុងទំនើប ដើម្បីមានសមត្ថភាពប្រកួតប្រជែងជាមួយទីក្រុងនានា ទាំងនៅក្នុងតំបន់ និងនៅលើសកលលោក ។
យោងតាមកិច្ចប្រជុំរវាង លោក ទៀ សីហា អភិបាល នៃគណ:អភិបាលខេត្តសៀមរាប និងប្រតិភូនៃទីភ្នាក់ងារសហប្រតិបត្តិការអន្តរជាតិជប៉ុន នាថ្ងៃទី២ ខែមីនា ឆ្នាំ ២០២០ នេះបានជំរុញឱ្យក្រុមការងារទាំងពីរនឹងបន្តជួបគ្នា ដើម្បីសិក្សាលើគម្រោងនេះ ឲ្យបានស៊ីជម្រៅបន្ថែមទៀត និងប្រកបដោយការទទួលខុសត្រូវ ក្នុងការសម្រេចឱ្យបាននូវការអភិវឌ្ឍមួយដែលមានគុណភាព និងប្រសិទ្ធភាពខ្ពស់ ។
ទីភ្នាក់ងារសហប្រតិបត្តិការអន្តរជាតិជប៉ុនបានចេញមុខសិក្សាគម្រោងអភិវឌ្ឍន៍ក្រុងសៀមរាបឱ្យទៅជាទីក្រុងវៃឆ្លាតអាស៊ានសៀមរាបឱ្យក្លាយជាទីក្រុងវៃឆ្លាតដោយបានបែងចែកជា ២ផ្នែករួមមានទី១ សិក្សាពីគម្រោងចាប់ពីខែកក្ដដា ឆ្នាំ២០១៩ ដល់ខែធ្នូ ឆ្នាំ២០១៩និង ទី២ ចាប់ផ្ដើមអនុវត្តគម្រោង ចាប់ពីខែមករា ឆ្នាំ២០២០ ដល់ខែមិថុនា ឆ្នាំ២០២០។
បើតាមឯកសារទស្សនាទានស្តីពីបណ្តាញទីក្រុងឆ្លាតអាស៊ាននេះ បានបង្ហាញថា ទីក្រុងចំនួន ២៦ នឹងត្រូវដាក់ក្នុងគម្រោងបណ្តាញទីក្រុងឆ្លាតអាស៊ាន ហើយក្នុងចំណោមនោះមានទីក្រុងចំនួន៣ របស់កម្ពុជាក៏ត្រូវបានដាក់បញ្ចូលរួមានទីក្រុងសៀមរាប បាត់ដំបង និងរាជធានីភ្នំពេញផងដែរ៕
