ដោយ ៖ រ៉ាណេត
ភ្នំពេញ ៖ ប្រជាពលករកម្ពុជាដែលបានវិលត្រឡប់ពីបណ្តាប្រទេសជិតខាងចូលមកកាន់កម្ពុជាវិញសរុប ២២២៧៤នាក់ ត្រូវបានរដ្ឋាភិបាលកំពុងផ្តោតការយកចិត្តទុកដាក់ ដើម្បីការពារ និងទប់ស្កាត់ការរីករាលដាលជំងឺ Covid-19 ខណៈដែលចំនួនអ្នកផ្ទុកមេរោគនេះបានបន្តកើនឡើងរហូតដល់៩៦នាក់។
គិតត្រឹមថ្ងៃទី២៤ ខែមីនា ឆ្នាំ២០២០ វេលាម៉ោង៥ល្ងាច ចំនួនប្រជាពលករកម្ពុជា ដែលវិលត្រឡប់មកពីបម្រើការងារនៅតាមបណ្តាប្រទេសជិនខាងនានា បានវិលត្រឡប់មកកាន់ទឹកដីប្រទេសកំណើតមានចំនួន ២២២៧៤ ដែលក្នុងនោះស្ត្រីមានចំនួន៩៨១៧នាក់ និងបុរស ១២០៦៦ ក្មេងតូចចំនួន ៣៩១នាក់ ដោយអ្នកទាំងអស់នេះ ត្រូវបានរាជរដ្ឋាភិបាលកំពុងមានការព្រួយបារម្ភ និងពិនិត្យទៅលើសុខភាពយ៉ាងត្រឹមត្រូវនៅច្រកព្រំដែន ដើម្បីបញ្ចៀសនូវហានិភ័យចម្លងជំងឺ Covid-19។
សម្ដេចក្រឡាហោម ស ខេង បានមានប្រសាសន៍ថា ក្រៅតែបាន និងកំពុងរីករាលដាលនៅបណ្ដាប្រទេសស្ទើរទាំងអស់លើពិភពលោក ពិសេសនៅតំបន់អឺរ៉ុប អាមេរិក និងមជ្ឈឹមបូព៌ា បន្ទាប់ពីប្រទេសចិនមានសភាពធូរស្រាលនោះ នៅពេលនេះតំបន់អាស៊ានទាំង១០ប្រទេស សុទ្ធតែមានអ្នកឆ្លងជំងឺកូវីដទាំងអស់ ។
សម្ដេចបានបញ្ជាក់អំពីការសម្រេចចិត្តដាក់ប្រទេសក្នុងគ្រាមានអាសន្នរបស់រដ្ឋាភិបាលថៃដើម្បីអនុវត្តវិធានការទប់ស្កាត់ការរីករាលដាលជំងឺ Covid-19 បន្ទាប់ពីបានបិទការដ្ឋានការងារមួយចំនួន ធ្វើឱ្យពលរដ្ឋថៃនៅទំនេរ ហើយពលរដ្ឋខ្មែរខ្លះនៅទីនោះក៏ទំនេរពីការងារ ។
ព្រោះតែដូច្នេះហើយ សម្ដេចបានផ្ដល់ការពន្យល់ថាពលរដ្ឋខ្មែរទំនេរពីការងារ និងមានការភ័យខ្លាចផងនោះ បានចាប់ផ្ដើមសំរុកនាំគ្នាវិលត្រឡប់មកប្រទេសកម្ពុជាវិញនាប៉ុន្មានថ្ងៃមុន ដែលធ្វើឱ្យអាជ្ញាធរច្រកទ្វារព្រំដែនជួបការលំបាកក្នុងការពិនិត្យសុខភាពពួកគាត់ពេលឆ្លងព្រំដែន ។ ដោយសារពួកគាត់បានធ្វើដំណើរដល់ស្រុកកំណើតហើយនោះ សម្ដេចបានសុំគោលការណ៍ពីសម្ដេចតេជោ ដើម្បីណែនាំអាជ្ញាធរខេត្តក្រុង-ស្រុក-ខណ្ឌ និងភូមិ-ឃុំ ត្រូវគ្រប់គ្រងវត្តមានពួកគាត់ឱ្យបាន និងស្នើឱ្យពួកគាត់នៅដោយឡែក១៤ថ្ងៃសិន ។
ពាក់ព័ន្ធនឹងការដាក់ប្រទេសក្នុងគ្រាមានអាសន្នរបស់រដ្ឋាភិបាលថៃ សម្ដេចបានមានប្រសាសន៍ថាប្រសិនបើមានពលរដ្ឋខ្មែរយើងបន្តធ្វើដំណើរចូលមកប្រទេសវិញនោះ គឺរាជរដ្ឋាភិបាលយើងមិនអាចទប់ស្កាត់ពលរដ្ឋយើងមិនឱ្យវិលមកវិញបានទេ។
សម្ដេចបានណែនាំឱ្យត្រៀមទទួលស្វាគមន៍ពួកគាត់ដោយប្រកាន់អកប្បកិរិយាថ្លៃថ្នូរសុភាពរាបសារ និងទន់ភ្លន់ ប៉ុន្តែត្រូវវិធានការម៉ឺងម៉ាត់តាមក្បួនសុខាភិបាល ដើម្បីធានាសុខសុវត្ថិភាពពួកគាត់ និងក្រុមគ្រួសារនៅឯស្រុកកំណើត ។ ជាមួយគ្នានេះក៏ត្រូវមានកិច្ចសហការល្អជាមួយអាជ្ញាធរខេត្តខាងភាគីថៃដែរ។
សម្ដេចបានណែនាំឱ្យអាជ្ញាធរប្រចាំច្រកទ្វារព្រំដែន ត្រូវកត់ត្រាឱ្យបានច្បាស់នូវអត្តសញ្ញាណពលរដ្ឋដែលបានវិលចូលមកប្រទេស ដើម្បីធានាតាមដានស្រាវជ្រាវរកពួកគាត់ ប្រសិនបើមានបញ្ហាណាមួយ ហើយជាមួយគ្នានេះត្រូវខិតខំពិភាក្សាជាមួយភាគីថៃដើម្បីចៀសវាងការអនុញ្ញាតឱ្យឆ្លងកាត់តាមច្រករបៀង ដែលនាំឱ្យជួបការលំបាកក្នុងការពិនិត្យសុខភាព និងកំណត់អត្តសញ្ញាណពួកគាត់ ពោលគឺត្រូវកំណត់ច្រកទ្វារច្បាស់លាស់សម្រាប់ការវិលចូលប្រទេសរបស់ពលរដ្ឋខ្មែរយើង។
សម្ដេចក៏បានណែនាំឱ្យត្រៀមផ្ដល់ម៉ាស់ជូនពលរដ្ឋទាំងឡាយណា ដែលឆ្លងមកពីប្រទេសថៃដោយមិនមានម៉ាស់ប្រើប្រាស់ ហើយត្រូវស្នើសុំពួកគាត់សហការពិនិត្យកំដៅ និងអញ្ជើញពួកគាត់ទៅកន្លែងដែលត្រូវកត់ត្រាអត្តសញ្ញាណសិន។
ប្រជាពលករដែលវិលត្រឡប់ចូលមកកាន់កម្ពុជាចំនួន២២២៧៤នាក់ខាងលើនេះ មានមកពីប្រទេសថៃចំនួន ៩៣០៦នាក់ មកពីប្រទេសចិន ចំនួន៣៩នាក់ មកពីប្រទេសម៉ាឡេស៊ីចំនួន៣៧នាក់ មកពីប្រទេសកូរ៉េចំនួន៩១នាក់ មកពីប្រទេសវៀតណាមចំនួន១៩នាក់ មកពីប្រទេសឡាវចំនួន២នាក់ និងមកពីប្រទេសឥណ្ឌាចំនួន៦៤នាក់ ៕
