ដោយ ហ្សូលី
ភ្នំពេញ៖ គម្រោង The Peak ដែលជាគម្រោងសាងសង់មជ្ឈមណ្ឌលពាណិជ្ជកម្មលំនៅដ្ឋាន នៅតែបន្តមានវឌ្ឍនភាពសាងសង់ជាបន្តបន្ទាប់ ទោះបីជាត្រូវប្រឈមនឹងបញ្ហាមួយចំនួនដូចជា ការខ្វះខាតកម្លាំងពលកម្ម និងការពន្យាពេលផ្គង់ផ្គង់ទីផ្សារអំឡុងពេលវិបត្តិ Covid-19 ក្តី។
គម្រោង The Peak នៅតែមានវឌ្ឍនភាព ទោះបីប្រឈមនឹងបញ្ហាមួយចំនួន
ក្រុមហ៊ុន Oxley Gem (Cambodia) Co., LTD ដែលជាក្រុមហ៊ុនម្ចាស់គម្រោងអភិវឌ្ឍន៍ចម្រុះ The Peak ទើបតែប្រកាសកាលពីខែមីនាកន្លងមុននេះថា គម្រោងសាងសង់ The Peak បានផ្លាស់ប្តូរក្រុមហ៊ុនសាងសង់ហើយដោយប្រគល់ជូនការងារនេះទៅឱ្យក្រុហ៊ុន China Railway Urban Construction Group Co,. Ltd វិញ។ មកទល់ពេលនេះដំណើរការនៃការសាង់សង់នៅតែបន្តជាធម្មតា ទោះបីជាមានការរអាក់រអួលបន្តិចបន្តួចដោយសារមេរោគ Covid-19 យ៉ាងណាក្តី។
ក្រុមហ៊ុន China Railway Urban Construction Group Co,. Ltd បានស្វែងរកដំណោះស្រាយយ៉ាងជោគជ័យដើម្បីពន្លឿនវឌ្ឍនភាពគម្រោង ដោយបង្កើនដំណើរការសាងសង់ទាំងយប់ទាំងថ្ងៃ ជាមួយកម្លាំងពលកម្មបន្ថែម។
អគ្គនាយកសាខានៃក្រុមហ៊ុន China Railway Urban Construction Group លោក Jia Ruo Hua បានមានប្រសាសន៍ថ្លែងអំណរគុណដល់ចំពោះម្ចាស់គម្រោងដែលបានផ្តល់ទំនុកចិត្តនិងផ្តល់ឱកាសក្នុងការគ្រប់គ្រងគម្រោង The Peak នេះ។
គម្រោង The Peak ស្ថិតនៅក្នុងសង្កាត់ ទន្លេបាសាក់ ខណ្ឌចំការមន រាជធានីភ្នំពេញ ហើយជាគម្រោងអភិវឌ្ឍន៍ អគារចម្រុះកម្ពស់ ៥៥ជាន់ រួមមាន អគារ១សម្រាប់សណ្ឋាគារ និងការិយាល័យ ព្រមទាំង អគារចំនួន២ផ្សេងទៀត គឺជាអគារសម្រាប់ស្នាក់នៅ និងមានផ្សារទំនើប និងចំណតរថយន្ត ជាច្រើនជាន់៕
