ដោយ ៖ រ៉ាណេត
ភ្នំពេញ ៖ អាជ្ញាធរអគ្គិសនីកម្ពុជា បានចេញសេចក្ដីណែនាំ និងអំពាវនាវដល់សាធារណៈជនស្ដីពីការបង្កើតឱ្យមានជម្រើសបង់ថ្លៃការប្រើប្រាស់ថាមពលអគ្គិសនីតាមសេវាអេឡិកត្រូនិច ដើម្បីកាត់បន្ថយការទូទាត់សាច់ប្រាក់ផ្ទាល់។
នៅក្នុងសេចក្ដីអំពាវនាវរបស់អាជ្ញាធរអគ្គិសនីកម្ពុជា បានលើកឡើងថា សម្រាប់អ្នកដែលកាន់អាជ្ញាបណ្ណធ្វើអាជីវធ្វើសេវាកម្មផ្គត់ផ្គង់អគ្គិសនីនៅព្រះរាជាណាចក្រកម្ពុជាមេត្តាជ្រាបថា ក្នុងគោលបំណងចូលរួមបង្ការ និងទប់ស្កាត់ការរីករាលដាលនៃជំងឺ Covid-19 អាជ្ញាធរអគ្គិសនីកម្ពុជា ស្នើអ្នកកាន់អាជ្ញាបណ្ណធ្វើសេវាកម្មផ្គត់ផ្គង់អគ្គិសនីទាំងអស់បង្កើតឱ្យមានជម្រើសបង់ថ្លៃប្រើប្រាស់ថាមពលអគ្គិសនីតាមសេវាអេឡិកត្រូនិច។
ជាមួយគ្នានេះ ម្ចាស់កាន់អាជ្ញាប័ណ្ណទាំងអស់ក៏ត្រូវចូលរួមជម្រុញលើកទឹកចិត្តអតិថិជនឱ្យប្រើប្រាស់សេវានេះ ដើម្បីកាត់បន្ថយការទូទាត់សាច់ប្រាក់ផ្ទាល់ទៅតាមលទ្ធភាពដែលអាចធ្វើបានផងដែរ។
កាលពីពេលកន្លងទៅថ្មីៗនេះ រដ្ឋាភិបាល តាមរយៈអាជ្ញាធរអគ្គិសនីកម្ពុជា ក៏បានណែនាំដល់អ្នកដែលកាន់អាជ្ញាបណ្ណផ្គត់ផ្គង់អគ្គិសនីនៅទូទាំងព្រះរាជាណាចក្រកម្ពុជា ស្តីពីកិច្ចសហការភ្ជាប់ចរន្តអគ្គិសនីឱ្យទីតាំងសំខាន់ៗ និងចាំបាច់សម្រាប់បម្រើដល់ការងារទប់ទល់នឹងជម្ងឺរាតត្បាត Covid-19៕
