ដោយ ៖ វុត្ថា
ភ្នំពេញ ៖ រោងចក្ររោងចក្រផលិតស៊ីម៉ង់ត៍ចំនួន ៤ បាន នឹងកំពុងជួយផ្គត់ផ្គង់ដល់វិស័យសំណង់នៅកម្ពុជា ដែលអាចផលិតស៊ីម៉ង់ត៍រាប់លានតោននៅក្នុងមួយឆ្នាំៗ ខណៈដែលវិស័យសំណង់នៅក្នុងប្រទេសកម្ពុជាត្រូវបានគេមើលឃើញពីសន្ទុះនៃភាពរីកចម្រើននៅក្នុងតំបន់។
យោងតាមការផ្សព្វផ្សាយរបស់ក្រសួងរ៉ែ និងថាមពល កម្ពុជាកាលពីពេលថ្មីៗបង្ហាញថា បច្ចុប្បន្ន នៅក្នុងប្រទេសកម្ពុជាមានរោងចក្រផលិតស៊ីម៉ង់ត៍សរុបចំនួន៤ ដែលកំពុងដំណើរការផលិត សម្រាប់ផ្គត់ផ្គង់វិស័យសំណង់នៅក្នុងស្រុក និងសម្រាប់ការនាំចេញផងដែរ។ រោងចក្រផលិតស៊ីម៉ង់ត៍ទាំងនោះរួមមាន រោងចក្រផលិតស៊ីម៉ង់ត៍ Battambang Conch Cement Company Limited រោងចក្រ Cambodia Cement Chakreyting Co,. Ltd រោងចក្រ Kampot Cement Co., Ltd និងរោងចក្រ Chip Mong Insee Cement Corporation ។
ទី១- រោងចក្រ Battambang Conch Cement Company Limited
– ឈ្មោះគម្រោង៖ រោងចក្រផលិតស៊ីម៉ងត៍ បាត់ដំបង ខ័នស៍ ស៊ីមេន លីមីតធីត
– ទីតាំងគម្រោង៖ តំបន់ភ្នំដូនម៉ាយ ឃុំល្ពៅ ស្រុករតន:មណ្ឌល ខេត្តបាត់ដំបង
– ក្រុមហ៊ុនវិនិយោគ៖ បាត់ដំបង ខ័នស៍ ស៊ីមេន លីមីតធីត (Battambang Conch Cement Company Limited)
– បរិមាណផលិត៖ ២លានតោន/១ឆ្នាំ
– ឆ្នាំដាក់ដំណើរការ៖ ២០១៨
ទី២ – រោងចក្រផលិតស៊ីម៉ងត៍កម្ពុជាចក្រីទីង (Cambodia Cement Chakreyting Co,. Ltd) មានសមត្ថភាពផលិតស៊ីម៉ងត៍ប្រមាណ ១.១លានតោនក្នុងមួយឆ្នាំ។ រោងចក្រនេះ ត្រូវបានស្តារឡើងវិញនិងដាក់ឱ្យដំណើរការនៅឆ្នាំ២០១៥។
– ឈ្មោះគម្រោង៖ រោងចក្រផលិតស៊ីម៉ងត៍ កម្ពុជាចក្រីទីង
– ទីតាំងគម្រោង៖ ភ្នំបោះដំបង ស្រុកកំពត ខេត្តកំពត
– ក្រុមហ៊ុនវិនិយោគ៖ កម្ពុជា ចក្រីទីង (Cambodia Cement Chakreyting Co,. Ltd)
– បរិមាណផលិត៖ ១.១លានតោន/១ឆ្នាំ
– ឆ្នាំដាក់ដំណើរការ៖ ២០១៥
ទី-៣ រោងចក្រផលិតស៊ីម៉ងត៍កំពត ស៊ីមេន ខូអិលធីឌី ជារោងចក្រផលិតស៊ីម៉ងត៍ទី១ របស់ព្រះរាជាណាចក្រកម្ពុជា និងមានសមត្ថភាពផលិតស៊ីម៉ងត៍ប្រមាណ ២លានតោនក្នុងមួយឆ្នាំ និងបានសម្ពោធដាក់ឱ្យដំណើរការនៅឆ្នាំ២០០៨។
– ឈ្មោះគម្រោង៖ រោងចក្រផលិតស៊ីម៉ងត៍ កំពត ស៊ីមេន ខូអិលធីឌី
– ទីតាំងគម្រោង៖ តំបន់ភ្នំទទុង ភ្នំទូកមាសខាងកើត ស្រុកបន្ទាយមាស និងភ្នំតូច ស្រុកដងទង់ ខេត្តកំពត
– ក្រុមហ៊ុនវិនិយោគ៖ កំពត ស៊ីមេន ខូអិលធីឌី (Kampot Cement Co., Ltd)
– បរិមាណផលិត៖ ២លានតោន/1ឆ្នាំ
– ឆ្នាំដាក់ដំណើរការ៖ ២០០៨
ទី-៤ រោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេន (Chip Mong Insee Cement Corporation) មានសមត្ថភាពផលិតស៊ីម៉ងត៍ ប្រមាណ១,៧លានតោនក្នុងមួយឆ្នាំ និងបានសម្ពោធដាក់ឱ្យដំណើរការនៅក្នុងឆ្នាំ២០១៨ ក្រោមអធិបតីភាពដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
– ឈ្មោះគម្រោង៖ រោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេន
– ទីតាំងគម្រោង៖ តំបន់ភ្នំទូកមាសខាងលិច ស្រុកបន្ទាយមាស ខេត្តកំពត
– ក្រុមហ៊ុនវិនិយោគ៖ ជីបម៉ុង អ៊ិនស៊ី ស៊ីមេន (Chip Mong Insee Cement Corporation)
– បរិមាណផលិត៖ ១,៧លានតោនក្នុងមួយឆ្នាំ
– ឆ្នាំដាក់ដំណើរការ៖ ២០១៨
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍កន្លងមកថា ការផលិតស៊ីម៉ង់ត៍នៅក្នុងប្រទេសកម្ពុជា គឺមានសារសំខាន់បំផុតសម្រាប់ឆ្លើយតបទៅគ្រប់តម្រូវការនៅក្នុងការអភិវឌ្ឍន៍វិស័យសំណង់ ហេដ្ឋារចនសម្ព័ន្ធនានានៅទូទាំងប្រទេសកម្ពុជាបានគ្រប់គ្រាន់ និងអាចធ្វើការនាំចេញទៅកាន់ទីផ្សា ក្រៅប្រទេសផងដែរ៕
