ដោយ ប៊ី
ភ្នំពេញ៖ សហស្ថាបនិកក្រុមហ៊ុន Microsoft Corp លោក Bill Gates ដែលបានបង្កើតក្រុមហ៊ុននេះជាក្រុមហ៊ុនបច្ចេកវិទ្យាដ៏មានតម្លៃបំផុតមួយនៅលើពិភព បានលាឈប់ពីក្រុមប្រឹក្សាភិបាលកាលពីថ្ងៃ សុក្រ ដើម្បីផ្តោតលើការងារមនុស្សធម៌ទាក់ទងនឹងសុខភាពការអប់រំ និងការប្រែប្រួលអាកាសធាតុ។
មហាសេដ្ឋីរូបនេះ និងភរិយារបស់លោកគឺលោកស្រី Melinda គ្រប់គ្រងមូលនិធិសប្បុរសធម៌ដ៏ធំមួយរបស់ពិភពលោក មូលនិធិហ្គេត ដែលមានទ្រព្យសម្បត្តិរាប់ពាន់លាន និងផ្តល់មូលនិធិដល់កម្មវិធីសុខភាពពិភពលោកដើម្បីប្រយុទ្ធប្រឆាំងនឹងជំងឺ និងភាពក្រីក្រ។
លោក Bill Gates បានលាឈប់ពីតួនាទីជានាយកប្រតិបត្តិពេញម៉ោងនៅក្រុមហ៊ុន Microsoft ក្នុងឆ្នាំ ២០០៨ ហើយនៅតែបន្តធ្វើជាប្រធានក្រុមប្រឹក្សាភិបាលរហូតដល់ឆ្នាំ ២០១៤។ ចាប់តាំងពីពេលនោះមក លោកបានក្លាយជាសមាជិកក្រុមប្រឹក្សាភិបាល។
លោក Satya Nadella នាយកប្រតិបត្តិបានមានប្រសាសន៍ថា “វាជាកិត្តិយស និងឯកសិទ្ធិដ៏ធំធេងដែលបានធ្វើការជាមួយ និងរៀនសូត្រពីលោក Bill ក្នុងរយៈពេលប៉ុន្មានឆ្នាំកន្លងមកនេះ”។
ក្រុមហ៊ុនបានឱ្យដឹងថា ជាមួយនឹងការចាកចេញរបស់លោក Bill Gates ពីក្រុមប្រឹក្សាភិបាលក្រុមហ៊ុន Microsoft ឥឡូវនេះក្រុមហ៊ុននឹងមានសមាជិក ១២ រូប។
លោកហ្គេតក៏លាឈប់ពីក្រុមប្រឹក្សាភិបាលរបស់ក្រុមហ៊ុន Berkshire Hathaway Inc ដែលលោកបានបម្រើការងារតាំងពីឆ្នាំ ២០០៤៕
