ដោយវុត្ថា
ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានប្រកាសថា នឹងនាវានាវាចិន៧គ្រឿង នឹងដឹកជញ្ជូនវត្ថុធាតុដើម ដើម្បីសង្គោះវិស័យកាន់ដេរ ខណៈមានរោងចក្រមួយចំនួនបានស្នើសុំបិតបណ្តោះអាសន្នដោយសារកង្វះវត្ថុធាតុដើម។
សម្តេចតេជោហ៊ុន សែន នៅក្នុងពិធីអញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥៥ និងបើកការដ្ឋានសាងសង់ផ្លូវជាតិ១០ នៅថ្ងៃទី ៩ ខែមីនា ឆ្នាំ ២០២០ នេះ ឱ្យដឹងថា នាវា៥គ្រឿង ដែលដឹកទំនិញវត្ថុធាតុដើម និងចូលកំពង់សោម និង២គ្រឿងទៀតឆ្លងកាត់តាមទីក្រុងហូជីមិញរបស់ប្រទេសវៀណាម ដើម្បីផ្គត់ផ្គង់រោងចក្រនៅស្វាយរៀង។
សម្តេចតេជោបន្តថា នាវា៧គ្រឿងនេះ មិនត្រឹមតែដឹកវត្ថុធាតុដើមសម្រាប់ផ្គត់ផ្គង់រោងចក្រនានាសម្រាប់តែខែបី (ខែមីនា)នេះទេ ដឹករហូតដល់ខែ៥ (ខែឧសភា) ពោលរហូតដល់សភាពការធូស្រាលឡើងវិញ។ ប៉ុន្តែយ៉ាងណាក៏ដោយក្នុងរយៈពេលប៉ុន្មានថ្ងៃនេះ មានការព្យួររោងចក្រខ្លះនៅក្នុងប្រទេសកម្ពុជា
សម្តេចតេជោ បន្ថែមថា “ខ្ញុំសូមអំពាវដល់រោងចក្រនានា ឆ្លៀតពេលដែលបញ្ឈប់ការងារ ហើយលប់ចោលកិច្ចសន្យារជាមួយកម្មករ ព្រោះក្រសួងការងារ និងបណ្តុះបណ្តាលវិជ្ជាជីវៈក៏ប្រកាសរួចរាល់ហើយដែរ។ ចឹងទេកុំមានបញ្ឈប់ការងារ ហើយលុបកិច្ចសន្យាការងាររបស់កម្មករកម្មរិនីចោលឱ្យសោះ”។
បើតាមសម្តេចតេជោហ៊ុន សែន នាយករដ្ឋមន្ត្រី នៃកម្ពុជាបញ្ជាក់ថា កម្មករកម្មរិនិជិត៧ម៉ឺននាក់ នឹងទទួលរោងផលប៉ះពាល់ពីការព្យួការងារ និងបិតរោងចក្រនៅក្នុងប្រទេសកម្ពុជា។
លោក ហេង សួរ មន្រ្តីនាំពាក្យក្រសួងការងារ និងបណ្តោះបណ្តាលវិជ្ជាជីវៈបានឱ្យដឹងកាលពីសប្តាហ៍មុននេះថា គិតរហូតដល់ត្រឹមថ្ងៃទី៥ ខែមីនា ឆ្នាំ ២០២០នេះ មានរោងចក្រសហគ្រាសចំនួន៤០ ស្នើសុំព្យួរការងារ ព្រោះតែកង្វះវត្ថុធាតុដើម និងដោយសារផ្ទុះឡើង នៃជំងឺផ្លូវដង្ហើមកូវីដ១៩នៅក្នុងប្រទេសចិន។
លោកបន្តថា តាមការគិតទុក ក្នុងករណីដែលដែលបង្ករឡើង ដោយវីរុសកូវិដ១៩នេះគឺអាចប៉ះពាល់ ដល់រោងចក្រជាង២០០នៅទូរទាំងប្រទេស ប៉ុន្តែយ៉ាងណាក៏ដោយ ទាំងក្រសួងការងារ និងក្រសួងជំនាញជាប់ពាក់ព័ន្ធ ដែលជាសេនាធិការរបស់រាជរដ្ឋាភិបាលកម្ពុជា បានប្រឹងប្រែងរិះរកវិធីសាស្រ្តធ្វើយ៉ាងណា ពន្លឿនការនាំចូលវត្ថុធាតុដើមពីចិនឲ្យបានឆាប់រហ័សបំផុត ដែលពេលនេះវត្ថុធាត់ដើមទាំងនោះបាន កំពុងដឹកចេញពីប្រទេសចិន ហើយកម្ពុជានឹងបានទទួលមុនគេ។
លោកបានបញ្ជាក់ថា “ការបិទទ្វារបណ្តារោងចក្រទាំងអស់នេះ អាចប្រឈមក្នុង រយៈពេលបណ្តោះអាសន្ន ដោយសារយើងដឹងថា ខាងរោងចក្រផលិតវត្ថុធាតុដើមមួយចំនួននៅប្រទេសចិន នឹងចាប់ផ្តើមដំណើរឡើងវិញនៅត្រឹមអំឡុងខែក្រោយ ហើយកម្ពុជា គឺជាប្រទេសអាទិភាព ក្នុងការទទួលបានវត្ថុធាតុដើម ដើម្បីបន្តដំណើរការឡើងវិញ”។
រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំង ទៅលើបញ្ហាដែលកំពុងប្រឈមរបស់បណ្តារោងចក្រកាត់ដេរ នៅទូទាំងប្រទេសកម្ពុជា ដែលអាចជះឥទ្ធិពលអាក្រក់មកលើកម្មករ -កម្មការិនីជាច្រើន ដែលអាស្រ័យចំណូលពីការងារនៃវិស័យរោងចក្រ។
ជាមួយគ្នានេះ រដ្ឋាភិបាលបានដាក់ឱ្យអនុវត្តនូវវិធានការបន្ទាន់ ដែលអាចជួយសម្រួលនូវផលលំបាករបស់កម្មករ កម្មការិនី ដោយការផ្តល់នូវប្រាក់បៀវត្សរ៍ចំនួន៦០ភាគរយនៃប្រាក់ខែគោល ដោយក្នុងនោះក្រុមហ៊ុនចំណាយ៤០ភាគរយ។
ស្ថានទូតចិនប្រចាំនៅកម្ពុជាបាននិយាយថា វត្ថុធាតុដើមប្រហែល៦០ភាគរយដែលត្រូវបានប្រើ នៅក្នុងរោងចក្រកាត់ដេរសម្លៀកបំពាក់ និងស្បែកជើងនៅក្នុងប្រទេសកម្ពុជាគឺនាំចូលមកពីប្រទេសចិន។
ស្ថានទូតបានឱ្យដឹងថា “ការរីករាលដាលនៃ Covid-19 នៅក្នុងប្រទេសចិនកំពុងតែធ្វើឱ្យរោងចក្រនានាទទួលរងនៅផលប៉ះពាល់ និងធ្វើឱ្យរោងចក្រជាច្រើនប្រឈមមុខ នឹងកង្វះខាតវត្ថុធាតុដើម។ រដ្ឋាភិបាលចិនប្តេជ្ញាស្វែងរកដំណោះស្រាយ ឱ្យបានឆាប់រហ័សបំផុត។
រដ្ឋាបាលចិនកាលពីសប្តាហ៍មុន បានបញ្ជូនមន្ត្រីជំនាញពាក់ព័ន្ធតាមរយៈអគ្គនាយកដ្ឋានកិច្ចការអាស៊ី នៃក្រសួងពាណិជ្ជកម្មចិនបានមកកាន់ប្រទេសកម្ពុជា ស្វែងយល់ពីផលប៉ះពាល់ នៃកង្វះខាតការផ្គត់ផ្គង់វត្ថុធាតុដើម សម្រាប់រោងចក្រកាត់ដេរ និងពីការព្យួរផ្នែកមួយ នៃប្រព័ន្ធអនុគ្រោះពន្ធក្រោមក្របខណ្ឌ EBA ដល់រោងចក្រសហគ្រាសនានា និងលទ្ធភាពនៃការគាំទ្ររបស់រដ្ឋាភិបាលចិនមកដល់កម្ពុជា ក្នុងការកាត់បន្ថយផលប៉ះពាល់ទាំងនេះ ក៏ដូចជាការលើកទឹកចិត្តដល់សហគ្រាសចិន ឱ្យមកបណ្តាក់ទុនវិនិយោគនៅកម្ពុជាបន្ថែមទៀត៕
