ដោយ ប៊ី
ភ្នំពេញ៖ ទិន្នន័យពីក្រសួងដែនដី នគរូបនីយកម្ម និងសំណង់ បានឱ្យដឹងថា វិស័យសំណង់របស់កម្ពុជាបានទាក់ទាញទុនវិនិយោគបានជាង ២,៥០០ លានដុល្លារពី ១០០០ គម្រោងដែលទទួលបានការអនុញ្ញាតសាងសង់ពីក្រសួងនៅក្នុងត្រីមាសទី១ នៃឆ្នាំនេះ។
កម្ពុជាទាក់ទាញទុនវិនិយោគក្នុងវិស័យសំណង់ ២,៥០០ លានដុល្លារក្នុងត្រីមាសទី១ ឆ្នាំនេះ
ក្រសួងបានឱ្យដឹងថា ទុនវិនិយោគពីវិស័យសំណង់នៅក្នុងត្រីមាស១នេះ បានកើនឡើង ៥១ ភាគរយ បើធៀបនឹងរយៈពេលដូចគ្នាកាលពីឆ្នាំមុន បើទោះបីជាកម្ពុជាកំពុងជួបនឹងវិបត្តិ COVID-19។
ក្រសួងបានចេញលិខិតអនុញ្ញាតសាងសង់សំណង់គម្រោងជាង ១០០០ ដោយបានកើនឡើងលើសឆ្នាំមុន ១៧គម្រោងគិតត្រឹមត្រីមាសទី១ ឆ្នាំ២០២០។
ទិន្នន័យខាងលើ បានឱ្យដឹងថា គម្រោងចំនួនជា ១០០០នេះមានទឹកប្រាក់ជាង ២.,៥០០លានដុល្លារ ធៀបនឹងឆ្នាំមុន មានទុនវិនិយោគត្រឹមតែជាង ១,៧០០លានដុល្លារប៉ុណ្ណោះ ពោលគឺទុននិយោគបានកើនឡើងជាង ៥១ ភាគរយ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានមានប្រសាសន៍ ក្នុងសន្និសីទសារព័ត៌មានស្ដីពី “វឌ្ឍនភាពការងាររបស់ក្រសួងរៀបចំដែនដី នគរូបនីយកម្ម និងសំណង់ និងលើកទិសដៅបន្ត” កាលពីខែមីនា ឆ្នាំ២០២០ ថា បច្ចុប្បន្ននេះ គម្រោងសាងសង់សំណង់ជាច្រើន នៅតែមានសកម្មភាពក្នុងការអភិវឌ្ឍដដែល ដោយចំនួនសរុបមានរហូតដល់៥២៣គម្រោង គិតត្រឹមចុងខែកុម្ភៈ ឆ្នាំ២០២០ ខណៈដែលក្នុងរយៈពេលដូចគ្នាកាលពីឆ្នាំ២០១៩ មានចំនួនត្រឹមជាង៣០០គម្រោងតែប៉ុណ្ណោះ។
លោកបានបញ្ជាក់ថា “ជាមួយនឹងការកើនឡើងនូវចំនួនគម្រោងអភិវឌ្ឍន៍ ក្នុងវិស័យសំណង់នេះ បានជំរុញឱ្យទុនវិនិយោគកើនឡើងស្ទើរទ្វេដង ហើយវានឹងនៅតែបន្តកើនឡើងទៀត ប្រសិនបើបញ្ហានៃជំងឺCovid-19 ត្រូវបានទប់ស្កាត់ប្រកបដោយប្រសិទ្ធភាពក្នុងពេលដ៏ខ្លីខាងមុខនេះ”។
របាយការណ៍ដដែលបង្ហាញទៀតថា គម្រោងអគារខ្ពស់ៗចាប់ពី ៥ជាន់ឡើងទៅ មាន៩៧ គម្រោងស្មើនឹង ១១៥អគារ, សំណង់លំនៅដ្ឋានមាន ៩០៦ គម្រោង, សំណង់បុរីលំនៅដ្ឋាន និងលក្ខណៈបុរី ១៩គម្រោងស្មើនឹងជាង ៤ពាន់ខ្នង, អគារផ្ទះល្វែងជាង ៥.៥០០ល្វែង, អគារស្នាក់នៅរួម ៤១ គម្រោង, សំណង់សណ្ឋាគារ ៩គម្រោង, សំណង់អគារពាណិជ្ជកម្ម ១១៤គម្រោង, សំណង់អគាររោងចក្រ ២៥ គម្រោង និងសំណង់អគារពហុមុខងារចំនួន ១៧ គម្រោង៕
