ដោយ ហ្សូលី
ភ្នំពេញៈ ប្រទេសកម្ពុជាជាប្រទេសកំពុងអភិវឌ្ឍ លើវិស័យហេដ្ឋារចនាសម្ព័ន្ធ វិស័យឧស្សាហកម្ម វិស័យកសិកម្ម ក្នុងនោះមានវិស័យអចលនទ្រព្យ ដែលជាវិស័យឈានមុខគេ និងមានភាពលេចធ្លោ។
បច្ចុប្បន្នដោយសារកំណើនប្រជាជនក្នុងស្រុក និងការចូលមកដល់របស់វិនិយោគិនមកពីប្រទេសនានាបានបណ្តាលឱ្យមានតម្រូវការច្រើន។ មានអចលនវត្ថុ៣ប្រភេទ មានសភាពរីកដុះដាលជាងគេនៅក្នុងកម្ពុជា ហើយក៏ជាឱកាសមួយក្នុងការប្រមូលទិញផងដែរ។
បុរីលំនៅដ្ឋាន
វិនិយោគិនសម្លឹងឃើញ ពីសក្តានុពលរបស់ប្រទេសកម្ពុជា រួមទាំងរបៀបរបបនៃការរស់នៅរបស់ប្រជាជនកម្ពុជា ហេតុនេះទើបបណ្តាលឱ្យមានការអភិវឌ្ឍ ជាហូរហែលើវិស័យបុរីលំនៅដ្ឋាន។ មិនថាជាយក្រុងឬនៅក្នុងក្រុងនោះទេ សុទ្ធសឹងតែជាឱកាសមួយដ៏ល្អក្នុងការវិនិយោគយកចំនេញ នាពេលអនាគត ឬជាវសម្រាប់រស់នៅក៏ដោយ។
ជាក់ស្តែងអ្នកជំនាញអចលនទ្រព្យ និងជាប្រធានសមាគមអ្នកវាយតម្លៃ និងភា្នក់ងារអចលវត្ថុកម្ពុជា លោក ច្រឹក សុខនីម ធ្លាប់បានមានប្រសាសន៍ថា កំណើនសេដ្ឋកិច្ចកម្ពុជាបាន និងកំពុងរុញច្រានដល់ការផ្គត់ផ្គង់លំនៅឋាន នៅក្នុងទីក្រុងភ្នំពេញ ហើយកំណើននេះ នៅតែបន្តរីកចំរើនបន្ថែមទៀត និងដើរតួនាទីយ៉ាងសំខាន់ ក្នុងការបំរើដល់ ការផ្គត់ផ្គង់ និងសេដ្ឋកិច្ចនៅក្នុងប្រទេសកម្ពុជាប្រកបដោយចីរភាព។
ខុនដូ
ខុនដូបានចាប់ផ្តើមមានប្រជាប្រិយភាព ស្របពេលដែលប្រជាជនកម្ពុជាបានផ្លាស់ប្តូរការរស់នៅតាមបែបបរទេស និងបត់បែនទៅតាមរសនិយម។ ការរស់នៅតាមខុនដូមានភាពទាន់សម័យនិងទំនើប ដែលភាគច្រើនខុនដូទាំងនោះ មានទីតាំងស្ថិតនៅចំតំបន់មានសក្តានុពលច្រើន និងផ្តល់ភាពងាយស្រួលសម្រាប់អ្នករស់នៅ។
របាយការណ៍ស្រាវជ្រាវ របស់ក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia កាលពីកន្លងទៅនេះបានបង្ហាញថា នៅទូទាំងរាជធានីភ្នំពេញ មានគម្រោងខុនដូចំនួន៥ ស្មើនឹង២៨៤៣យូនីត បានចូលទៅក្នុងទីផ្សារក្នុងត្រីមាសទី១នៃ ឆ្នាំនេះ ដែលបានធ្វើឱ្យខុនដូ មានកំនើនរហូតដល់២០,៨៥១យូនីតក្នុងទីផ្សារទាំងមូល។ ទន្ទឹមនឹងនេះដែរ ម្ចាស់អចលនវត្ថុ អាចមានឱកាសច្រើនដូចជាផ្តល់ជួលជាដើម។
តាមរបាយការណ៍ដដែលបានឱ្យឃើញថា ការជួលប្រចាំខែជាមធ្យម ក្នុងមួយម៉ែត្រការ៉េសម្រាប់យូនីត ដែលមានតម្លៃខ្ពស់គឺ១៤,២១ដុល្លារ និង១១,៧៩ដុល្លារ សម្រាប់យូនីតខ្នាតមធ្យម។
ដីធ្លី
ថ្វីត្បិតតែជួបភាពរអាក់រអួលបន្តិច ប៉ុន្តែវិស័យដីធ្លីនៅតែបន្តកម្រើកទៅមុខជានិច្ច។ អ្នកជំនាញអចលនទ្រព្យដីធ្លី ធ្លាប់បានលើកឡើងជាច្រើនលើកច្រើនសាររួចមកហើយ ថាការវិនិយោគលើវិស័យដិធ្លី ផ្តល់ផលចំណេញច្រើនដល់អ្នកទិញ។
លោកឧកញ៉ា តេង ឬទ្ធី អគ្គនាយកក្រុមហ៊ុន R Investment Group ធា្លប់បានលើកឡើងថា អ្នកវិនិយោគដីធ្លីមានច្រើនប្រភេទ ទី១ អ្នកវិនិយោគអចលនទ្រព្យពាក់ព័ន្ធវិស័យទេសចរណ៍ដូចជា ការអភិវឌ្ឍទៅជាលំនៅឋានលំហែកាយ សណ្ឋាគារ និងរមណីយដ្ឋានផ្សេង។ ទី ២ គឺអ្នកដែលស្វែងរកទិញដីធ្លី ទុកវិនិយោគបន្តយកចំណេញ ឬក៏ពុះដីឡូតិ៍លក់ជាដើម។
ក្រៅពីការបង្កើតប្រភេទអចលនទ្រព្យ ដូចបានរៀបរាប់ខាងលើ អ្នកជំនាញមួយរូបក៏បានរៀបរាប់ថា ដីធ្លីក៏អាចផ្តល់ឱកាសទៅជាការសាងសង់ឃ្លាំង រោងចក្រ សហគ្រាស ផ្សេងៗដើម្បីបម្រើលើវិស័យឧស្សាហកម្មផងដែរ៕
