ដោយ ប៊ី
អន្តរជាតិៈ ជំងឺ COVID-19 ធ្វើឱ្យអាជីវកម្មជាច្រើនបិទទ្វារ និងមនុស្សរាប់លាននាក់បាត់បង់ការងារធ្វើ វិបត្តិនេះក៏មានផលលំបាកដល់ម្ចាស់ទ្រព្យ ក្នុងការប្រមូលផលជួលផងដែរ។
តាមការប៉ាន់ស្មានពីក្រុមហ៊ុន CBRE ដែលមូលដ្ឋាននៅអាមេរិកបានឱ្យដឹងថា នៅទូទាំងប្រទេសមានតែ១០ ទៅ២០ ភាគរយ នៃអ្នកលក់រាយតាមផ្សារបានបង់ថ្លៃជួលក្នុងខែមេសា ហើយផ្នែកផ្សេងៗទៀត ក្នុងវិស័យអចលនទ្រព្យក៏រងផលប៉ះពាល់ផងដែរ។
ផលប៉ះពាល់នេះគឺមានលក្ខណៈជាសាកល ប៉ុន្តែក្រុមហ៊ុនធំៗបំផុត អាចឈរនៅលើទីតាំងល្អបំផុត ដើម្បីគ្រប់គ្រងវាសនារបស់ពួកគេ ហើយម្ចាស់អចលនទ្រព្យធំៗជាច្រើននៅលើពិភពលោក បានប្រកាសជំហានរួចហើយ ដើម្បីពន្លឿនការត្រឡប់មកវិញនៃវិស័យអចលនទ្រព្យ។
នៅដើមខែឧសភា ក្រុមហ៊ុនអចលនទ្រព្យ Brookfield Asset Management ដែលមានមូលដ្ឋាននៅអាមេរិកបានឱ្យថា ខ្លួននឹងចំណាយប្រាក់ចំនួន៥ពាន់លានដុល្លារ ដើម្បីវិនិយោគ នៅក្នុងអាជីវកម្មលក់រាយ ដែលកំពុងជួបការលំបាក។ ក្រុមហ៊ុន Brookfield ជាម្ចាស់ផ្ទៃក្រឡា នៃទីផ្សារលក់រាយ១៥២លានហ្វីតការ៉េ និងមានការិយាល័យសណ្ឋាគារ និងអាផាតម៉ិន ដែលមានទំហំប្រមាណ៣០០លានលានហ្វីតការ៉េផ្សេងទៀត។
លោកRon Bloom ប្រធានមូលធនឯកជនរបស់ក្រុមហ៊ុន Brookfield មានប្រសាសន៍ថា “យើងជឿជាក់ថា នេះគឺជាសមាសធាតុសំខាន់មួយ ដើម្បីធ្វើឱ្យសេដ្ឋកិច្ចមានដំណើរការឡើងវិញ ហើយយើងចង់ចាប់ដៃគូជាមួយក្រុមហ៊ុន និងសហគ្រិនដែលអាចទាក់ទាញដើមទុន និងជំនាញដើម្បីធ្វើឱ្យមានស្ថេរភាព និងពង្រីកអាជីវកម្មរបស់ពួកគេ” ។
ក្នុងចំណោមក្រុមហ៊ុនអចលនទ្រព្យ ដែលកាន់កាប់ជាសាធារណៈ ក្រុមហ៊ុន Brookfield មានទ្រព្យសម្បត្តិច្រើនបំផុត(៣២៤ ពាន់លានដុល្លារ) ប្រាក់ចំណូលខ្ពស់បំផុត (៦៩ពាន់លានដុល្លារ) ប្រាក់ចំណេញខ្ពស់បំផុតទី២ (២,៨ ពាន់លានដុល្លារ) និងទីផ្សារទី៤ខ្ពស់បំផុត (៥១ ពាន់លានដុល្លារ) ។
លទ្ធផលទាំងនេះ ធ្វើឱ្យBrookfield ក្លាយជាក្រុមហ៊ុនវិនិយោគអចលនទ្រព្យ សាធារណៈធំបំផុតនៅលើភពផែនដី សម្រាប់ឆ្នាំទី៣ ដែលកំពុងដំណើរការ។ នេះបើយោងតាមបញ្ជី Forbes Global 2000 សម្រាប់ឆ្នាំ ២០២០ ។
បញ្ជីGlobal 2000 គឺជាការធ្វើចំណាត់ថ្នាក់ប្រចាំឆ្នាំ របស់ក្រុមហ៊ុនសាធារណៈធំបំផុត និងមានឥទ្ធិពលបំផុតរបស់ពិភពលោក។ បញ្ជីនេះ ផ្អែកលើប្រាក់ចំណូល ប្រាក់ចំណេញ ទ្រព្យសកម្ម និងតម្លៃទីផ្សារ៕ Forbes
