ដោយ ៖ វុត្ថា
កំពង់ចាមៈ យ៉ាងយូរនៅត្រឹមអំឡុងឆ្នាំ២០២១ឆាប់ខាងមុខនេះ ខេត្តកំពង់ចាមនឹងទទួលបានផ្លូវមួយខ្សែទៀត សម្រាប់ជួយសម្រួលដល់ការធ្វើចរាចរណ៍ និងដឹកទំនិញឆ្លងកាត់រវាងខេត្តកំពង់ចាម ខេត្តកណ្តាល និងបន្តមករាជធានីភ្នំពេញ ដែលអាចជួយកាត់បន្ថយពេលវេលាបានច្រើនជាងបច្ចុប្បន្ននេះ។
ផ្លូវមួយខ្សែរដែលនឹងជួយលើកកម្ព ស់កំណើនសេដ្ឋកិច្ច រវាងខេត្តកំពង់ចាម និងខេត្តកណ្តាលមួយនេះ មានប្រវែង៥៨គីឡូម៉ែត្រ តភ្ជាប់ពីឃុំរកាកោងស្រុកមុខកំពូល ខេត្តកណ្តាល ទៅស្រុកកងមាស ខេត្តកំពង់ចាម គឺជាផ្លូវចាស់លេខ២៧០ ដែលទទួលរងនូវការខូចខាតយ៉ាងដំណំតាំងពីយូរណាស់មកហើយ ជាពិសេសការវាយប្រហារដោយទឹកជំនន់។
លោក អ៊ុន ចាន់ដា អភិបាលខេត្តកំពង់ចាម បានបញ្ជាក់កាលពីពេលថ្មីកន្លងមកថា ពេលនេះក្រុមការងារជំនាញថ្នាក់ខេត្ត និងក្រសួងសាធារណៈការ និងដឹកជញ្ជូនកំពុងតែជំរុញ និងពន្លឿនការស្ថាបនាផ្លូវមួយខ្សែនេះ បន្ទាប់ពីផ្លូវមួយខ្សែនេះមានសភាពខូចខាតធ្ងន់ធ្ងរ ដែលបង្កផលលំបាកក្នុងការធ្វើដំណើរ ប៉ះពាល់ដល់សុខភាពរបស់ប្រជាពលរដ្ឋ ទាំងការធ្វើចរាចរណ៍ និងប្រជាពលរដ្ឋរស់នៅអមសងខាងផ្លូវ។
លោកបានបញ្ជាក់ថា “ក្រសួងបានធ្វើការប្ដេជ្ញាចិត្ដជាមួយខេត្ដថា នឹងស្ថាបនឱ្យរួច បើទោះបីទំហំថវិកា មានការប៉ះពាល់ដោយសារ Covid-19 យ៉ាងក៏ដោយ ប៉ុន្ដែកងវិស្វកម្មរបស់ក្រសួងសាធារណការធ្វើឱ្យរួច” ។ លោកបន្តថា “នេះជាសំណួរដដែលៗរាប់ឆ្នាំមកហើយ ដែលយើងកំពុងប៉ះពាល់ថវិកា ហើយបើអត់ថវិកាធ្វើទេក៏ពិបាកដែរ ហើយអ្នកធ្វើក៏ត្រូវការថវិកាជាទ្រង់ទ្រាយធំដែរ ដើម្បីធានាគុណភាព” ។
លោក សុខ ស្រ៊ុន ប្រធានមន្ទីរសាធារណការ និងដឹកជញ្ជូនខេត្ដកំពង់ចាម បានបញ្ជាក់ថា កំណាត់ផ្លូវ២៧០នេះ គឺមានប្រវែងជាង៥៨គីឡូម៉ែត្រ ដោយបានសាងសង់ជាគ្រួសកៅស៊ូបានចំនួន៤៨គីឡូម៉ែត្រ ហើយនៅសល់១២គីឡូទៀត ត្រូវបានផ្អាកសាងសង់មួយរយៈបន្ទាប់ពីមានការផ្ទុះជំងឺ Covid-19 ។
ផ្លូវលេខ២៧០ នេះជាផ្លូវស្របតាមមាត់ទន្លេ តភ្ជាប់ពីស្រុកមុខកំពូលខេត្ដកណ្ដាល ទៅស្រុកកងមាស ខេត្ដកំពង់ចាម ហើយកំពុងមានការមមាញឹកក្នុងការធ្វើចរាចរណ៍ និងជាផ្លូវសេដ្ឋកិច្ចយ៉ាងសំខាន់ សម្រាប់ខេត្តទាំង២នេះ។ តាមរយៈផ្លូវមួយខ្សែនេះ នឹងជួយសម្រួលដល់ការធ្វើដំណើរ និងដឹកជញ្ជូនរបស់បងប្អូនប្រជាពលរដ្ឋ ដែលលើកកម្ពស់កម្រិតជីវភាពគ្រួសារ និងសេដ្ឋកិច្ចខេត្តទាំងមូលផងដែរ។
សេដ្ឋកិច្ចរបស់ខេត្តកំពង់ចាម គឺពឹងផ្អែកទៅលើវិស័យចំនួន៣ រួមមាន កសិឧស្សាហកម្ម សេវាកម្ម និងវិស័យឧស្សាហកម្ម ដែលក្នុងនោះប្រជាពលរដ្ឋភាគច្រើនប្រកបមុខរបរផ្នែកកសិកម្មជាចម្បងស្មើនឹង៦៦,២ភាគរយ, សិប្បកម្ម០,៧០ភាគរយ និងរបរសេវាកម្ម៣៣,១ភាគរយ ជាមួយនឹងចំណូលសម្រាប់មនុស្សម្នាក់ មានប្រមាណ១៦៧៩ដុល្លារក្នុងមួយឆ្នាំ។ កំណើនសេដ្ឋកិច្ចទទួលបានពីវិស័យកសិកម្មចំនួន៣៨ភាគរយ ឧស្សាហកម្ម និងសិប្បកម្ម១៩ភាគរយ និងសេវាកម្ម៤៣ ភាគរយ” ។
ដោយឡែក នៅក្នុងឆ្នាំ២០២១ ខាងមុខនេះការធ្វើចរាចរណ៍ និងដឹកជញ្ជូនរវាងខេត្តកំពង់ចាម ខេត្តកណ្តាល និងបន្តមកកាន់រាជធានីភ្នំពេញ តាមរយៈផ្លូវជាតិចំនួន២ខ្សែ គឺផ្លូវជាតិលេខ៧ តភ្ជាប់ផ្លូវជាតិលេខ៦ ហើយមួយខ្សែទៀតតាមរយៈផ្លូវជាតិលេខ២៧០ ដែលកំពុងសម្រុកសាងសង់គ្រោងបញ្ចប់ក្នុងពេលដ៏ខ្លីខាងមុខនេះ៕
