ដោយ ៖ រ៉ាណេត
កំពង់ស្ពឺៈ បើទោះជាស្ថិតនៅក្នុងដំណាក់កាល នៃការគំរាមកំហែងពីវិបត្តិជំងឺ Covid-19 នៅពេលបច្ចុប្បន្ននេះក៏ដោយ គម្រោងវិនិយោគបន្ថែមពីសំណាក់ក្រុមហ៊ុនអន្តរជាតិមកពីប្រទេសថៃ និងប្រទេសចិន លើវិស័យឧស្សាហកម្ម និងកសិកម្ម នៅក្នុងខេត្តកំពង់ស្ពឺ ដែលមានទុនសរុបរាប់សិបលានដុល្លារ។
អភិបាលខេត្តកំពង់ស្ពឺ លោក វ៉ី សំណាង មានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី១៣ ខែឧសភា ឆ្នាំ២០២០កន្លងមកថា រហូតមកដល់ពេលនេះ នៅក្នុងខេត្តកំពង់ស្ពឺ គឺមានរោងចក្រត្រឹមតែមួយប៉ុណ្ណោះ ដែលបានបិទទ្វារ ដោយសារតែថៅកែរោងចក្ររត់ទៅស្រុករបស់ខ្លួន ប៉ុន្តែស្របពេលជាមួយគ្នានេះ ក៏មានគម្រោងវិនិយោគថ្មីបន្ថែមចូលមកជំនួស។
លោកបានបញ្ជាក់ថា “នៅក្នុងអំឡុងពេលកើតមានវិបត្តិជំងឺ Covid-19 រោងចក្រនៅក្នុងខេត្តកំពង់ស្ពឺ មិនត្រូវបានបិទទ្វារផ្អាកដំណើរការនោះទេ។ ជាមួយគ្នានេះ ក៏មានវិនិយោគិន ដែលជាម្ចាស់ក្រុមហ៊ុនមកពីប្រទេសថៃ និងប្រទេសចិន បានបង្ហាញពីគោលបំណងរបស់ខ្លួន ចូលមកបណ្តាក់ទុនវិនិយោគលើវិស័យឧស្សាហកម្ម និងកសិកម្ម ដែល រដ្ឋាភិបាលកម្ពុជា កំពុងតែផ្តោតការយកចិត្តទុកដាក់ ក្នុងការពង្រីកលទ្ធភាពផលិតសម្រាប់នាំចេញបន្ទាប់ពីវិបត្តិជំងឺ Covid-19 ត្រូវបានទប់ស្កាត់ជាស្ថាពរ” ។
បច្ចុប្បន្ននេះ កំណើននៃចំនួនរោងចក្រ សហគ្រាស ដែលកំពុងមានដំណើរសង្វាក់ផលិតកម្មនៅក្នុងខេត្តកំពង់ស្ពឺ មានរោងចក្រចំនួន២៧១ រួមជាមួយនឹងគម្រោងថ្មីៗជាច្រើនទៀត ដែលទើបតែទទួលបានការអនុម័ត គាំទ្រពីរាជរដ្ឋាភិបាលកម្ពុជា ឱ្យដំណើរការក្នុងពេលដ៏ខាងមុខ ជាមួយនឹងទុនវិនិយោគសរុបជិត២០០លានដុល្លារ។
ដោយឡែកសម្រាប់ទីតាំង នៃគម្រោងវិនិយោគទាំងអស់នេះ មាននៅតាមបណ្តាស្រុក/ក្រុង ផ្សេងៗគ្នាដូចជា ស្រុកគងពិសី ស្រុកសំរោងទង ក្រុងច្បារមន តំបន់សេដ្ឋកិច្ចពិសេសអាល់ត្រាផៅវ័រ ថេកណឡជី ស្រុកភ្នំស្រួច ស្រុកឧដុង្គ និងស្រុកបសេដ្ឋ៕
