ដោយ ៖ ប៊ី
ភ្នំពេញ ៖ ក្រុមហ៊ុនបច្ចេកវិទ្យាយក្សចិន Tencent បានប្រកាសទិញសេវាកម្មកម្សាន្តតាមអ៊ិនធឺរណេតរបស់ម៉ាឡេស៊ី Iflix ដែលមាតិកាបច្ចេកវិទ្យា និងធនធាន ខណៈក្រុមហ៊ុនមួយនេះក៏កំពុងព្យាយាមបង្កើនវត្តមានរបស់ខ្លួននៅអាស៊ីអាគ្នេយ៍ដែលរាប់បញ្ចូលទាំងប្រទេសកម្ពុជាផងដែរ។
ក្រុមហ៊ុន Tencent បានឱ្យដឹងថា ផលប័ត្រមាតិកាអន្តរជាតិ និងក្នុងស្រុករបស់ Iflix នឹងអនុញ្ញាតឱ្យពង្រីកសេវាកម្មវីដេអូកម្សាន្តអន្តរជាតិរបស់ខ្លួនគឺ WeTV ដែលបានបើកដំណើរការនៅប្រទេសថៃកាលពីឆ្នាំមុន។ កិច្ចព្រមព្រៀងទិញនេះមានតម្លៃ រាប់សិបលានដុល្លារ។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយកម្សាន្តអាមេរិក Variety ។
ក្រុមហ៊ុន Tencent បានឱ្យដឹងទៀតថា ប្រតិបត្តិការនេះគឺស្របជាមួយនឹងយុទ្ធសាស្រ្តរបស់យើងក្នុងការពង្រីកកម្មវិធីផ្សាយជាអន្តរជាតិរបស់យើង WeTV នៅទូទាំងតំបន់អាស៊ីអាគ្នេយ៍ និងផ្តល់ជូនអ្នកប្រើប្រាស់នូវមាតិកា ដែលមានទាំងនៅអន្តរជាតិ និងក្នុងស្រុក និងមាតិកាគុណភាពខ្ពស់ ដោយមានភាសាជាច្រើន”។
បច្ចុប្បន្ន ក្រុមហ៊ុន Iflix កំពុងចាក់ផ្សាយរាល់ការប្រកួតកីឡាបាល់ទាត់លីគកំពូលម៉ាឡេស៊ី ក្រោមកិច្ចសន្យា ១០ ឆ្នាំ ដោយគិតចាប់ពីឆ្នាំ ២០១៨ ដល់ឆ្នាំ ២០២៧។ កាលពីខែសីហាឆ្នាំ ២០១៨ ក្រុមហ៊ុន Iflix បានយល់ព្រមលើកិច្ចព្រមព្រៀងជាមួយបណ្តាញផ្សាយពាណិជ្ជកម្មតាមទូរទស្សន៍ beIN TV ដើម្បីផ្តល់ការផ្សាយបន្តផ្ទាល់ English Premier League និងបាល់ទាត់ LaLiga របស់អេស្ប៉ាញដល់អតិថិជនរបស់ខ្លួននៅក្នុងប្រទេសកម្ពុជា ក៏ដូចជាការបង្ហាញនៅក្នុងទីផ្សារអាស៊ីមួយចំនួន។
បច្ចុប្បន្នក្រុមហ៊ុន Iflix ធ្វើប្រតិបត្តិការនៅលើទឹកដីអាស៊ីចំនួន ១៣ ប្រទេស រួមមាន ៖ ម៉ាឡេស៊ី ឥណ្ឌូណេស៊ី ហ្វីលីពីន បង់ក្លាដែស នេប៉ាល់ ថៃ ព្រុយណេ ស្រីលង្កា ប៉ាគីស្ថាន មីយ៉ាន់ម៉ា វៀតណាម ម៉ាល់ឌីវ និងកម្ពុជា។ គិតត្រឹមខែមេសាឆ្នាំ ២០២០ កម្មវិធីនេះមានអ្នកប្រើប្រាស់សកម្មជាង ២៥ លាននាក់លើសេវាកម្មរបស់ខ្លួន។
ទោះយ៉ាងណាក៏ដោយ កម្មវិធីនេះត្រូវបានគេរាយការណ៍ថាកំពុងប្រឈមនឹងការខាតបង់បង្គួរ និងជួបផលលំបាកផ្នែកហិរញ្ញវត្ថុ។ យោងតាមប្រភពព័ត៌មាន Variety បានរាយការណ៍ពីការកើនឡើង ៣០ ភាគរយនៃការខាតបង់បន្ទាប់ពីបង់ពន្ធដល់ ១៥៨ លានដុល្លារ (១៤០.៩ លានដុល្លារផោន) នៅក្នុងឆ្នាំឆ្នាំ ២០១៨ ខណៈការផ្តល់ជូនជាសាធារណៈដំបូងនៅលើផ្សារហ៊ុនអូស្ត្រាលីត្រូវបានទាញធ្លាក់ចុះកាលពីដើមឆ្នាំនេះ ដោយសារការរាតត្បាតរបស់ Covid-19 ។
ក្រុមហ៊ុន Tencent មានបំណងរក្សាឈ្មោះកម្មវិធី Iflix ក្នុងរយៈពេលយ៉ាងតិចពី ៦ ទៅ ១២ ខែ។ ភាគច្រើននៃបុគ្គលិករបស់ក្រុមហ៊ុននេះ ត្រូវបានគេរំពឹងថា នឹងត្រូវបានរក្សាទុក រួមជាមួយនាយកប្រតិបត្តិផងដែរ គឺលោក Marc Barnett៕
