ដោយស៊ីវ ម៉េង
ភ្នំពេញៈ លោកឧកញ៉ាសៀ រិទ្ឋីប្រធានក្រុមប្រឹក្សាភិបាលនៃអគ្គនាយកក្រុមហ៊ុនWorld Bridge Land Groupបានថ្លែងថា សណ្ឋាគារShangri-La ដែលស្ថិតក្នុងគំរោងThe PeAk នឹងបើកដំណើរការតាមការគ្រោងទុក។
លោកបានមានប្រសាសន៍ក្នុងកិច្ចសម្ភាសន៍ ផ្ទាល់មុខនាព្រឹកថ្ងៃទី២៦ មិថុនានេះថា សណ្ឋាគារលំដាប់ផ្កាយ៥ ដែលមានមូលដ្ឋាននៅអាស៊ី ដែលមានស្តង់ដាបែបអឺរ៉ុបនេះ នឹងបើកដំនើរការតាមការក្នុងគម្រោងThe PeAk នៅចុងឆ្នាំនេះ។ វាជាសណ្ឋាគារលំដាប់Top5 និងមានសាខាចំនួន៣០០ទីតាំងនៅក្នុងពិភពលោក ពិសេសវាមានទីតាំងនៅគ្រប់ខេត្តរបស់ប្រទេសចិន។
លោកបន្តថា “ភ្ញៀវចិនស្គាល់Shangri_Laច្បាស់ ដោយសារវាជាសណ្ឋាគារដែលមានមូលដ្ឋាននៅអាស៊ី និងមានស្តង់ដាបែបអឺរ៉ុបនេះ វាមានកេ្តរ៍ឈ្មោះល្បីដូចសណ្ឋាគារល្បីៗដទៃទៀតក្នុងពិភពលោក”។លោកបន្តថា “គម្រោងThe PeAkនឹងបញ្ចប់់ការសាងសង់ក្នុងឆ្នាំនេះ ខណៈការលក់ខុនដូ និងការិយាល័យក្នុងគំរោងនេះបានលក់ចេញអស់ហើយ”។
លោកឧកញ៉ាបានបន្តថា សណ្ឋាគារShangri-Laនៅទីក្រុងភ្នំពេញ មានបន្ទប់សរុបចំនួន៣០០ ដែលជាបន្ទប់់មានស្តង់ដាខ្ពស់ ហើយលោកនឹងចូលពិនិត្យការរៀបចំបន្ទប់ស្នាក់នៅក្នុងថ្ងៃនេះ ដើម្បីធ្វើឲ្យប្រាកដថាគំរោងនេះដំណើរការតាមផែនការគ្រោងទុក។
ប្រទេសកម្ពុជាបាននិងកំពុងស្រូបទាញកំនើន នៃការវិនិយោគផ្នែកបដិសណ្ឋារកិច្ច ពិសេសផ្នែកសណ្ឋាគារលំដាប់ផ្កាយ៥ ដែលភាគច្រើនជាការវិនិយោគរបស់អ្នកវិនិយោគធំៗនៅក្នុងប្រទេស និងគំរោងវិនិយោគធំៗរបស់អ្នកវិនិយោគបរទេស ដោយសារកម្ពុជាមានកំនើនទេសចរណ៍ខ្ពស់ ប៉ុន្តែវិបត្តិCovid-19ទំនងជាធ្វើឲ្យគម្រោងខ្លះពន្យាពេលបើកដំនើរការនៅកម្ពុជា៕
