ដោយ វុត្ថា
ភ្នំពេញៈ អភិបាលខេត្តបាត់ដំបងបានអះអាងថា ការជួលសំណង់បុរាណ ដែលបន្សល់ទុកពីសម័យអនានិគមន៍បារាំង ត្រូវបានប្រជាពលរដ្ឋនៅក្នុងក្រុងបាត់ដំបង ជួលទៅឱ្យជនបរទេសសម្រាប់ធ្វើអាជីវកម្ម និងស្នាក់នៅ មានតម្លៃខ្ពស់ ខណៈដែលរាជរដ្ឋាភិបាលគ្រោងរៀបចំទីក្រុងមួយនេះ ទៅជាទីក្រុងបុរាណរបស់កម្ពុជានាពេលខាងមុខ។
លោកងួន រតនៈ អភិបាលខេត្តបាត់ដំបង នៅក្នុងសសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដបាត់ដំបង» នៅថ្ងៃទី ១៣ ខែឧសភា ឆ្នាំ ២០២០ នេះបានឱ្យដឹងថា សំណង់ដែលបន្សល់ទុក ពីសម័យអនានិគមន៍បារាំងកំពុងមានសក្តានុលខ្ពស់លើវិស័យទេសចរណ៍ និងជួល នាពេលបច្ចុប្បន្ននេះ នៅក្នុងចំណោមសក្តានុពលផ្សេងទៀតរបស់ខេត្តបាត់ដំបង។
លោកបន្តថា “ភ្ញៀវទេសចរណ៍មកពីអឺរ៉ុបភាគច្រើន បានមកទស្សនាអគារសំណង់បុរាណនៅក្នុងខេត្ត និងសា្នក់នៅធ្វើជាអាជីវកម្ម ខណៈតាមការស្ថិតិមានសំណង់អគារចំនួន៨០០ទាំងអគារពាណិជ្ជកម្ម និងលំនៅឋាន ព្រមទាំងអគារដ្ឋបាល ខេត្តផងដែរ។លោកបន្តថា “កន្លងមកខេត្តមានការលំបាក ក្នុងការគ្រប់គ្រង់លើសំណង់បុរាណ ដោយសារតែខេត្ត គ្មានឯកគតិយុត្តិត្រឹមត្រូវក្នុងការគ្រប់គ្រង សូម្បីតែអនុក្រឹត្យក៏មិនទាន់មានផងដែរ” ។
លោកអភិបាលខេត្តងួន រតនៈបានបញ្ជាក់ថា អ្វីដែលរដ្ឋបាលខេត្តអាចគ្រប់គ្រងបាននោះគឺ យើងចេះតែពន្យល់ប្រជាពលរដ្ឋអំពីតម្លៃនៃអភិរក្ស ហើយបច្ចុប្បន្ននេះ មានការប្រែប្រួល តាមរយៈការផ្សព្វផ្សាយនេះ សំណង់បុរាណទាំងនោះមានជនបរទេសជួលធ្វើអាជីវកម្មក្នុងតម្លៃខ្ពស់។
លោកថ្លែងថា យើងត្រូវអភិរក្សទាំង៨០០អគារហ្នឹង ឬយើងត្រូវចាត់ចំណាត់ថ្នាក់ ឧទាហរណ៍ចំណាត់ថ្នាក់ A ត្រូវអភិរក្ស១០០% ចំណាត់ថ្នាក់ B គួរតែសិក្សារក្សាខាងក្រៅ រីឯខាងក្នុងត្រូវការកែលម្អរ និងចំណាត់ថ្នាក់Cត្រូវវាយចោល ហើយសាងសង់ថ្មីឬយ៉ាងណា។
លោកងួន រតនៈបានបន្ថែមថា កន្លងមក អាជ្ញាធរខេត្តក៏ធ្លាប់ពិភាក្សាជាមួយក្រសួងរៀបចំដែនដី ក្រសួងវប្បធម៌ និងក្រសួងទេសចរណ៍ដាក់ទីក្រុងនេះ ទៅជាទីក្រុងវប្បធម៌ ។ តែយ៉ាងណាយើងត្រូវសិក្សាឱ្យបានច្បាស់សិន ជៀសវាងដាក់ទាំងមូលតែម្តងទៅ ហើយអនុវត្តមិនបាន។
សំណង់បុរាណនៅក្នុងខេត្តបាត់ដំបង ទាំងអស់មានចំនួន៨០០អគារ ដោយក្នុងនោះមានសំណង់ខ្លះមានអាយុកាល ១០០ឆ្នាំ ឬជាង ១០០ឆ្នាំ ហើយសម្ភារៈមួយចំនួនត្រូវបានខូចខាត ដែលគ្មានអ្វីមកជំនួសបាននោះទេ ដែលទាមទាឱ្យអាជ្ញាធរពាក់សិក្សាឱ្យបានលម្អិត។
កម្ពុជាធ្លាប់បានឆ្លងកាត់សម័យអនានិគមន៍បារាំង ដែលបន្សល់ទុកនៅសំណង់អគារជាច្រើន ហើយត្រូវបានរដ្ឋាភិបាលចាត់ទុកជាសំណង់ប្រវត្តិសាស្ត្រ ដែលមានច្រើននៅក្នុងខេត្តបាត់ដំបង សម្បូរជាងគេក្នុងចំណោមខេត្តផ្សេងៗចំនួន៣ រួមមានក្រចេះ និងកំពតជាដើម ដែលរដ្ឋាភិបាលបាននឹងកំពុងគិតគូគ្រប់គ្រងសំណង់ទាំងនោះ៕
