ដោយ ប៊ី
ភ្នំពេញៈ តើអ្នកធ្លាប់សុបិនចង់ទិញផ្ទះ ក្នុងតម្លៃថោកនៅបរទេស ហើយផ្លាស់ប្តូរទីលំនៅទៅរស់នៅក្រៅប្រទេស ឬទិញអចលនទ្រព្យទ្រព្យវិនិយោគ ហើយជួលឬលក់ដោយទទួលបានប្រាក់ចំណេញយ៉ាងច្រើនទេ? នេះអាចជាពេលវេលារបស់អ្នក។
ជំនាញអន្តរជាតិ បានលើកឡើង វិបត្តិសេដ្ឋកិច្ចសកល កំពុងផ្តល់ឱកាសវិនិយោគអចលនទ្រព្យនៅបរទេសសម្រាប់ផលចំណេញរយៈពេលវែង។
ខណៈពេលដែលជំងឺរាតត្បាតឆ្លងរាលដាលសកល បានបំផ្លាញសេដ្ឋកិច្ចប្រទេសជាច្រើន វាក៏ជាឱកាសផងដែរ សម្រាប់ការចរចាទិញអចលនទ្រព្យនៅជុំវិញពិភពលោក នៅពេលអត្រាការប្រាក់ទាបមិនធ្លាប់មានពីមុនមក។
លោក Ronan McMahon តំណាងក្រុមហ៊ុន Real Estate Trend Alert ដែលមានគេហទំព័រInternationalLiving.com បាននិយាយថា“គ្មានអ្វីដូចជាវិបត្តិជំងឺកូវីដ១៩ បានកើតមានពីមុនមកទេ”។
កាលពីថ្មីៗនេះ ក្រុមហ៊ុនReal Estate Trend បានចេញផ្សាយរបាយការណ៍មួយស្តីពីកន្លែងល្អបំផុតទាំងប្រាំ ដើម្បីស្វែងរកការចរចាទិញក្នុងឆ្នាំ២០២០។ យោងតាម McMahon គំនិតនេះគឺយកប្រាក់ដុល្លារអាមេរិកខ្លាំង ឬខ្ចីប្រាក់ក្នុងអត្រាទាបជាប្រវត្តិសាស្ត្រ ហើយវិនិយោគនៅទីផ្សារបរទេសដោយទិញ អចលនទ្រព្យដែលមានតម្លៃទាប និងទុកការវិនិយោគដ៏មានសក្តានុពលសម្រាប់ប្រាក់ចំណូល និងការឡើងថ្លៃវិញ។
លោកMcMahon មានប្រសាសន៍ថា “មនុស្សជាច្រើនមានអារម្មណ៍ថា គ្មានថាមពល នៅពេលប្រឈមមុខនឹងភាពវឹកវរនេះ ប៉ុន្តែអារម្មណ៍របស់ខ្ញុំគឺថាប្រសិនបើអ្នកយកឱកាសពីវិបត្តិនេះត្រឹមត្រូវ វាអាចនឹងផ្តល់ផលចំណេញច្រើនក្នុងរយៈពេលវែង”។
លោកMcMahon បានមានប្រសាសន៍ថា “ពិភពលោកនឹងមិនវិលទៅរកសភាពដើមនោះទេ។ នេះជាការគួរឱ្យខ្លាច ឬគួរឱ្យរំភើប … ទោះវាកើតឡើងក៏ដោយ។ ហើយសម្រាប់មនុស្ស ដែលផ្តោតលើឱកាស វាជាអំណោយមួយ”។
នៅពេលស្វែងរកអចលនទ្រព្យ លោក McMahon និយាយថា វាចាំបាច់ក្នុងការផ្តោតលើកន្លែងបីប្រភេទផ្សេងៗគ្នា។ នោះមានន័យថាត្រូវសំឡឹងមើល ទៅទីផ្សារអន្តរជាតិដូចជា Riviera Maya ប្រទេសម៉ិកស៊ិក។ ឬទៅកន្លែងដែលវណ្ណៈកណ្តាលកំពុងកើនឡើងដូចជាកូឡុំប៊ី។ ឬកន្លែងដែលមាននិន្នាការធ្លាក់ចុះ ដូចផ្នែកខ្លះនៃទ្វីបអឺរ៉ុប ដែលមានប្រជាជនវ័យចំណាស់ និងការច្នៃប្រឌិតមានកំណត់ ប៉ុន្តែកន្លែងដែលមានការចាប់អារម្មណ៍ជាប្រវត្តិសាស្ត្រ ដូចជាប្រទេសអ៊ីតាលីជាដើម”៕
