ដោយវុត្ថា
ភ្នំពេញ៖ សហព័ន្ធស្រូវអង្ករកម្ពុជាគ្រោងស្នើសុំកញ្ចប់កម្ចីថវិកាពីរដ្ឋាភិបាល ដើម្បីយកមកប្រមូលទិញស្រូវទុកសម្រាប់ទិញស្រូវនារដូវប្រមូលផលជុំទី១ និងជុំទី ១ ខណៈសំណើរនេះ នឹងលើកយកទៅសិក្សា និងស្នើសុំគោលការណ៍ពីរាជរដ្ឋាភិបាលកម្ពុជាជាមុនសិន។
នេះ បើយោងតាមកិច្ចប្រជុំ កិច្ចប្រជុំរវាងធនាគារអភិវឌ្ឍន៍ជនបទ និងសហព័ន្ធស្រូវអង្ករកម្ពុជា ស្តីពី កញ្ចប់ថវិកាកម្ចី និងការពន្យារពេលសងត្រឡប់ប្រាក់កម្ចីកាលពីថ្ងៃទី ១១ ខែមីនា ឆ្នាំ ២០២០ ម្សិលមិញនេះ ដឹកនាំដោយ លោក កៅ ថាច អគ្គនាយកធនាគារអភិវឌ្ឍន៍ជនបទ និងលោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា។
កិច្ចប្រជុំនេះផ្តោតលើបញ្ហាមួយចំនួនទាក់ទងនឹងកញ្ចប់ថវិកាកម្ចី និងសំណើសុំពន្យារពេលសងត្រឡប់ប្រាក់កម្ចីដូចខាងក្រោម៖
១. ការត្រៀមខ្លួនលើការទិញស្រូវសម្រាប់រដូវកាលបន្ទាប់ឆ្នាំ២០២០-២០២១ ដោយសហព័ន្ធស្រូវអង្ករកម្ពុជា បានលើកជាសំណើដល់រាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ ឱ្យរក្សាទុកកញ្ចប់ថវិកាពិសេស ៥០ (ហាសិប)លានដុល្លារអាមេរិករបស់រាជរដ្ឋាភិបាលកម្ពុជាដែលវានបញ្ចេញកន្លងមក ទុកសម្រាប់ទិញស្រូវនារដូវប្រមូលផលជុំទីមួយខាងមុខ (ស្រូវក្រអូប: ស្រូវសែនក្រអូប) និងស្នើសុំបន្ថែមថវិកា ៣០ (សាមសិប)លានដុល្លារអាមេរិកសម្រាប់ជុំទីពីរបន្ទាប់ (ស្រូវក្រអូបប្រណិត: ស្រូវផ្ការំដួល រំដេង រមៀត សូម៉ាលី…) ហើយក៏ស្នេីបន្ថែមរយៈពេលបង្វិលសងពី ៦ខែទៅ១២ខែ។
២. រួមទាំងការស្នើសុំឱ្យមានការពន្យារពេលលើការសងត្រឡប់ចំពោះក្រុមហ៊ុននាំចេញអង្ករ និងរោងម៉ាស៊ីនកិនស្រូវមួយចំនួនក្នុងកាលៈទេសៈប្រឈមនឹងការរីករាលដាលនៃវីរុសកូវីដ-១៩ (COVID-19&) ដោយហេតុផលអ្នកនាំចេញមួយចំនួនមានការពន្យារពេលទូទាត់ពីអ្នកបញ្ជាទិញរបស់ប្រទេសនាំចូល ដែលនាំឱ្យលំហូរសាច់ប្រាក់របស់ក្រុមហ៊ុន និងរោងម៉ាស៊ីនកិនស្រូវមានការខកខាន និងរាំងស្ទះ៕
