ដោយ វុត្ថា
កំពង់ចាមៈ ការសាងសង់ស្ពានឆ្លងកាត់ទន្លេមេគង្គ នៅស្រុកស្ទឹងត្រង់ ខេត្តកំពង់ចាម តភ្ជាប់ជាមួយស្រុកក្រូចឆ្មារ ខេត្តត្បូងឃ្មុំ មានបណ្តោយប្រវែង១១៣១ម៉ែត្រ ទទឹងប្រវែង១៣.៥០ ម៉ែត្រ ជាហិរញ្ញប្បទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រហូតមកដល់ពេលបច្ចុប្បន្ននេះ សម្រេចបានប្រមាណ៧៥%ហើយ។
នេះបើយោងតាមការឱ្យដឹងពី អភិបាលនៃគណៈអភិបាលខេត្តកំពង់ចាម លោក អ៊ុន ចាន់ដា ដែលបានដឹកនាំមន្ត្រីជំនាញពាក់ព័ន្ធ និងអាជ្ញាធរមូលដ្ឋានចុះពិនិត្យវឌ្ឍនភាពនៃការសាងសង់ស្ពាននេះកាលពីចុងសប្តាហ៍កន្លងមកនេះ ខណៈក្រុមការងារសាងសង់កំពុងមមាញឹក ក្នុងការសាងសង់ឱ្យចប់តាមផែនការ និងទោះបីកម្ពុជាកំពុងប្រឈមជំងឺកូវីដ១៩យ៉ាងណាក្តី។
ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ បានបើកការដ្ឋានសាងសង់កាលពីថ្ងៃទី៩ ខែកុម្ភៈ ឆ្នាំ ហើយបើគិតតាមគម្រោងសាងសង់ ផ្លូវថ្នល់ និងតួស្ពាននឹងត្រូវតភ្ជាប់គ្នានៅចុងខែធ្នូខាងមុខ ចំណែកឯបរិក្ខារបន្ទាប់បន្សំ (កម្រាលស្រទាប់AC គំនូសសញ្ញា និងបង្គោលបំភ្លឺផ្លូវ) នឹងចប់សព្វគ្រប់នៅឆ្នាំ២០២១នេះ។
គម្រោងសាងសង់ស្ពាននេះ ចាប់ផ្តើមពីត្រើយខាងលិច ស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើតស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ។
គម្រោងសាងសង់ស្ពាននេះ គ្រោងចំណាយថវិកាសរុបជិត៥៧លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់និងបោសសម្អាតយុទ្ធភ័ណ្ឌមិនទាន់ផ្ទុះ៕
