ដោយ វុត្ថា
ភ្នំពេញៈ អាកាសយានដ្ឋានអន្តរជាតិភ្នំពេញថ្មី នៅក្នុងទឹកដីខេត្តកណ្តាលត្រូវបានរចនាឡើងលំដាប់ថ្នាក់ 4F នឹងក្លាយជាអាកាសយានដ្ឋានធំជាងគេលំដាប់ទី៩ នៅលើពិភពលោកបន្ទាប់ពីអាកាសយានដ្ឋាន Chicago O’Hare និងនាំមុខអាកាសយានដ្ឋានអន្តរជាតិបេកាំងរបស់ប្រទេសចិន Beijing Capital International ។
អ្នកឧកញ៉ា ពុង ឃាវ សែ ប្រធានក្រុមប្រឹក្សាភិបាលនៃកាណាឌីយ៉ាគ្រុប និង OCIC បានប្រាប់ទស្សនាវដ្តីរបស់ខ្លួនកាលពីកន្លងមកនេះថា នៅពេលសាងសង់បញ្ចប់ អាកាសយានដ្ឋានអន្តរជាតិភ្នំពេញថ្មី នឹងមានសមត្ថភាពគ្រប់គ្រងយន្តហោះដឹកទំនិញធុនធំ និងមានសមត្ថភាពផ្ទុកអ្នកដំណើររហូតដល់២៧ លាននាក់នៅឆ្នាំ២០៣០ និងអ្នកដំណើរ ៣០លាននាក់នៅឆ្នាំ២០៥០ ស្របតាមផែនការមេ។
លោកបន្តថា “គម្រោងអាកាសយានដ្ឋានអន្តរជាតិភ្នំពេញថ្មីនេះ គឺចេញប្លង់សាងសង់ដោយក្រុមហ៊ុន Foster & Partners ដែលជាក្រុមហ៊ុនល្បីល្បាញមួយ នៅលើពិភពលោក។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល ឱ្យដឹងកន្លងមកថ្មីៗនេះថា រហូតមកដល់ពេលនេះ វឌ្ឍនភាពនៃការសាងសង់អាកាសយានដ្ឋានអន្តរជាតិ- ភ្នំពេញថ្មី ដែលស្ថិតនៅក្នុងស្រុកកណ្តាលស្ទឹង ខេត្តកណ្តាល កំពុងតែមានដំណើរការធម្មតា និងសម្រេចបានលទ្ធផលប្រមាណ៣០ភាគរយ។
លោកថាថា “រដ្ឋាភិបាលកម្ពុជាបាននិងកំពុង យកចិត្តទុកដាក់ក្នុងការអភិវឌ្ឍប្រទេសជាតិ តាមរយៈវិស័យសំខាន់ៗជាច្រើន ដែលក្នុងនោះវិស័យអាកាសចរណ៍ស៊ីវិល ក៏ស្ថិតនៅក្នុងវិស័យអាទិភាពផងដែរ” ។
ព្រលានយន្តហោះអន្តរជាតិភ្នំពេញថ្មី គឺជាគម្រោងអភិវឌ្ឍន៍ដ៏ធំមួយរបស់កម្ពុជាដែលបានសាងសង់នៅលើផ្ទៃដីទំហំ២.៦០០ហិកតា និងមានទុនវិនិយោគប្រមាណជា ១,៥ពាន់លានដុល្លារអាមេរិក។ គម្រោងនេះ គ្រោងនឹងបញ្ចប់ដំណាក់កាលទី១ ក្នុងឆ្នាំ២០២៣ ខាងមុខនេះ៕
