ដោយ វុត្ថា
ប៉េកាំងៈ របាយការណ៍មួយបង្ហាញថា ការលក់អចលនទ្រព្យនៅក្នុងប្រទេសចិនមានការកើនឡើងគួរឱ្យកត់សម្គាល់ នៅក្នុងខែមីនា ស្របពេលដែលការងើបឡើងវិញនៃសេដ្ឋកិច្ច បន្ទាប់ពីការផ្ទុះឡើងនៃមេរោគថ្មីនៅក្នុងប្រទេសចិន។
តាមការស្ទង់មតិ ដែលបានធ្វើឡើងជាមួយថ្នាក់ដឹកនាំ ក្រុមហ៊ុនអភិវឌ្ឍន៍អចលនទ្រព្យធំៗចំនួន១០០នាក់បានបង្ហាញថា ការលក់អចលនទ្រព្យរបស់ពួកគេ មានការកើនឡើងប្រមាណ១៣៦,២ភាគរយនៅក្នុងខែមីនា ប៉ុន្តែនៅតែធ្លាក់ចុះ១៧ភាគរយបើធៀបរយៈពេលពីមួយឆ្នាំទៅមួយឆ្នាំ។
យោងតាមទិន្នន័យពីវិទ្យាស្ថានស្រាវជ្រាវអចលនទ្រព្យបានឱ្យដឹងថា ការលក់កិច្ចសន្យារបស់ក្រុមហ៊ុន Country Garden ជាក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ប្រទេសចិនបានបង្ហាញថា ក្រុមហ៊ុននេះបានលក់អចលនទ្រព្យចេញ បើគិតជាទឹកប្រាក់មានរហូតដល់៦៦ពាន់លានយន់ (ប្រហែល ៩,៣៨ ពាន់លានដុល្លារអាមេរិក) នៅក្នុងខែមីនា។
ក្រុមហ៊ុនអភិវឌ្ឍន៍ចិនដ៏ធំមួយផ្សេងទៀត គឺក្រុមហ៊ុន China Merchants Shekou Industrial Zone Holdings Co. , Ltd បានឱ្យដឹងងដែរថា ការលក់ក្នុងខែមីនារបស់ខ្លួនបានកើនឡើង២២,១ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលសម្រេចបានទឹកប្រាក់ដល់២១,៧៤ ពាន់លានយន់។
វិទ្យាស្ថានស្រាវជ្រាវអចលនទ្រព្យ (CRIC) បាននិយាយថា ទោះបីជាមានការរីករាលដាលនៃ Covid-19 ដែលបង្កផលប៉ះពាល់លើការលក់ ការចែកចាយ និងការទូទាត់របស់សហគ្រាសលំនៅដ្ឋានក៏ដោយ ក៏លទ្ធផលទីផ្សារបច្ចុប្បន្ន កំពុងងើបឡើងវិញជាបណ្តើរ។
CRIC ថា ដើម្បីសម្រេចបាននូវគោលដៅលក់សម្រាប់ឆ្នាំ២០២០ ក្រុមហ៊ុនអភិវឌ្ឍន៍អចលនទ្រព្យនានា គួរតែយកចិត្តទុកដាក់បន្ថែមទៀត ចំពោះយុទ្ធសាស្ត្រទីផ្សារ រួមមានការបើកបណ្តាញលក់ តាមរយៈការរួមបញ្ចូលគ្នា នៃវិធីសាស្ត្រតាមអ៊ិនធរណេត និងក្រៅបណ្តាញដើម្បីទាក់ទាញអតិថិជនកាន់តែច្រើន៕
