ដោយ វុត្ថា
ភ្នំពេញៈ រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ រហូតមដល់ពេលនេះ បានធ្វើប្រទានកម្មសរុបបានចំនួន២៩ទីតាំង លើផ្ទៃដីទំហំ៨២ហិចតា ដោយបានប្រគល់ដីធ្លី ជូនប្រជាពលរដ្ឋប្រមាណ១៨.០០០គ្រួសារ និងបានបិទបញ្ចប់ទាំងស្រុងសំណុំរឿងទំនាស់ដីធ្លីរ៉ាំរ៉ៃអូសបន្លាយ រយៈពេលជាច្រើនឆ្នាំក្នុងតំបន់អភិវឌ្ឍន៍បឹងកក់ និងសហគមន៍បុរីកីឡា។
យោងតាមរបាយការណ៍របស់រដ្ឋបាលរាធានីភ្នំពេញ ដែលបានផ្សព្វផ្សាយកាលពីពេលថ្មីៗនេះឱ្យដឹថា ជាមួយនឹងការដោះស្រាយបានប្រកាន់ខ្ជាប់ នូវគោលការណ៍ច្បាប់ សិទ្ធិលំនៅឋាន និងគោលការណ៍មនុស្សធម៌ ព្រមទាំងកំពុងឈានទៅបន្តដោះស្រាយបញ្ចប់បញ្ហាតំបន់អភិវឌ្ឍន៍ឫស្សីកែវ តំបន់អភិវឌ្ឍន៍បឹងទំពុន-ជើងឯក តំបន់អតីតផ្លូវដែក តំបន់ស្ថានីយ៍បូមទឹកទួលគោក តំបន់ស្ថានីយ៍ស្ដុកទឹកបឹងត្របែក និងពិនិត្យរៀបចំតំបន់មិនរៀបរយមួយចំនួនទៀត។
លោកឃួង ស្រេង បានអភិបាលរាជធានីភ្នំពេញបញ្ជាក់ថា ផ្អែកតាមគោលនយោបាយប្រទានកម្មរបស់ សម្ដេចតេជោនាយករដ្ឋមន្ត្រី ចំនួនសហគមន៍ក្រីក្រ ក្នុងរាជធានីភ្នំពេញបានថយចុះពី៣៣៥សហគមន៍ ក្នុងឆ្នាំ២០០៣ មកត្រឹមតែ១៥១សហគមន៍ ក្នុងឆ្នាំ២០២០ ដែលមានមូលដ្ឋានក្នុងសង្កាត់ចំនួន៤៥ នៃខណ្ឌចំនួន១៣ (លើកលែងខណ្ឌ៧មករា ដែលសហគមន៍បុរីកីឡា ត្រូវបានលុបចេញពីបញ្ជីសហគមន៍ក្រីក្រ ក្នុងឆ្នាំ២០១៤) សរុបមានខ្នងផ្ទះចំនួន១២,៨៧៦ ខ្នង ស្មើនឹង១៣,៩៦៣គ្រួសារ និងមានប្រជាពលរដ្ឋសរុប៦១,៧១៥នាក់ តែប៉ុណ្ណោះ។
រដ្ឋបាលរាជធានីភ្នំពេញ បានអនុវត្តន៍គម្រោងស្ដារឡើងវិញ នូវប្រឡាយមេនាំទឹកស្ទឹងមានជ័យ និងគោលការណ៍ប្រទានកម្មរបស់ សម្ដេចតេជោ ហ៊ុន សែន សម្រាប់ដោះស្រាយបញ្ហាសំណង់ មិនរៀបរយលើផ្ទៃប្រឡាយ និងអភិវឌ្ឍលំនៅឋានៅនឹងកន្លែងជូនប្រជាពលរដ្ឋក្រីក្រក្នុងសហគមន៍ស្ទឹងមានជ័យ។
បើតាមលោក ឃួង ស្រេងបានឲ្យដឹងថា ក្រោមដំបូលនៃសន្តិភាពរបស់សម្ដេចតេជោនាយករដ្ឋមន្ត្រី ជីវភាពរស់នៅរបស់ប្រជាពលរដ្ឋ មានភាពល្អប្រសើរជាបណ្ដើរៗ ហើយគម្រោងអភិវឌ្ឍន៍ជាច្រើន ទាំងផ្នែករដ្ឋ និងផ្នែកឯកជន បាននឹងកំពុងដំណើរការយ៉ាងសស្រាក់សស្រាំនៅរាជធានីភ្នំពេញ ដែលក្នុងនោះរួមមាន សមិទ្ធផលហេដ្ឋារចនាសម្ព័ន្ធរូ័បវន្ត និងសំណង់៕
