ដោយៈ រ៉ាណេត
ភ្នំពេញៈ រដ្ឋាភិបាលបានអនុម័តគំរោងវិនិយោគ រោងចក្រថ្មីមួយទៀតដែលមានតម្លៃទឹកប្រាក់២,៥លានដុល្លារអាមេរិក។ គម្រោងនេះមានទីតាំងនៅស្រុកបរសេដ្ឋ ខេត្តកំពង់ស្ពឺ។
គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានឲ្យដឹងក្នុងបណ្តាញទំនាក់ទំនងសង្គមរបស់ខ្លួនននារសៀលថ្ងៃទី៣ មិនានេះថា តបតាមសំណើសុំវិនិយោគពីក្រុមហ៊ុន “TEXSSEL (CAMBODIA) CO., LTD.” ក្រុមប្រឹក្សាអភិវឌ្ឍន៍កម្ពុជាបានសម្រេចចេញ “វិញ្ញាបនបត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិសេរីភត្ត ឃុំពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ មានទុនវិនិយោគប្រមាណ ២,៥លានដុល្លារអាមេរិក និងអាចបង្កើតការងារបានចំនួន ១.០៣៤កន្លែង។
គំរោងវិនិយោគនេះ ផ្តោតលើគម្រោងបង្កើតរោងចក្រកាត់ដេរ និងចាក់សម្លៀកបំពាក់ កន្សែងបង់ក មួក ស្រោមដៃ ស្រោមជើង ភួយ បូគ្រប់ប្រភេទ និងវាយនភណ្ឌបម្រើក្នុងផ្ទះ (Home Textiles)។
ជាមួយនឹងការគាំទ្រទៅលើគម្រោងវិនិយោគខាងលើនេះ បានបង្ហាញឱ្យឃើញពីភាពមានជំនឿពីសំណាក់ធុរកិច្ចអន្តរជាតិ ដែលជឿជាក់មកលើកម្ពុជា ដែលអាចធានាបាននូវសុខសុវត្ថិភាពខ្ពស់នៅក្នុងវិស័យពាណិជ្ជកម្ម និងការវិនិយោគ៕
