ព្រលានយន្តហោះ​តារា​សាគរ​ខេត្តកោះកុង​អាច​នឹង​បញ្ចប់​ការសាងសង់​នៅ​ដើមឆ្នាំ២០២១

0

ដោយ ​វុត្ថា

ភ្នំពេញៈ អភិបាលខេត្ត​កោះកុង លោកជំទាវ​ភូ​ថង មិថុនា​បានឱ្យដឹងថា គម្រោង​ព្រលានយន្តហោះ​នៃ​អាកាសយានដ្ឋាន​អន្តរជាតិ តារា​សាគរ​ក្នុង​ខេត្តកោះកុង គឺជា​ផ្នែក​មួយ នៃ​គម្រោង​អភិវឌ្ឍន៍​តំបន់​វិស្សមកាល​ទេសចរណ៍ តារា​សាគរ​តម្លៃ​រាប់ពាន់​លាន​ដុល្លារ​អាមេរិក​របស់​ក្រុមហ៊ុន​ចិន គ្រោង​នឹង​បញ្ចប់​ការសាងសង់​ក្នុង​ដើមឆ្នាំ២០២១ ខាងមុខនេះ។

លោក​ជំ​ទា​បាន​ថ្លែង​នៅក្នុង​ស​ន្និ​ស​ទី​សារព័ត៌មាន​ស្តីពី «វឌ្ឍនភាព និង​ទិសដៅ​ការងារ​បន្ត​របស់​រដ្ឋ​បាល​ខេត្តកោះកុង»នា​ថ្ងៃទី ១១ ខែមិថុនា ឆ្នាំ ២០២០កន្លងមក​បានឱ្យដឹង​ថា តាម​គម្រោង​ការសាងសង់​ព្រលានយន្តហោះ អន្តរជាតិ​តារា​សាគរ​នឹង​បញ្ចប់​នៅក្នុង​ឆ្នាំ ២០២០នេះ តែដោយសារ​មានការ​បញ្ហា​នៃ​ជំំ​ងឺ​កូ​វី១៩ បានធ្វើ​ឱ្យមាន​ស្ថាន​ភាពយឺត​យ៉ាង​បន្តិច ប៉ុន្តែ​អាច​នឹង​បញ្ចប់​នៅ​ដើមឆ្នាំ ២០២១ ។

លោកស្រី​បញ្ជាក់ថា “រហូត​ម​ដល់ពេលនេះ ការសាងសង់​ព្រលានយន្តហោះ​តារា​សាគរ សម្រេចបាន​ប្រមាណ៥០ ទៅ៦០ភាគរយ ហើយ​អាច​នឹង​ញ្ច​ប់​នៅក្នុង​ដើមឆ្នាំ ២០២១ ខណៈ​ខាង​ក្រុមហ៊ុន​កំពុង​មមាញឹក​ក្នុងការ​សាងសង់​ឱ្យ​ចប់​តាម​ផែនការ” ។

ឆ្លើយតប​នឹង​ការរិះគន់ ជុំវិញ​ការសាងសង់​ព្រលានយន្តហោះ​តារា​សាគរ​នេះ សម្រាប់​បំរើ​ដល់​វិស័យ​យោធា​នោះ ត្រូវបាន​លោកស្រី​មិថុនា ភូ​ថង​បដិសេធ​ទាំ​ស្រុង ដោយបាន​លើកឡើងថា ព្រលានយន្តហោះ​នេះ គឺ​សម្រាប់​បំរើ​ដល់​វិស័យ​ទេសចរណ៍ ពាណិជ្ជកម្ម ដឹកជញ្ជូន និង​វិនិយោគ​តែប៉ុណ្ណោះ។

លោកស្រី​ភូ​ថង មិថុនា​បាន​ថ្លែងថា “ការចោទប្រកាន់ថា ការសាងសង់​ព្រលានយន្តហោះ​តារា​សាគរ​នេះ បំរើ​ដល់​វិស័យ​យោធា​គឺ​មិន​ពិត​នោះទេ  ព្រោះ​តំបន់​នោះ ត្រូវបាន​បង្កើតជា​តំបន់​វិស្សមកាល ទេសចរណ៍ សម្រាប់​ដើរ​កម្សាន្ត” ។ លោកស្រី​បន្ថែមថា “សម្រាប់​តំបន់​យោធា គឺជា​តំបន់​ដែល​ត្រូវ​ហាមឃាត់ និង​សន្តិសុខសម្រាប់​ជាតិ ដែល​មិន​អនុញ្ញាតឱ្យ​ភ្ញៀវ​ទេសចរណ៍​ចូលទៅ​នោះទេ” ។

ក្រុមហ៊ុន UNION Development បាន​ស្រេច​បោះទុន​វិនិយោគ​សរុប​ចំនួន២០០លាន​ដុល្លារ​សាងសង់​ព្រលានយន្តហោះ​នេះ រួមមាន​ការស្ថាបនា​ផ្លូវ​សម្រាប់​យន្តហោះ​រត់ ដែលមាន​ប្រវែង​បណ្តោយ៣២០០ម៉ែត្រ និង​ទទឹង៦០ម៉ែត្រ និង​ស្ថានីយ៍​អ្នកដំណើរ ហើយ​ក្រោយ​ការសាងសង់​រួច អាកាសយានដ្ឋាន​អន្តរជាតិ​តារា​សាគរ នឹង​អនុញ្ញាត​ឲ្យ​យន្តហោះ​ធុន​យក្ស ប្រភេទ​ប៊ូ​អី​ង៧៧៧ និង​អ៊ែ​របើស A៣៤០ ចុះចត​បាន៕

LEAVE A REPLY

Please enter your comment!
Please enter your name here