ដោយវុត្ថា
ភ្នំពេញ៖ ក្រុមហ៊ុន ហ្វុកស៍ ( ខេមបូឌា ) បានចុះកិច្ចសន្យាផលិតកម្មកសិកម្ម ទិញ-លក់ម្រេច ចំនួន ២៤៥ តោនសហភាពសមាគមន៍ កសិកម្ម ខេត្តត្បូងឃ្មុំ ដើម្បីលើកកម្ពស់ គុណភាព សុវត្ថិភាព កសិផល លើកស្ទួយ ជីវភាព ប្រជាកសិករ ធានានិរន្តរភាព ទីផ្សារនិង តម្លៃ ។
លោក ពាង ណារិទ្ធ អភិបាល រង ខេត្តត្បូងឃ្មុំ នៅក្នុងពិធីចុះកិច្ចសន្យា ផលិតកម្មកសិកម្មលើកនាថ្ងៃទី ២៤ ខែមីនា ឆ្នាំ ២០២០នេះ ឡើងថា ព្រឹត្តិការណ៍នា ឱកាសនេះ ពិតជាមាន អត្ថន័យ និង បង្ហាញពី វឌ្ឍនភាព នៃ កិច្ចខិតខំប្រឹងប្រែង របស់យើងទាំងអស់គ្នា ក៏ដូចជា រាជរដ្ឋាភិបាល ដែលពី មួយថ្ងៃទៅមួយថ្ងៃ បាន រិះរក គ្រប់ យុទ្ធវិធី សំដៅ លើកស្ទួយ ជីវភាពប្រជាកសិករ ក្នុង បរិបទ ពាណិជ្ជូបនីយកម្ម សកលភាវូបនីយកម្ម។
លោកបន្តថា ពិធីនេះ ជា លើកដំបូង សម្រាប់ខេត្តត្បូងឃ្មុំ ដែល គោលបំណង នៃ ផលិតកម្មកសិកម្ម តាមកិច្ចសន្យា គឺ ពង្រឹងការ ទទួលខុសត្រូវ និង ភាព ជឿទុកចិត្តគ្នា រវាង ភាគី អ្នក ផលិត និង ភាគី អ្នកទិញ ដោយឈរលើ គោលការណ៍ ស្មើគ្នា និង យុត្តិធម៌ ធានាឱ្យមានភាព ច្បាស់លាស់ អំពី តម្លៃ ការ ប្រមូល ទិញ ការ ផ្គត់ផ្គង់ ផលិតផលកសិកម្ម តាម បរិមាណ និង គុណភាព បង្កើនការ ប្រមូលទិញ ការ កែច្នៃ ការ នាំចេញ ផលិតផលកសិកម្ម រួមចំណែក អភិវឌ្ឍន៍ សេដ្ឋកិច្ចជាតិ កាត់បន្ថយភាពក្រីក្រ របស់ប្រជាពលរដ្ឋ ស្របតាម គោលនយោបាយ របស់រាជរដ្ឋាភិបាលកម្ពុជា។
លោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តត្បូងឃ្មុំ បានឱ្យដឹងថា ខេត្តត្បូងឃ្មុំ មានសក្តានុពល លើ ដំណាំឧស្សាហកម្ម ដូចជា កៅស៊ូ ដំឡូងមី ម្រេច ពោតក្រហម ស្វាយចន្ទី ស្វាយកែវរមៀត ជាដើម ។
លោកបន្តថា ក្នុងនោះដំណាំ ម្រេច នៅក្នុងខេត្តត្បូងឃ្មុំ ដែលពលរដ្ឋ បន្តថែទាំ នៅសល់ ចំនួន ជិត២០០០ ហិចតា ដោយ បច្ចុប្បន្ន ម្រេច ផ្តល់ទិន្នផល ៣,៧ តោន ក្នុងមួយ ហិចតា នោះ បរិមាណ ផល ម្រេច ក្នុងខេត្តត្បូងឃ្មុំ ផ្តល់ផល ក្នុង រង្វង់ ៧០០០ តោន ក្នុងមួយឆ្នាំ។
បច្ចុប្បន្ននេះ មន្ទីរកសិកម្មរុក្ខាប្រមាញ់និងនេសាទ សម្របសម្រួល ទើបបាន មួយ កិច្ចសន្យានេះ ដែល បាន ចូល ជា ធរមាន គឺ រវាង សហភាពសមាគមន៍កសិកម្ម គ្រឿងទេស កម្ពុជា និង ក្រុមហ៊ុន ហ្វុកស៍ ( ខេមបូឌា) ឯ.ក លើ កិច្ចសន្យា ទិញ លក់ ផលិតផល ម្រេច ចំនួន ២៤៥ តោន ដែលមាន សមាជិក ផ្គត់ផ្គង់ ចំនួន ៤៤នាក់ ផងដែរ៕
